تەكەلى قالاسىنداعى ەڭ ۇزىن د.قوناەۆ كوشەسىندە 23 تامىزدا وتەتىن قۇرىلتاي دەپۋتاتتارىن سايلاۋدى قولداۋ ماقساتىندا بۇقارالىق جۇگىرۋ ۇيىمداستىرىلدى. سالاۋاتتى ءومىر سالتىن ناسيحاتتاپ، تۇرعىنداردى بەلسەندى قوزعالىسقا شاقىرعان ءىس-شاراعا قالا تۇرعىندارى، جاستار، سپورتسۇيەر قاۋىم قاتىستى.
جاپپاي جۇگىرۋگە قاتىسۋشىلار د.قوناەۆ كوشەسىندەگى تەمىرجول وتكەلىنەن باستاپ، باقىلاۋ الاڭىنا دەيىنگى 2,5 شاقىرىم جولدى جۇگىرىپ ءوتتى. سپورتتىق شارا قالا تۇرعىندارىنا كوتەرىڭكى كوڭىل-كۇي سىيلاپ، دەنساۋلىققا پايدالى ادەتتى قالىپتاستىرۋدىڭ ماڭىزىن تاعى ءبىر مارتە ايقىندادى.
جاپپاي جۇگىرۋگە قاتىسقانداردىڭ ەڭ ۇلكەنى 55 جاستاعى قالالىق مادەنيەت ءۇيىنىڭ ادىسكەرلى فاريدا كوپەلدەسوۆا بولسا، ەڭ كىشىسى 12 جاستاعى جاس ورەن. جۇگىرۋگە قاتىسۋشىلار مارە سىزىعىن كەسىپ وتكەننەن كەيىن تەكەلى قالاسى ىشكى ساياسات ءبولىمىنىڭ باسشىسى نۇرجامال شوحانوۆا مەن «جەتىسۋ وبلىسىنىڭ بۇقارالىق سپورتتى دامىتۋ جانە سپورتتىق ءىس-شارالاردى وتكىزۋ سپورت كلۋبى» كمم تەكەلى قالالىق فيليالىنىڭ باسشىسى عالىمجان سۇلەيمەنوۆ كوپشىلىككە جىلى لەبىزدەرىن جەتكىزىپ، الدىڭعى قاتاردان كورىنگەن بەلسەندىلەردى ماراپاتتاپ، ەستەلىك سىيلىقتار تابىس ەتتى.
«شاپاعات» تەكەلى ارناۋلى الەۋمەتتىك كومەك كورسەتۋ ورتالىعىنىڭ قىزمەتكەرى ەرلان كوكەەۆ جۇگىرۋدىڭ ادام دەنساۋلىعىنا عانا ەمەس، قوعام بەلسەندىلىگىنە دە وڭ ىقپال ەتەتىنىن اتاپ ءوتتى.
– مەن سالاۋاتتى ءومىر سالتىن قولدايمىن. سوندىقتان جۇگىرۋ مارافونىنا قۇلشىنىسپەن قاتىستىم. ارامىزدا جاستاردىڭ كوپ بولعانى قۋانتتى. جاستار دا، ۇلكەندەر دە دەنساۋلىعى مىقتى بولۋى كەرەك. سوندا ەلگە پايدا تيگىزەتىن ءىس جاساي الادى. جالپى قوعامدىق ءىس-شارالارعا بەلسەنە قاتىسۋ كەرەك. الدىمىزدا ەلىمىزدىڭ دامۋىنداعى جاڭا كەزەڭ – قۇرىلتاي دەپۋتاتتارىن سايلاۋ تۇر. وعان دا ءبىر كىسىدەي قاتىسىپ، ازاماتتىق تاڭداۋىمىزدى جاساعانىمىز ءجون، – دەدى ول.
دەنى ساۋ ۇلت ەل دامۋىنىڭ وزەگى ەكەنى راس. ال قوعامدىق ومىرگە بەلسەندى ارالاسۋ – ازاماتتىڭ ەل الدىنداعى جاۋاپكەرشىلىگىن سەزىنۋدىڭ كورىنىسى. سپورتتىق ءىس-شارادا باس قوسقان قالا تۇرعىندارىنىڭ بەلسەندىلىگى دە وسىنى اڭعارتتى.
13 جاستاعى يۋليا چۋچاكينا:
– مەن جۇگىرۋ جارىسىنا اعاممەن بىرگە كەلدىم. №1 ورتا مەكتەبىنىڭ 8-سىنىبىندا وقيمىن. سپورتقا جانىم قۇمار. كاراتە ۇيىرمەسىنە قاتىسامىن. وسىنداي بۇقارالىق ءىس-شارالارعا قاتىسىپ، ۇلكەندەردەن ۇيرەنەرىم كوپ، – دەپ پىكىر ءبىلدىردى.
تەكەلدى جاپپاي جۇگىرۋ ءىس-شاراسى وتەتىنىن الەۋمەتتىك جەلىدەن كورىپ، اقسۋ اۋدانىنداعى اراسان اۋىلىنان بەس جاس سپورتشى كەلىپ قاتىستى. ولاردىڭ ەڭ كىشىسى 12 جاستاعى بىرەگەي قۇمار:
– ءبىزدى جەڭىل اتلەتيكادان جاتتىقتىراتىن اعايىمىز الىپ كەلدى. ءوزى دە جارىسقا قاتىستى. مەن مارە سىزىعىن ءتورتىنشى بولىپ كەسىپ، سىيلىققا يە بولدىم. تەكەلىدەگى ەڭ ۇزىن د.قوناەۆ كوشەسىنىڭ بويىمەن جۇگىرىپ كەلە جاتىپ، كەۋدەمدى ماقتانىش كەرنەدى. تۋعان جەرىمىزدىڭ وسىنداي تاماشا جەرلەرىن كورىپ، تانىپ، كەلەشەكتە ەلىمىزدىڭ مارتەبەسىن بيىكتەتۋگە كۇش سالۋىمىز كەرەك، – دەپ اسەرىمەن ءبولىستى.
ءدال وسىنداي سالاۋاتتى ءومىر سالتىن، بەلسەندى ازاماتتىق ۇستانىمدى جانە قوعامدىق بىرلىكتى ناسيحاتتايتىن يگى باستاما قالا تۇرعىندارىن ورتاق ىسكە جۇمىلۋعا جانە ەل ومىرىندەگى ماڭىزدى ماسەلەلەرگە بەيجاي قاراماۋعا ۇندەيدى.
تورعىن تۇرلىباەۆا
