الماتىدا اۆتوبۋس پەن جاياۋ جۇرگىنشىنىڭ قاتىسۋىمەن جول-كولىك وقيعاسى بولدى، دەپ حابارلايدى «ادىرنا» ءتىلشىسى.
ادام ولىمىنە اكەلگەن وقيعاسىنىڭ كادرلارى Instagram جەلىسىندەگى 100baksoff پابليگىندە جاريالاندى.
قالالىق پد مالىمەتىنشە، جول-كولىك وقيعاسى 12 تامىز كۇنى ساعات 12:20-دا بوستاندىق اۋدانىندا بولعان.
«جەكە تاسىمالداۋشىعا تيەسىلى اۆتوبۋستىڭ جۇرگىزۋشىسى مۇستافين كوشەسىمەن وڭتۇستىك باعىتتا كەلە جاتىپ، كوشەنى شىعىس باعىتتا كەسىپ ءوتىپ بارا جاتقان 1996 جىلى تۋعان جاياۋ جۇرگىنشى قىزدى قاعىپ كەتكەن. وكىنىشكە قاراي، جاياۋ جۇرگىنشى العان جاراقاتتارىنىڭ سالدارىنان وقيعا ورنىندا قازا تاپتى»، – دەدى پد.
اتالعان فاكتى بويىنشا قىلمىستىق ءىس قوزعالعان. قازىرگى ۋاقىتتا تەرگەۋ امالدارى جۇرگىزىلىپ، وقيعانىڭ بارلىق ءمان-جايى انىقتالۋدا.
ۇقساس جاڭالىقتار
