تۇركىستان وبلىسىنىڭ اكىمى نۇرالحان كوشەروۆ جۇمىس ساپارىمەن ورداباسى اۋدانىنا بارىپ، شۇبار اۋىلىندا ورنالاسقان «QAGAZPROM» جشس-ءنىڭ قاعاز جانە كارتون قالدىقتارىن قايتا وڭدەيتىن زاۋىتتىڭ كاپسۋلاسىن سالۋ راسىمىنە قاتىستى. بۇل تۋرالى وبلىس اكىمدىگىنىڭ ءباسپاسوز قىزمەتى ايتتى، دەپ حابارلايدى «ادىرنا» ءتىلشىسى.
جوبانىڭ ينۆەستيتسيالىق قۇنى 1 ملرد تەڭگەنى قۇرايدى. نىسان 5 گەكتار اۋماقتا ورنالاسقان. جوبا ىسكە قاسقان جاعدايدا 20 جاڭا جۇمىس ورنىن اشۋ كوزدەلگەن.
«زاۋىت جىلىنا 5 875 توننا ءونىم وندىرۋگە قاۋقارلى. اتاپ ايتساق، مۇندا تاۋلىگىنە 190 مىڭ دانا جۇمىرتقا لوتوگى، ستاقان ۇستاعىش جانە اياق كيىم كارتونى سىندى ونىمدەر شىعارىلادى دەپ جوسپارلانۋدا. وندىرىلگەن ءونىمنىڭ 70 پايىزى ىشكى نارىققا، قالعان 30 پايىزى سىرتقى ەكسپورتقا باعىتتالادى»،– دەلىنگەن حابارلامادا.
بۇگىنگى كۇنى نىساندا ىرگەتاس قالاۋ جانە قازانشۇڭقىردى دايىنداۋ جۇمىستارى جۇرگىزىلۋدە. جىل سوڭىنا دەيىن زاۋىت عيماراتىن جەڭىل مەتالل كونسترۋكتسيالار مەن سەندۆيچ-پانەلدەردەن تۇرعىزۋ جوسپارلانعان. اكىمدىك مالىمەتىنشە، قاجەتتى قۇرال-جابدىقتار قىتايدان اكەلىنۋدە.
