قازاقستاننىڭ ايەلدەر اراسىنداعى جەكەلەي سىنداعى ءبىرىنشى راكەتكاسى ەلەنا رىباكينا تسينتسينناتيدە ءوتىپ جاتقان WTA 1000 ساناتىنداعى حارد تۋرنيرىندە كەزەكتى جەڭىسىنە قول جەتكىزدى. بۇل تۋرالى قازاقستان تەننيس فەدەراتسياسى جازدى، دەپ حابارلايدى «ادىرنا» ءتىلشىسى.
الەمدىك رەيتينگتە ەكىنشى ورىندا تۇرعان قازاقستاندىق تەننيسشى ءتورتىنشى اينالىمدا دۇنيەجۇزىلىك رەيتينگتىڭ 14-ساتىسىنداعى رەسەيلىك ديانا شنايدەرمەن كەزدەستى.
اۋا رايى جاعدايىنا بايلانىستى ماتچتىڭ باستالۋى كەيىنگە شەگەرىلدى. ناتيجەسىندە كەزدەسۋ ەكى سەتكە سوزىلىپ، رىباكينانىڭ 6:4, 6:4 ەسەبىمەن جەڭىسىمەن اياقتالدى.
تەننيسشىلەر كورتتا 1 ساعات 27 مينۋت وتكىزدى. وسى ۋاقىت ىشىندە قازاقستاندىق سپورتشى سەگىز ەيس جاساپ، ءتورت قوس قاتەلىككە جول بەردى جانە ءۇش برەيك-پوينتتىڭ ەكەۋىن ءساتتى پايدالاندى. سونىمەن قاتار رىباكينا ماتچ بارىسىندا ءوز گەيمىن بىردە-ءبىر رەت قارسىلاسىنا بەرمەدى.
شيرەك فينالدا رىباكينا الەمنىڭ بەسىنشى راكەتكاسى، پولشالىق يگا شۆيونتەكپەن كەزدەسەدى. وتكەن اپتادا تەننيسشىلەر كاناداداعى تورونتو قالاسىندا وتكەن الدىڭعى WTA 1000 ءتۋرنيرىنىڭ فينالىندا ءوزارا ويناعان بولاتىن. ول كەزدەسۋدە قازاقستاندىق تەننيسشى 2:6, 3:6 ەسەبىمەن جەڭىلىس تاپتى.
