يوردانيا حاشيميت كورولدىگى تاۋەلسىز سايلاۋ كوميسسياسىنىڭ كوميسسارلار كەڭەسىنىڭ مۇشەسى، حالىقارالىق باقىلاۋشى – بۋشرا ابۋ شۋحۋت قازاقستان استاناسىنداعى سايلاۋ ۋچاسكەلەرىن ارالادى.
بايقاۋشى سايلاۋ ۋچاسكەلەرىنىڭ تەحنيكالىق جابدىقتالۋ دەڭگەيىن، سايلاۋشىلاردى سايكەستەندىرۋ ۇدەرىسىنىڭ جولعا قويىلعانىن جانە ينكليۋزيۆتىلىككە ەرەكشە كوڭىل بولىنگەنىن ءمالىم ەتتى. ونىڭ ايتۋىنشا، ۋچاسكەلەردە ەرەكشە قاجەتتىلىكتەرى بار ازاماتتار ءۇشىن بارلىق جاعداي جاسالعان. سونداي-اق، كەزەكتىڭ الدىن الۋ ماقساتىندا سايلاۋشىلار ءتىزىمىنىڭ ءالىپبي رەتىمەن ءبولىنۋى لوگيستيكانىڭ جان-جاقتى ويلاستىرىلعانىن كورسەتەتىنىن ايتتى.
«مەن حالىقارالىق بايقاۋشى رەتىندە بۇعان دەيىن دە بىرنەشە رەت جۇمىس ىستەدىم، الايدا قازاقستانعا العاش رەت كەلىپ وتىرمىن. جاڭا كونستيتۋتسيا قابىلدانعاننان كەيىن ەلدە اۋقىمدى ساياسي رەفورمالاردىڭ تابىستى جۇزەگە اسىرىلىپ جاتقانىن كورىپ وتىرمىز. سونىڭ ءبىرى – جاڭا ءبىر پالاتالى پارلامەنت ۇلگىسىنە، ياعني قۇرىلتايعا كوشۋ. قازاقستاننىڭ پارلامەنتتىك جۇيەنى ترانسفورماتسيالاۋ تاجىريبەسى بىزدە شىنايى كاسىبي قىزىعۋشىلىق تۋدىرىپ وتىر. سوندىقتان ونى مۇقيات زەردەلەيتىن بولامىز» – دەدى ول.
باقىلاۋشىنىڭ ايتۋىنشا، ەكى ەلدىڭ سايلاۋ جۇيەسىندە ايىرماشىلىق بولعانىمەن (يوردانيادا ەكى پالاتالى پارلامەنت ساقتالعان), قازاقستان مەن يوردانيا حالىقتارىنىڭ ءدىلى ءبىر-بىرىنە وتە ۇقساس.
«بايقاۋ بارىسىندا بىرنەشە سايلاۋ ۋچاسكەسىن ارالاپ، ۇيىمداستىرۋشىلاردىڭ جوعارى كاسىبيلىگىنە كوز جەتكىزدىك. سايلاۋ كوميسسيالارىنىڭ مۇشەلەرى ءوز مىندەتتەرىن جەتىك بىلەدى جانە كەز كەلگەن سۇراققا تولىق جاۋاپ بەرە الادى. بارلىق ساناتتاعى ازاماتتارعا، سونىڭ ىشىندە مۇمكىندىگى شەكتەۋلى سايلاۋشىلارعا تەڭ جاعداي جاساۋدىڭ ەڭ جوعارى دەڭگەيدە قامتاماسىز ەتىلگەنىن ەرەكشە اتاپ وتكىم كەلەدى. قوناقجايلىق تانىتقانى ءۇشىن قر ورتالىق سايلاۋ كوميسسياسىنا زور العىسىمدى بىلدىرەمىن»، – دەدى بۋشرا ابۋ شۋحۋت.
شەتەلدىك باقىلاۋشى قازاقستانداعى سايلاۋ بارىسىنىڭ جوعارى مادەنيەتى مەن ءمىنسىز ۇيىمداستىرىلۋىنا دا ەرەكشە توقتالدى. ونىڭ باعالاۋىنشا، قازاقستان اشىقتىقتىڭ، دەموكراتيالىق قاعيداتتاردىڭ جانە زاڭ تالاپتارىن قاتاڭ ساقتاۋدىڭ وزىق ستاندارتتارىن كورسەتىپ وتىر. سونىمەن بىرگە، ول سايلاۋ كوميسسيالارىنىڭ ءمىنسىز جۇمىسى، ناقتى جولعا قويىلعان لوگيستيكا مەن زاماناۋي تەحنولوگيالاردى قولدانۋ بويىنشا قازاقستاننىڭ سايلاۋ وتكىزۋ تاجىريبەسىن حالىقارالىق دەڭگەيدە دە جوعارى باعالاناتىنىن جانە بارىنە بىردەي باعدارعا اينالاتىنىن ايتتى.
باقىلاۋشىنىڭ پىكىرىنشە، قازاقستان داۋىس بەرۋدى جوعارى دەڭگەيدە ۇيىمداستىرىپ، ەلدەگى ءاربىر ازاماتتىڭ سايلاۋ قۇقىعىنا شىنايى قۇرمەتپەن قارايتىنىن كورسەتىپ وتىر.
