3-6 تامىز ارالىعىندا الماتى وبلىسىندا اۋىل بالالارى اراسىندا Halyk Open Cup – 2026 رەسپۋبليكالىق فۋتبول ءتۋرنيرى ءوتتى، دەپ حابارلايدى "ادىرنا" ءتىلشىسى.
جارىس تيمۋر قۇلىباەۆتىڭ Halyk قايىرىمدىلىق قورىنىڭ 10 جىلدىعىنا وراي، #اۋىلفۋتبول جوباسى اياسىندا ۇيىمداستىرىلدى.
تۋرنيرگە قازاقستاننىڭ ءار وڭىرىندەگى اۋىلداردان كەلگەن 16 كوماندا قاتىستى. جارىسقا 200-دەن استام جاس فۋتبولشى مەن جاتتىقتىرۋشى قاتىسىپ، كوماندالار توپتىق كەزەڭدە، پلەي-وففتا جانە شەشۋشى ويىنداردا باق سىنادى.
جوبا اۋىلدىق جەرلەردەگى بالالارعا سپورتپەن اينالىسۋعا تەڭ مۇمكىندىك بەرۋدى ماقسات ەتەدى. ۇيىمداستىرۋشىلاردىڭ مالىمەتىنشە، اۋىل كوماندالارى ءۇشىن جول اقىسى، سپورتتىق كيىم، جابدىقتار جانە جاتىن ورىن سەكىلدى شىعىندار تۋرنيرلەرگە قاتىسۋعا كەدەرگى كەلتىرۋى مۇمكىن.
وسىعان بايلانىستى Halyk قايىرىمدىلىق قورى 2023 جىلدان بەرى #اۋىلفۋتبول جوباسىنا قولداۋ كورسەتىپ كەلەدى. وسى كەزەڭدە 25-تەن استام تەگىن تۋرنير، ونىڭ ىشىندە ءۇش رەسپۋبليكالىق چەمپيونات ۇيىمداستىرىلعان. كوماندالاردىڭ جول شىعىندارى وتەلىپ، قاجەتتى سپورتتىق جابدىقتار بەرىلگەن.
«قازاقستاندىق سپورتشىلار حالىقارالىق ارەنادا ەل نامىسىن ابىرويمەن قورعاپ, جاس ۇرپاققا جىگەر بەرەدى. ءبىز ۇلكەن جەڭىستەر بالانىڭ سپورتتاعى العاشقى قادامىنان باستالاتىنىنا سەنەمىز. سوندىقتان دارىندى بالالاردىڭ الەۋەتىن اشاتىن جوبالاردى قولداۋدى جالعاستىرامىز. Halyk قورىنىڭ 10 جىلدىعىن بالالارمەن, باپكەرلەرمەن جانە جاسوسپىرىمدەر سپورتىن دامىتۋعا ۇلەس قوسىپ جۇرگەن جاندارمەن بىرگە اتاپ ءوتۋ – ءبىز ءۇشىن ۇلكەن قۋانىش»، – دەدى Halyk قايىرىمدىلىق قورىنىڭ اتقارۋشى ديرەكتورى عالىمبەك جاقسىلىقوۆ.
Halyk Open Cup – 2026 ءتۋرنيرىنىڭ قورىتىندىسى بويىنشا الماتى وبلىسىنىڭ «اقبارىس» كومانداسى چەمپيون اتاندى. كۇمىس جۇلدەنى الماتى وبلىسىنىڭ تاعى ءبىر وكىلى – «المالى» كومانداسى يەلەندى.
اتىراۋ وبلىسىنىڭ «ساعىز» كومانداسى ءۇشىنشى ورىنعا جايعاسسا، جامبىل وبلىسىنىڭ «شەبەر» كومانداسى ۇزدىك تورتتىكتى تۇيىندەدى.
تۋرنير جەڭىمپازى «اقبارىس» كومانداسىنىڭ ءار ويىنشىسىنا ۆەلوسيپەد تابىستالدى. بارلىعى 12 ۆەلوسيپەد سىيعا بەرىلدى. سونىمەن قاتار جەڭىمپازدار مەن جۇلدەگەرلەرگە كۋبوكتار، مەدالدار، فۋتبول دوپتارى جانە جاتتىعۋ قۇرالدارى تابىستالدى.
جارىس قورىتىندىسىندا جەكە نوميناتسيالار بويىنشا دا ۇزدىكتەر انىقتالدى. ۇزدىك قاقپاشى اتالىمىن «ساعىز» كومانداسىنىڭ ويىنشىسى قانات ەركەبۇلانۇلى، ۇزدىك قورعاۋشى اتاعىن «شەبەر» كومانداسىنىڭ مۇشەسى نۇرجان ازاماتۇلى يەلەندى.
ال «المالى» كومانداسىنىڭ ويىنشىسى يبراحيم ءابيدوللاۇلى ۇزدىك شابۋىلشى اتاندى. ءتۋرنيردىڭ ۇزدىك ويىنشىسى جانە «التىن دوپ» يەگەرى «اقبارىس» كومانداسىنىڭ ويىنشىسى ابراحيم دۇيسەنبەك بولدى.
