جاڭا وقۋ جىلىنىڭ باسىنا تامان الماتىدا ستۋدەنتتەرگە ارناپ جاتاقحانادا، حوستەلدە، قوناق ءۇي مەن جوعارى وقۋ ورنىنىڭ قايتا جابدىقتالعان عيماراتىندا جالپى سانى 61,2 مىڭ ورىن دايىنداپ قويادى. سوڭعى ءبىر جىلدا ستۋدەنتتىك جاتاقحاناداعى ورىن تاپشىلىعى 23,7 مىڭنان 5,7 مىڭعا دەيىن، ياعني شامامەن ءتورت ەسەگە قىسقاردى.
وڭىرلىك كوممۋنيكاتسيالار قىزمەتىندە وتكەن بريفينگتە الماتىنىڭ جاستار ساياساتى باسقارماسىنىڭ باسشىسى ازيز قاجدەنبەك قالاعا باسقا وڭىردەن كەلەتىن ستۋدەنتتەردى ورنالاستىرۋعا قالاي قام جاساپ جاتقاندارىن ايتىپ بەردى.
الماتى ەلىمىزدەگى ەڭ ۇلكەن ءبىلىم بەرەتىن ورتالىق. قازىر قالاداعى 35 جوعارى وقۋ ورنىندا 221 مىڭ ستۋدەنت ءبىلىم الىپ جاتىر. ونىڭ 149 مىڭى باسقا وڭىردەن كەلگەن. باسپاناعا دا وسى ساناتتاعى ستۋدەنتتەر كوبىرەك مۇقتاج.
ازيز قاجدەنبەكتىڭ ايتۋىنشا، ستۋدەنتتىك تۇرعىن ۇيگە دە سۇرانىس ارتقان. بيىل 30 094 مەملەكەتتىك ءبىلىم بەرۋ گرانتى ءبولىنىپتى. بۇل بىلتىرعىمەن سالىستىرعاندا 700-گە، 2024 جىلمەن سالىستىرعاندا 1 600-گە كوپ. سونىمەن قاتار جوعارى وقۋ ورنىنىڭ اقىلى بولىمىنە قۇجات قابىلداۋ 28 تامىزعا دەيىن جالعاساتىندىقتان، ستۋدەنتتەردىڭ ناقتى سانى ءالى ناقتىلانىپ جاتىر.
ء«بىز قازىردىڭ وزىندە ىقتيمال سۇرانىستى ەسكەرە وتىرىپ، دايىندىق جۇمىسىن جۇرگىزىپ جاتىرمىز. سوڭعى ءبىر جىلدا جاتاقحانا ورنىنىڭ تاپشىلىعى ەداۋىر ازايدى. 2025 جىلى 23,7 مىڭ ورىن تاپشى بولسا، بيىل بۇل كورسەتكىش 5,7 مىڭعا دەيىن تومەندەپ، ءتورت ەسەدەي ازايىپ وتىر، – دەيدى ازيز قاجدەنبەك.
تاپشىلىقتىڭ ازايۋىنا بىرنەشە جاعداي اسەر ەتكەن. 47 مىڭداي تۇلەك جاتاقحاناداعى ورنىن بوساتىپ، گرانتتى قايتا ءبولىپتى. سونىمەن قاتار قالادا جاڭا ستۋدەنتتەر ءۇيى دە اشىلا باستادى. قازىر الماتىدا 136 ستۋدەنتتىك جاتاقحانا جۇمىس ىستەيدى. ونىڭ 43-ءى 2023 جىلدان بەرى پايدالانۋعا بەرىلگەن. بىلتىر رەكوردتىق كورسەتكىشكە – 4,5 مىڭ توسەك-ورىنعا قول جەتكىزىپتى. قازىر جاتاقحانادا 46,2 مىڭ ستۋدەنت تۇرادى. بۇل بىلتىرعىدان 6 مىڭعا كوپ.
جىلدىڭ سوڭىنا دەيىن قالادا تاعى 4 658 ورىنعا ارنالعان 13 نىسان اشىلماقشى. 287 ورىندىق ەكى جاتاقحانا قايتا جاڭعىرتۋدان كەيىن پايدالانۋعا بەرىلەدى. 4 371 ستۋدەنتكە ارنالعان تاعى 11 جاڭا عيمارات بار اراسىندا. سونىمەن قاتار قالا بالاما تۇرعىن ءۇي قورىن دا كەڭەيتىپ جاتىر. حوستەلدەر مەن قوناق ۇيدە ستۋدەنتتەرگە قازىردىڭ وزىندە 11 مىڭ ورىن قاراستىرىلعان. ءبىر جىل بۇرىن بۇل كورسەتكىش 9 مىڭ ورىن بولىپتى.
قوسىمشا قوردى ۋنيۆەرسيتەتتەردىڭ ءوزى دە ىزدەستىرىپ جاتىر. بوس تۇرعان اكىمشىلىك عيماراتتار مەن باسقا دا نىسانداردى ستۋدەنتتەرگە ارناپ قايتا بەيىمدەي باستادى. وسى ارقىلى تاعى 4 مىڭ ورىن دايىنداۋ جوسپارلانعان.
«1 قىركۇيەككە دەيىن الماتىدا بارلىعى 61,2 مىڭ ورىن دايىن بولادى. بۇل – جاتاقحانالار، حوستەلدەر، قوناقۇيلەر مەن جوعارى وقۋ ورىندارىنىڭ ىشكى رەزەرۆتەرى. بيىل ستۋدەنتتەرگە ۇسىنا الاتىن جالپى تۇرعىن ءۇي قورى – وسى»، – دەدى جاستار ساياساتى باسقارماسى باسشىسى.
جاڭا جاتاقحانا سالۋدىڭ تاعى ءبىر باعىتى – ينۆەستورلار تارتۋ. 2023 جىلدان باستاپ اكىمدىك باستاماسىمەن الماتىدا جوبالىق كەڭسە جۇمىس ىستەيدى. ونىڭ ماماندارى ينۆەستورلارعا قولداۋ كورسەتىپ، رۇقسات بەرەتىن قۇجاتتارىن راسىمدەۋگە، ستۋدەنتتىك جاتاقحانا سالۋعا بەرىلەتىن نەسيەلەر بويىنشا پايىزدىق مولشەرلەمەنى سۋبسيديالاۋ تەتىگىن تۇسىندىرۋگە كومەكتەسەدى.
جاپپاي ورنالاسار كەزدە قالادا كونسۋلتاتسيالىق ورتالىقتىڭ دا جۇمىسى كۇشەيدى. 10 تامىزدان باستاپ قازاق ۇلتتىق قىزدار پەداگوگيكالىق ۋنيۆەرسيتەتىنىڭ بازاسىندا، بوگەنباي باتىر كوشەسى، 142 مەكەنجايىندا سيتۋاتسيالىق ورتالىق جۇمىس ىستەيدى. ونىڭ جانىندا تاۋلىك بويى ىستەيتىن كولل-ورتالىق بار. وعان تاۋلىگىنە 1,5 مىڭنان استام قوڭىراۋ تۇسەدى. كەڭەس الۋ ءۇشىن مىنا نومىرگە حابارلاسىڭىز: +7 700 950 95 28, +7 727 237 01 70.
ستۋدەنتتەرگە قاي جەردە ورنالاسۋعا بولاتىنى، جاتاقحاناعا قالاي ءوتىنىش بەرۋ كەرەكتىگى، ورىن بەرىلمەگەن جاعدايدا نە ىستەۋ قاجەت ەكەنى جانە قيىن جاعدايدا قايدا جۇگىنۋ كەرەكتىگىن تۇسىندىرەدى. وسىنداي ورتالىقتار الماتىداعى بارلىق جوعارى وقۋ ورنىنىڭ جانىندا جۇمىس ىستەيدى.
تاعى ءبىر شارا – قونىستانۋ كۇندەرى قانداي دا ءبىر سەبەپپەن باسپاناسىز قالعان ستۋدەنتتەرگە ۋاقىتشا تۇرعىن ءۇي ۇسىنۋ. 22 تامىزدا ALT University-ءدىڭ №1 ستۋدەنتتەر ۇيىندە، ماۋلەنوۆ كوشەسى، 108ا مەكەنجايىندا 50 ورىندىق داعدارىس ورتالىعى اشىلادى.
«ەگەر ستۋدەنت قونىستانۋ كۇنى قانداي دا ءبىر سەبەپپەن باسپاناسىز قالسا، ءبىز ونى جالعىز قالدىرمايمىز. ونى ۋاقىتشا ورنالاستىرىپ، كەيىن تۇراقتى تۇراتىن جەر تابۋعا كومەكتەسەمىز»، – دەپ اتاپ ءوتتى ازيز قاجدەنبەك.
ستۋدەنتتەردى جاتاقحاناعا ورنالاستىرۋ 25 تامىزدا، جوعارى وقۋ ورنىنداعى وقۋ پروتسەسى 1 قىركۇيەكتە باستالادى. وسى كەزەڭدە قالانىڭ بارلىق جاۋاپتى قىزمەتى كۇشەيتىلگەن جۇمىس رەجيمىنە كوشەدى. سونىمەن قاتار قالادا بوس ورىنداردىڭ سانى عانا ەمەس، ستۋدەنتتەردىڭ جاتىن جەرى دە باقىلاۋدا بولادى. جاتاقحانانى جىل سايىن ەكى كەزەڭ بويىنشا قوعامدىق ۇيىمداردىڭ وكىلدەرى، دەپۋتاتتار، ۇكىمەتتىك ەمەس ۇيىمدار مەن ەرىكتىلەر تەكسەرىپ تۇرادى.
بيىل باقىلاۋدىڭ ءبىرىنشى كەزەڭى 30 ماۋسىم مەن 3 شىلدە ارالىعىندا ءوتتى. تەكسەرۋ قورىتىندىسى بويىنشا بولمەدەگى ىلعالدىلىق، جيھازدىڭ توزۋى، سانيتارلىق-گيگيەنالىق جاعداي، سۋ مەن سانتەحنيكانىڭ اقاۋى، تەرەزە مەن ەسىكتىڭ جاي-كۇيى، سونداي-اق اباتتاندىرۋ مەن جاتاقحانانى كۇتىپ ۇستاۋ سياقتى التى نەگىزگى ماسەلە انىقتالىپتى.
ءار ەسكەرتۋ بويىنشا جوعارى وقۋ ورنىنا ءتيىستى ۇسىنىس بەرىلدى. قازىرگى ۋاقىتتا انىقتالعان كەمشىلىكتەر بەكىتىلگەن كەستەگە سايكەس جويىلىپ جاتىر.
تەكسەرۋدىڭ ەكىنشى كەزەڭى 18-25 تامىز ارالىعىندا ءوتى جاتىر. ماماندار بۇعان دەيىن انىقتالعان كەمشىلىكتىڭ جويىلعان-جويىلماعانىن تەكسەرىپ، جاتاقحانانىڭ جاڭا وقۋ جىلىنا دايىندىعىنا قورىتىندى جاسايدى.
ء«بىز قاجەتتى ورىن سانىن قامتاماسىز ەتىپ قانا قويماي، ستۋدەنتتەردىڭ جاتىن جەرى قانادي ەكەنىنە دە قارايمىز. جاتاقحانالاردىڭ جاعدايىنا قاتىستى بىردە-ءبىر ەسكەرتۋ نازاردان تىس قالمايدى»، – دەدى سپيكەر.
جاستار ساياساتى باسقارماسىنىڭ مالىمەتىنشە، قازىرگى تاڭدا الماتىداعى ستۋدەنتتەردى ورنالاستىرۋ جاعىن باقىلاۋدا ۇستاپ وتىر. قالا بيلىگى بيىلعى وقۋ جىلىنداعى قاجەتتىلىكتى تولىق قامتاماسىز ەتىپ قانا قويماي، الداعى جىلدارى ستۋدەنتتەر سانى مەن تۇرعىن ۇيگە دەگەن سۇرانىستىڭ ءوسۋىن الدىن الا ەسكەرۋگە مۇمكىندىك بەرەتىن جۇيە قالىپتاستىرۋدى جوسپارلاپ وتىر.
«1 قىركۇيەككە دەيىن بارلىق قاجەتتى شارانى قابىلداپ، باسقا وڭىردەن كەلگەن باسپاناعا مۇقتاج ءار ستۋدەنتتىڭ قولجەتىمدى ءارى جايلى تۇرعىن ۇيگە قول جەتكىزۋىن قامتاماسىز ەتۋ مىندەتىمىز»، – دەپ تۇيىندەدى ازيز قاجدەنبەك.
