اقش مەملەكەتتىك حاتشىسى ماركو رۋبيو ۆاشينگتوننىڭ قازىرگى ۋاقىتتا يرانعا سوققى بەرمەيتىنىن ايتتى. بۇل تۋرالى Axios جازدى، دەپ حابارلايدى «ادىرنا» ءتىلشىسى.
«رۋبيو كەيبىر ارىپتەسىنە قازىرگى ۋاقىتتا ۆاشينگتوننىڭ يرانعا جاڭا سوققى جاسامايتىنىن ايتتى»، – دەدى ول.
باسىلىمنىڭ جازۋىنشا، قازىر اقش اكىمشىلىگى تەگەرانعا قىسىم جاساۋدىڭ باسقا ادىستەرىنە، سونىڭ ىشىندە سانكتسيالارعا باسىمدىق بەرىپ وتىر.
بۇعان دەيىن اقش يرانعا قارسى اۋقىمدى سانكتسيالار ەنگىزگەن بولاتىن. شەكتەۋلەر شامامەن 60 جەكە تۇلعا، كومپانيالار مەن كەمەلەردى، يادرولىق جانە زىمىران تەحنولوگيالارىن ساتىپ الۋ جەلىلەرىن، سونداي-اق مۇناي ساتۋدان تابىس تۇسىرەتىن جەلىلەردى قامتيدى.
اقش پەن يزرايل 28 اقپاندا يرانعا قارسى سوعىس قيمىلدارىن باستاعان ەدى. بۇعان جاۋاپ رەتىندە تەگەران ايماقتاعى امەريكالىق نىساندارعا جاپپاي سوققى بەرە باستادى. 18 ماۋسىمعا قاراعان ءتۇنى اقش پەن يران ايماقتاعى، سونىڭ ىشىندە ليۆانداعى اسكەري قيمىلداردى توقتاتۋدى كوزدەيتىن ءوزارا تۇسىنىستىك تۋرالى مەموراندۋمعا قول قويدى.
الايدا بۇل ءالسىز ءبىتىم 8 شىلدەگە دەيىن عانا ساقتالدى. سول كۇنى اقش ورمۇز بۇعازىن بۇعاتتان شىعارۋعا قاتىستى كەلىسىمدەردى تەگەران بۇزدى دەپ ايىپتاپ، يرانعا سوققىلارىن قايتا باستادى.
