سوڭعى ۋاقىتتا وتاندىق تەلەكورەرمەندەردىڭ تالعامى وزگەرىپ، تانىمدىق ماڭىزى بار ساراپتامالىق جوبالارعا دەگەن سۇرانىسى ارتتى. ەلىمىزدەگى ساياسي جانە قوعامدىق وزگەرىستەر تۇسىندا «Qazaqstan» ۇلتتىق تەلەارناسىنىڭ بىرقاتار باعدارلاماسى اۋديتوريا جيناۋ جاعىنان جوعارى كورسەتكىشتەرگە قول جەتكىزدى.
اسىرەسە، كورەرمەننىڭ ىقىلاسىنا بولەنىپ، ءوسىم كورسەتكەن ءۇش نەگىزگى جوبانى بولە-جارا ايتۋعا بولادى:
«الەم جانە ءبىز» – الەمدىك ساياساتتىڭ قازاقستانعا اسەرىن تالدايتىن جوبا. ءساۋىردىڭ ورتاسىنان بەرى اۋديتورياسى 1,5 ەسە ءوستى.
حالىقارالىق جاعدايدىڭ ۋشىعۋى، سونىڭ ىشىندە اقش پەن يران اراسىنداعى تەكەتىرەس، ورمۋز بۇعازىنداعى احۋال، مۇناي باعاسى مەن وسىنداي شىرعالاڭ زامانداعى ديپلوماتيالىق ساياسات ەفيردە ەگجەي-تەگجەيلى تالدانادى.
«ىزگىلىك فورمۋلاسى» ازاماتتىق جاۋاپكەرشىلىك پەن يگى ىستەردى ناسيحاتتايدى. جاقسىلىق جاساۋ دەگەن تەك بىرەۋگە ءۇي سالىپ بەرۋ نەمەسە قارجىلاي كومەكتەسۋمەن شەكتەلمەيدى. ىزگىلىكتىڭ فورمۋلاسى وتە كوپ.
باعدارلاما قوعامعا پايداسىن تيگىزىپ جۇرگەن قاراپايىم ازاماتتاردى ۇلگى ەتەدى ء ارى پرەزيدەنت ۇسىنعان «ادال ازامات» جانە «تازا قازاقستان» قاعيداتتارىمەن ۇندەسەدى. ماۋسىمنىڭ سوڭىنان بەرى اۋديتورياسى ەكى ەسەدەن استام ارتتى. 
«Qazaq Creative» – كرەاتيۆتى يندۋستريا مەن ۇلتتىق الەۋەتتى تانىتاتىن جوبا. مامىر سوڭىندا ەفيرگە شىققان باعدارلامانىڭ اۋديتورياسى شىلدەدەن بەرى 2,5 ەسەدەن استام ءوستى.
مادەني كاسىپكەرلىك پەن وتاندىق ونەردىڭ ەكونوميكالىق الەۋەتىن اشىپ كورسەتەتىن حابار كورەرمەننىڭ، اسىرەسە جاستاردىڭ ۇلكەن قىزىعۋشىلىعىن تۋدىردى.
تەلەارنا جوبالارىنىڭ اۋديتوريالىق ءوسىمى ەلىمىزدەگى اۋقىمدى ساياسي جانە قوعامدىق وزگەرىستەر كەزەڭىندە ورىن الدى. بۇل حالىقتىڭ تەك كۇندەلىكتى جاڭالىقتاردى تاماشالاپ قانا قويماي، ەلدىڭ بولاشاعى مەن دامۋىن، ازاماتتىق جاۋاپكەرشىلىك پەن ۇلتتىق قۇندىلىقتاردى كورسەتەتىن تەرەڭ مازمۇندى باعدارلامالارعا باسىمدىق بەرە باستاعانىن ايقىن دالەلدەيدى.
