15 تامىز – قازاقستاننىڭ حالىق ءارتىسى، كورنەكتى كومپوزيتور، «قازاق ءۆالسىنىڭ كورولى» اتانعان ءشامشى قالداياقوۆتىڭ تۋعان كۇنى. وسى ايتۋلى داتاعا وراي شىمكەنت قالاسىنداعى ء«شامشى الەمى» گۇلزارىندا «باقىت قۇشاعىندا» اتتى گالا-كونتسەرت ءوتتى.
مەرەكەلىك ءىس-شارادا قالا اكىمىنىڭ ورىنباسارى سارسەن قۇرانبەك پەن قالالىق ارداگەرلەر كەڭەسىنىڭ توراعاسى كەنجەحان تولەباەۆ باستاعان ءبىر توپ زيالى قاۋىم وكىلدەرى الدىمەن ء«شامشى الەمى» گۇلزارىندا ورنالاسقان ءشامشى قالداياقوۆ ەسكەرتكىشىنە گۇل شوقتارىن قويدى. 
ءشامشى قالداياقوۆتىڭ مول مۇراسىن ۇلىقتاعان كەش قازاقستان رەسپۋبليكاسىنىڭ مەملەكەتتىك ءانۇرانىن ورىنداۋمەن باستالدى. ودان كەيىن ءان ساڭلاعىنىڭ قازاق مۋزىكاسىنىڭ التىن قورىنان ورىن العان “تەرىسكەي”، “قۇشاق جايعان قانداي ادام”، “قايىقتا”، «ارىس جاعاسىندا»، «انا تۋرالى جىر»، “ ءانىم سەن ەدىڭ”، “قايداسىڭ؟”، “وتىرارداعى توي”، “شىنارىم”، “اقماڭدايلىم»، «باقىت قۇشاعىندا»، «سىر سۇلۋى»، «دۇڭگەن قىزى»،«سىعان سەرەناداسى» سىندى تۋىندىلارى شىرقالدى. 
ءشامشى قالداياقوۆ – ۇلتتىق مۋزىكا ونەرىندە وزىندىك ورنەگىن قالىپتاستىرعان بىرەگەي تۇلعا. ونىڭ اۋەندەرىنەن قازاق دالاسىنىڭ كەڭ تىنىسى، حالىقتىڭ قۋانىشى مەن مۇڭى، ساعىنىشى مەن ماحابباتى، تۋعان جەرگە دەگەن پەرزەنتتىك سەزىمى ايقىن اڭعارىلادى. سوندىقتان دا كومپوزيتور تۋىندىلارى ۋاقىت وتكەن سايىن كومەسكىلەنبەي، قايتا ءار بۋىننىڭ جۇرەگىنە جول تاۋىپ كەلەدى.
گالا-كونتسەرت بارىسىندا ونەرپازدار قازاق ۇلتتىق اسپاپتار وركەسترىنىڭ جانە قالالىق وپەرا جانە بالەت تەاترى سيمفونيالىق وركەسترىنىڭ سۇيەمەلدەۋىمەن كومپوزيتوردىڭ كوپشىلىككە كەڭىنەن تانىمال شىعارمالارىن جاندى داۋىستا ورىندادى. اسەم انگە بولەنگەن ء«شامشى الەمى» كورەرمەنگە ەرەكشە كوڭىل-كۇي سىيلادى. 
ساحنادا شىرقالعان ءار شىعارما قالا تۇرعىندارى مەن قوناقتارىن ءشامشى قالداياقوۆ ءومىر سۇرگەن داۋىرگە جەتەلەپ، قازاق ءان ونەرىنىڭ قايتالانباس الەمىنە بويلاتتى. ءبىرى تۋعان جەرگە دەگەن ساعىنىشتى جەتكىزسە، ءبىرى ماحاببات سىرىن اقتاردى، ەندى ءبىرى اناعا دەگەن پەرزەنتتىك سەزىمدى اسقاقتاتتى. وسىلايشا، كەشتە ورىندالعان اندەر كومپوزيتور مۇراسىنىڭ ۋاقىت وتكەن سايىن جاڭعىرىپ، ۇرپاقتان-ۇرپاققا جالعاسىپ، حالىقپەن بىرگە جاساي بەرەتىنىن تاعى ءبىر مارتە ايعاقتادى.
