ەۋروپالىق وداق ارمەنيادان كەلەتىن تاۋارلاردىڭ 80 پايىزىنا باج سالىعىن الىپ تاستايدى، دەپ حابارلايدى "ادىرنا" ۇلتتىق پورتالى.
بۇل تۋرالى ەۋروپالىق كوميسسيا توراعاسى ۋرسۋلا فون دەر ليايەن ەرەۆاندا حابارلادى.
ونىڭ ايتۋىنشا، جەڭىلدىك رەسەي شەكتەۋ قويعان ارميان تاۋارلارىنا دا قاتىستى بولادى. ونىڭ ىشىندە جاڭا پىسكەن جەمىستەر، سۋسىندار جانە الكوگول ونىمدەرى بار.
سونىمەن قاتار ەۋرووداق ارمەنياعا 52 ميلليون ەۋرو كولەمىندە قارجىلاي كومەك كورسەتەدى. قازىردىڭ وزىندە ونىڭ 34 ميلليون ەۋروسى اۋدارىلعان. قالعان قاراجات جاقىن ۋاقىتتا بەرىلەتىنى حابارلانعان.
ەۋروپالىق وداق بۇل قولداۋ ارمەنيانىڭ ەكونوميكاسىن دامىتۋعا جانە ەلدىڭ رەفورمالارىن جالعاستىرۋعا كومەكتەسەتىنىن ايتتى. سونداي-اق كولىك، ەنەرگەتيكا جانە تسيفرلىق بايلانىس سالالارىنداعى جوبالارعا قولداۋ كورسەتىلمەك.
بۇدان بولەك، ارمەنيا مەن ازەربايجانداعى جەرگىلىكتى قاۋىمداستىقتاردى دامىتۋ ءۇشىن تاعى 20 ميلليون ەۋرو بولىنەدى. بۇل قارجى دەنساۋلىق ساقتاۋ، مينادان تازارتۋ، كاسىبي ءبىلىم بەرۋ جانە شاعىن بيزنەستى قولداۋعا جۇمسالادى.
