بىرىككەن اراب امىرلىكتەرىنىڭ شاردجا قالاسىندا ەكى قازاقستاندىق ايەل كوز جۇمدى، دەپ حابارلايدى «ادىرنا» ءتىلشىسى.
سىرتقى ىستەر مينيسترلىگى اقجان مەن جۇلدىز بوحانوۆالاردىڭ تۋعان-تۋىستارى مەن جاقىندارىنا كوڭىل ايتىپ، دۋبايداعى قازاقستاندىق ديپلوماتتاردىڭ ولاردىڭ وتباسىنا كومەك كورسەتىپ جاتقانىن مالىمدەدى.
«قازاقستاننىڭ دۋباي قالاسىنداعى باس كونسۋلدىعى بارلىق قاجەتتى كونسۋلدىق-قۇقىقتىق قولداۋ كورسەتۋدە. ونىڭ ىشىندە قۇجاتتاردى راسىمدەۋگە جانە ازاماتتاردىڭ قازا بولۋ ءمان-جايىنا بايلانىستى ءباا-ءنىڭ قۇزىرلى ورگاندارىمەن ءوزارا ءىس-قيمىل جاساۋعا جاردەم بەرىلۋدە. قازاقستان ازاماتتارىنىڭ قازا بولۋ سەبەپتەرىن ءباا-ءنىڭ ءتيىستى ورگاندارى انىقتاپ جاتىر»، – دەلىنگەن حابارلامادا.
تەرگەۋ مۇددەسىنە بايلانىستى وزگە مالىمەتتەر جاريالانعان جوق.
مارقۇمداردىڭ جاقىندارىنىڭ مالىمەتىنشە، 2004 جانە 2006 جىلى دۇنيەگە كەلگەن ەكى بويجەتكەن شاردجا قالاسىندا ەڭبەك ەتكەن. ولار تامىز ايىنىڭ سوڭىندا نەمەسە قىركۇيەك ايىنىڭ باسىندا ەلگە ورالماق بولعان. الايدا شامامەن ءبىر اپتا بۇرىن قىزدار تۋىستارىمەن بايلانىسقا شىقپاي قالعان.
