وتاندىق تەلەراديو سالاسىنىڭ ارداگەرى، بەلگىلى تەلەجۋرناليست ءارى ۇستاز مارات يمانعاليۇلى ساندىقباەۆ 70 جاسقا قاراعان شاعىندا ومىردەن وزدى، دەپ حابارلايدى "ادىرنا".
قارالى حاباردى جۋرناليست بازارگۇل ۇمبەتوۆا الەۋمەتتىك جەلىدەگى پاراقشاسىندا جەتكىزىپ، مارقۇمنىڭ وتاندىق تەلەجۋرناليستيكاعا قوسقان ۇلەسىن اتاپ ءوتتى.
مارات ساندىقباەۆ ەڭبەك جولىن 1974-1975 جىلدارى جەزقازعان وبلىستىق تەلەۆيزياسىندا كينووپەراتور، كەيىن تەلەۆيزيا جانە راديو ديكتورى قىزمەتىنەن باستاعان. ۇزاق جىلدار بويى تەلەراديو سالاسىندا ەڭبەك ەتىپ، «قازاقستان» رترك» اق الماتى فيليالىنىڭ ديرەكتورى، سونداي-اق «قازاقستان ۇتا» باعدارلاماسىنىڭ ديرەكتورى قىزمەتتەرىن اتقاردى.
تەلەجۋرناليستىڭ شىعارماشىلىق ەڭبەگى دە جوعارى باعالانعان. ونىڭ «كىمسىڭ سەن، تولقىنبەك؟» اتتى اۆتورلىق تۋىندىسى وداقتىق بايقاۋدا ۇزدىك دەپ تانىلىپ، جۇلدەلى ورىنعا يە بولعان.
مارات يمانعاليۇلىنىڭ قايتىس بولۋىنا بايلانىستى «قازاقستان» رترك» اق باسقارما توراعاسى ەرنۇر بۋراحان ساندىقباەۆتار اۋلەتىنە كوڭىل ايتتى.
«مارات يمانعاليۇلى – ەلدىك ىسكە ادالدىعىمەن، بايىپتى بولمىسىمەن اينالاسىنا سىيلى تۇلعا، اردا ازامات ەدى. ءومىر جولىندا ابىرويلى ەڭبەك ەتىپ، ۇلتتىق تەلەۆيزيا سالاسىنىڭ دامۋىنا زور ۇلەس قوستى. ادامگەرشىلىگى مەن پاراساتى، ۇستازدىعى، سابىرلى مىنەزى مەن ىزگى قاسيەتتەرى جادىمىزدا ماڭگى ساقتالادى»، – دەدى ول.
ارىپتەستەرى مەن شاكىرتتەرى دە مارقۇمنىڭ ادامدىق قاسيەتى مەن ۇستازدىق ونەگەسىن ەسكە الدى. بازارگۇل ۇمبەتوۆانىڭ ايتۋىنشا، مارات ساندىقباەۆ باسشىلىق قىزمەتتە جۇرسە دە، قاراپايىمدىلىعىنان اينىماي، جاس جۋرناليستەرگە ءاردايىم باعىت-باعدار بەرىپ، قامقورلىق تانىتقان.
«باسشىمىن دەپ داۋىس كوتەرگەنىن مۇلدە ەستىمەپپىن. قاراپايىم قالپىندا جاڭا كەلگەن جاس جۋرناليستەرگە ءجون سىلتەپ، قامقور بولىپ جۇرەتىن»، – دەپ ەسكە الدى ول.
مارات ساندىقباەۆ قۇرمەتتى دەمالىسقا شىققانعا دەيىن ۇلتتىق تەلەۆيزيا سالاسىندا جەمىستى ەڭبەك ەتىپ، كەيىنگى بۋىن جۋرناليستەرىنە مول تاجىريبەسىن ۇيرەتتى.
مارقۇمنىڭ وتباسى مەن تۋعان-تۋىستارىنا، ارىپتەستەرى مەن شاكىرتتەرىنە كوڭىل ايتامىز.
