ۋكراينانىڭ تۇركياداعى ەلشىسى ناريمان دجەليال قارا تەڭىزدە تۇركيامەن بايلانىستى كەمەلەرگە جاسالعان ەكى شابۋىلدان كەيىن تۇركيا سىرتقى ىستەر مينيسترلىگىنە شاقىرىلدى. بۇل تۋرالى 29 تامىزدا تۇركيا ءسىم وكىلدەرى Anadolu جانە AFP اگەنتتىكتەرىنە ايتتى، دەپ حابارلايدى «ادىرنا» ءتىلشىسى.
مينيسترلىك شابۋىلداردىڭ سول اپتاداعى سارسەنبى جانە بەيسەنبى كۇندەرى بولعانىن مالىمدەدى.
«كەزدەسۋ بارىسىندا تۇركيا قارا تەڭىزدەگى ادامداردىڭ، مۇلىكتىڭ، تەڭىز قاتىناسىنىڭ جانە قورشاعان ورتانىڭ قاۋىپسىزدىگىن قامتاماسىز ەتۋدىڭ اسا قاجەتتىگىن ەسكەرتتى»، – دەپ جازدى AFP.
مينيسترلىكتىڭ جۋرناليستەرگە تاراتقان مالىمدەمەسىنە سايكەس، تۇركيالىق Lider Bordo Maviكونتەينەر تاسىمالداۋشى كەمەسى سارسەنبى كۇنى رەسەيدىڭ قارا تەڭىز جاعالاۋىندا بولعان كەزدە شابۋىلعا ۇشىراعان. كەلەسى كۇنى كونتەينەر تاسىمالداۋشى كەمەنى سۇيرەپ اكەتۋگە جىبەرىلگەن Lider Kocatepe كەمەسىنە دە شابۋىل جاسالعان.
شابۋىلدار سالدارىنان زارداپ شەككەندەر بار-جوعى ناقتىلانبادى. تۇركيالىق باق-تىڭ حابارلاۋىنشا، كونتەينەر تاسىمالداۋشى كەمە تۇركيانىڭ قارا تەڭىز جاعالاۋىنداعى سامسۋن پورتىنا سۇيرەپ جەتكىزىلگەن.
8 تامىزدا تۇركيانىڭ سىرتقى ىستەر ءمينيسترى حاكان فيدان رەسەي مەن ۋكرايناعا قارا تەڭىزدەگى كەمەلەرگە شابۋىل جاساۋعا موراتوري ەنگىزۋ جونىندە كەلىسىم جاساۋدى ۇسىنعان. ول كەزدە انكارا بۇل ۇسىنىستى ەكى تاراپقا دا جەتكىزگەنىن جانە ولاردىڭ جاۋابىن كۇتىپ وتىرعانىن مالىمدەگەن.
فيداننىڭ ايتۋىنشا، تۇركيا ماسكەۋ مەن كيەۆتى قارا تەڭىزدەگى شابۋىلداردى توقتاتۋعا مۇمكىندىك بەرەتىن ارنايى تەتىك قۇرۋعا شاقىرعان. مينيستر مۇنداي ءوتىنىشتى بۇعان دەيىن ۋكراينا تاراپى دا بىلدىرگەنىن اتاپ وتكەن.
سول كەزدە فيدان تۇركيالىق كومپانيالارعا تيەسىلى كەمەلەرمەن قاتار، تۇركيالىق يەلەرى نەمەسە تۇركيا ازاماتتارى بار ەكيپاج مۇشەلەرى وتىرعان كەمەلەردىڭ دە شابۋىلعا ۇشىراپ جاتقانىن ايتقان.
سول اپتادا تۇركيا ءسىم تۇركيالىق كومپانيالارعا تيەسىلى ەكى كەمەگە دروندارمەن جاسالعان شابۋىل سالدارىنان ەكيپاج مۇشەلەرى، ونىڭ ىشىندە تۇركيا ازاماتتارى جاراقات العانىن حابارلادى. ال 4 تامىزدا تۇركيانىڭ سىرتقى ساياسات ۆەدومستۆوسى قارا تەڭىزدەگى شابۋىلدار سانىنىڭ ارتۋىنا بايلانىستى قاقتىعىسقا قاتىسۋشى بارلىق تاراپتى تەڭىز قاتىناسىنىڭ قاۋىپسىزدىگىن قامتاماسىز ەتۋ ءۇشىن دەرەۋ ناقتى شارالار قابىلداۋعا شاقىرعان.
