قازاقتىڭ ۇلى اقىنى، ويشىلى، فيلوسوفى اباي قۇنانبايۇلىنىڭ تۋعان كۇنىنە وراي، اباي ساياباعىندا ۇلى اقىننىڭ ەسكەرتكىشىنە گۇل شوقتارىن قويۋ ءراسىمى ۇيىمداستىرىلدى. سالتاناتتى شاراعا شىمكەنت قالاسى اكىمىنىڭ ورىنباسارى سارسەن قۇرانبەك، زيالى قاۋىم وكىلدەرى، اقىن-جازۋشىلار، بۇقارالىق اقپارات قۇرالدارىنىڭ وكىلدەرى مەن قالا تۇرعىندارى قاتىستى.
گۇل شوقتارىن قويۋ بارىسىندا اباي مۇراسىنىڭ قازاق رۋحانياتىنداعى ورنى مەن ونىڭ شىعارمالارىنداعى ادامگەرشىلىك، ءبىلىم، عىلىم، ەڭبەك، ەلدىك قۇندىلىقتاردىڭ ماڭىزى ءسوز بولدى.
شارادا ءسوز العان شىمكەنت قالاسى اكىمىنىڭ ورىنباسارى سارسەن ابايۇلى قۇرانبەك حاكىم مۇراسىنىڭ ۋاقىت وتكەن سايىن قۇندىلىعى ارتا تۇسەتىنىن اتاپ ءوتتى.
- اباي اتامىز سوقتىقپالى، سوقپاقتى زاماندا ءومىر ءسۇرىپ، قازاق قوعامىنىڭ ساناسىنا ساۋلە تۇسىرەتىن، ۋاقىت وتكەن سايىن قادىرى ارتا بەرەتىن ماڭگىلىك مۇرا قالدىردى. ول ءوز ءداۋىرىنىڭ عانا ەمەس، كەيىنگى ۇرپاقتىڭ دا قامىن ويلاپ، قازاق قوعامىن بىلىمگە، عىلىمعا، ادامگەرشىلىككە شاقىردى. ابايدىڭ ءاربىر ءسوزى، ءاربىر ويى – ادامدى كەمەلدىككە، ەلدى وركەنيەتكە باستايتىن رۋحاني باعدار. سوندىقتان حاكىمنىڭ مۇراسى بۇگىنگى كۇنى دە وزەكتىلىگىن جوعالتپاي، ۇرپاقتان ۇرپاققا جالعاسىپ كەلەدى، – دەدى ول.
راسىندا، ابايدىڭ ءومىر سۇرگەن كەزەڭى قازاق قوعامى ءۇشىن كۇردەلى ۋاقىت بولعانىمەن، اقىن ەلدىڭ ەرتەڭىن ءبىلىم مەن عىلىمنان، ادال ەڭبەك پەن ادامدىق قاسيەتتەن ىزدەدى. ول حالىقتىڭ بويىنداعى كەمشىلىكتەردى سىناپ قانا قويماي، ودان ارىلۋدىڭ جولىن دا كورسەتتى. اقىننىڭ ولەڭدەرى مەن قارا سوزدەرىندەگى تاعىلىمدى ويلار ادامدى ءوزىن-ءوزى جەتىلدىرۋگە، ءبىلىم ىزدەۋگە، ەڭبەك ەتۋگە، ادىلەت پەن ار-ۇياتتى بيىك قويۋعا ۇندەيدى.
اباي مۇراسىنىڭ ومىرشەڭدىگى دە وسىندا. حاكىمنىڭ ادام بولمىسى، مىنەز-قۇلىق، ءبىلىم مەن عىلىم، ەل بىرلىگى مەن قوعام جاۋاپكەرشىلىگى تۋرالى ويلارى بۇگىنگى زامانمەن دە ۇندەسىپ جاتىر. سوندىقتان ابايدى دارىپتەۋ – ۇلى تۇلعانىڭ ەسىمىن ۇلىقتاۋمەن عانا شەكتەلمەي، ونىڭ امانات ەتكەن قۇندىلىقتارىن كەيىنگى ۇرپاقتىڭ ساناسىنا ءسىڭىرۋ.
شارانىڭ جالعاسى «حاكىم اباي» مۋزەيىندە ءوربىدى. قاتىسۋشىلار مۋزەيگە ەكسكۋرسيا جاساپ، اقىننىڭ ءومىرى مەن شىعارماشىلىق جولىنا قاتىستى قۇندى جادىگەرلەرمەن تانىستى.
سونىمەن قاتار، «اباي الەمى» اشىق ەسىك كۇنى ۇيىمداستىرىلىپ، كەلۋشىلەر نازارىنا «ابايدىڭ اسىل مۇراسى»، «كوركەم الەمدەگى اباي» جانە «ابايدى وقى، تاڭىرقا!» اتتى كورمەلەر ۇسىنىلدى. كورمەلەردە اقىننىڭ ادەبي مۇراسى، شىعارماشىلىعى مەن رۋحاني الەمىن تانىتاتىن قۇندى دۇنيەلەر كوپشىلىك نازارىنا ۇسىنىلدى.
مادەني-تانىمدىق شارا بارىسىندا ابايدىڭ ولەڭدەرى مەن قارا سوزدەرىندەگى تەرەڭ فيلوسوفيالىق ويلار، ادامگەرشىلىك قاعيدالار مەن ۇلتتىق قۇندىلىقتار كەڭىنەن ناسيحاتتالدى.
حاكىم ابايدىڭ مۇراسى – ءبىر ءداۋىردىڭ ەنشىسىندە قالعان رۋحاني قازىنا ەمەس، ۇلتپەن بىرگە جاسايتىن ماڭگىلىك قۇندىلىق. ونى وقۋ، ءتۇسىنۋ جانە كەيىنگى ۇرپاققا جەتكىزۋ – بۇگىنگى قوعامنىڭ دا ورتاق مىندەتى.
