ەۋروپالىق وداققا كىرۋ جونىندەگى كەلىسسوزدەر توقتاتىلعاننان كەيىن 13 جىل وتكەن سوڭ يسلانديا ولاردى قايتا باستاۋعا قارسى داۋىس بەردى. بۇل تۋرالى 30 تامىزدا BBC جازدى، دەپ حابارلايدى «ادىرنا» ءتىلشىسى.
مەملەكەتتىك RUV تەلەراديوكورپوراتسياسىنىڭ مالىمەتىنشە، 225 031 سايلاۋشىنىڭ 52,8 پايىزى ۇكىمەتتىڭ ۇسىنىسىن قولداماعان، ال 47,2 پايىزى ونى قولداپ داۋىس بەرگەن. داۋىس ايىرماشىلىعى شامامەن 12 600 بولعان.
پرەمەر-مينيستر كريسترۋن فروستادوتتير باستاعان سولشىل-ورتالىقشىل ۇكىمەت 2027 جىلعا دەيىن رەفەرەندۋم وتكىزۋدى ۋادە ەتكەن ەدى. الايدا الەمدەگى جاعدايعا، سونىڭ ىشىندە اقش پرەزيدەنتى دونالد ترامپتىڭ گرەنلاندياعا قاتىستى مالىمدەگەن قوقان-لوققىلارىنا بايلانىستى ونى ەرتەرەك وتكىزۋ تۋرالى شەشىم قابىلدانعان.
دەگەنمەن، حالقى 400 مىڭعا جۋىق بۇل ارال مەملەكەتىندە پىكىرتالاستار نەگىزىنەن قاۋىپسىزدىك ماسەلەلەرىنە ەمەس، بالىق شارۋاشىلىعى سالاسىنا قاتىستى وربىگەن.
RUV دەرەگىنشە، داۋىس بەرۋگە سايلاۋشىلاردىڭ 82,5 پايىزى قاتىسقان. بۇل — يسلانديادا 2009 جىلدان بەرى وتكىزىلىپ كەلە جاتقان سايلاۋداعى ەڭ جوعارى كورسەتكىش. ەلدە جالپى سانى شامامەن 270 مىڭ ازاماتتىڭ داۋىس بەرۋ قۇقىعى بار.
داۋىس بەرۋگە قويىلعان سۇراق: «يسلانديا ەۋروپالىق وداققا كىرۋ جونىندەگى كەلىسسوزدەردى قايتا باستاۋى ءتيىس پە؟» دەگەن مازمۇندا بولعان. ەگەر كوپشىلىك ء«يا» دەپ داۋىس بەرگەن جاعدايدا بۇل ەو-عا كىرۋ تۋرالى تۇپكىلىكتى شەشىم ەمەس، مۇشەلىك تۋرالى كەلىسىمگە قول جەتكىزۋ جولىنداعى قادام بولار ەدى. مۇنداي كەلىسىم كەيىن تاعى ءبىر رەفەرەندۋمدا ماقۇلدانۋى قاجەت.
سول سياقتى قارسى داۋىس بەرۋ دە يسلانديانىڭ بولاشاقتا كەلىسسوزدەردى قايتا باستاۋ مۇمكىندىگىن تولىق جوققا شىعارمايدى.
