ساۋد ارابياسىنىڭ ەنەرگەتيكالىق ينفراقۇرىلىم نىساندارىنىڭ بىرىنە شابۋىل جاسالىپ، ءورت شىقتى. وقيعا ەلدىڭ شىعىسىنداعى دجۋبايل قالاسىندا بولعانى تۋرالى اقپارات تارادى, دەپ حابارلايدى "ادىرنا".
الدىن الا مالىمەت بويىنشا، شابۋىلدى يەمەندەگى يران قولدايتىن «انسار اللاح» قوزعالىسى – حۋسيتتەر جاساعان. جەرگىلىكتى دەرەككوزدەر ەنەرگەتيكالىق نىسانداردىڭ بىرىندە قۋاتتى جارىلىس بولىپ، كەيىن ءورت شىققانىن حابارلاعان.
ساۋد ارابياسىنىڭ ەنەرگەتيكا مينيسترلىگى مەملەكەتتىك مۇناي كومپانياسى Aramco-نىڭ جيزان قالاسىنداعى نىساندارىنىڭ بىرىنە شابۋىل جاسالعانىن راستادى.
ۆەدومستۆو مالىمەتىنشە، جەكسەنبى كۇنى تاڭەرتەڭ نىساندا شىققان ءورت باقىلاۋعا الىنىپ، ءورت سوندىرۋشىلەر تاراپىنان تولىق سوندىرىلگەن. الدىن الا اقپارات بويىنشا، وقيعا سالدارىنان زارداپ شەككەندەر جوق.
شابۋىلدىڭ ناقتى قانداي قارۋمەن جاسالعانى جانە نىسانعا قانشالىقتى زالال كەلگەنى ازىرگە ناقتىلانباعان.
وقيعا تۇركيا، ساۋد ارابياسى جانە پاكىستان اراسىندا قاۋىپسىزدىك جونىندەگى كەلىسىمگە قول قويىلعاننان ەكى كۇن وتكەن سوڭ بولدى.
ساۋد ارابياسى بۇعان دەيىن دە حۋسيتتەردىڭ زىمىران جانە درون شابۋىلدارىنا ۇشىراعان. ايماقتاعى قاقتىعىستاردىڭ كۇشەيۋى تاياۋ شىعىستاعى ەنەرگەتيكالىق ينفراقۇرىلىمنىڭ قاۋىپسىزدىگىنە قاتىستى الاڭداۋشىلىقتى ارتتىرىپ وتىر.
