3-6 tamyz aralyǧynda Almaty oblysynda auyl balalary arasynda Halyk Open Cup – 2026 respublikalyq futbol turnirı öttı, dep habarlaidy "Adyrna" tılşısı.
Jarys Timur Qūlybaevtyŋ Halyk qaiyrymdylyq qorynyŋ 10 jyldyǧyna orai, #AuylFutbol jobasy aiasynda ūiymdastyryldy.
Turnirge Qazaqstannyŋ är öŋırındegı auyldardan kelgen 16 komanda qatysty. Jarysqa 200-den astam jas futbolşy men jattyqtyruşy qatysyp, komandalar toptyq kezeŋde, plei-offta jäne şeşuşı oiyndarda baq synady.
Joba auyldyq jerlerdegı balalarǧa sportpen ainalysuǧa teŋ mümkındık berudı maqsat etedı. Ūiymdastyruşylardyŋ mälımetınşe, auyl komandalary üşın jol aqysy, sporttyq kiım, jabdyqtar jäne jatyn oryn sekıldı şyǧyndar turnirlerge qatysuǧa kedergı keltıruı mümkın.
Osyǧan bailanysty Halyk qaiyrymdylyq qory 2023 jyldan berı #AuylFutbol jobasyna qoldau körsetıp keledı. Osy kezeŋde 25-ten astam tegın turnir, onyŋ ışınde üş respublikalyq chempionat ūiymdastyrylǧan. Komandalardyŋ jol şyǧyndary ötelıp, qajettı sporttyq jabdyqtar berılgen.
«Qazaqstandyq sportşylar halyqaralyq arenada el namysyn abyroimen qorǧap, jas ūrpaqqa jıger beredı. Bız ülken jeŋıster balanyŋ sporttaǧy alǧaşqy qadamynan bastalatynyna senemız. Sondyqtan daryndy balalardyŋ äleuetın aşatyn jobalardy qoldaudy jalǧastyramyz. Halyk qorynyŋ 10 jyldyǧyn balalarmen, bapkerlermen jäne jasöspırımder sportyn damytuǧa üles qosyp jürgen jandarmen bırge atap ötu – bız üşın ülken quanyş», – dedı Halyk qaiyrymdylyq qorynyŋ atqaruşy direktory Ǧalymbek Jaqsylyqov.
Halyk Open Cup – 2026 turnirınıŋ qorytyndysy boiynşa Almaty oblysynyŋ «Aqbarys» komandasy chempion atandy. Kümıs jüldenı Almaty oblysynyŋ taǧy bır ökılı – «Almaly» komandasy ielendı.
Atyrau oblysynyŋ «Saǧyz» komandasy üşınşı orynǧa jaiǧassa, Jambyl oblysynyŋ «Şeber» komandasy üzdık törttıktı tüiındedı.
Turnir jeŋımpazy «Aqbarys» komandasynyŋ är oiynşysyna velosiped tabystaldy. Barlyǧy 12 velosiped syiǧa berıldı. Sonymen qatar jeŋımpazdar men jüldegerlerge kuboktar, medaldar, futbol doptary jäne jattyǧu qūraldary tabystaldy.
Jarys qorytyndysynda jeke nominasiialar boiynşa da üzdıkter anyqtaldy. Üzdık qaqpaşy atalymyn «Saǧyz» komandasynyŋ oiynşysy Qanat Erkebūlanūly, üzdık qorǧauşy ataǧyn «Şeber» komandasynyŋ müşesı Nūrjan Azamatūly ielendı.
Al «Almaly» komandasynyŋ oiynşysy İbrahim Äbidollaūly üzdık şabuylşy atandy. Turnirdıŋ üzdık oiynşysy jäne «Altyn dop» iegerı «Aqbarys» komandasynyŋ oiynşysy Abrahim Düisenbek boldy.
