فوتو: kenesh.kg
قىرعىزستان جوگوركۋ كەنەشى ماقسات اساناليەۆتى مەملەكەتتىك ۇلتتىق قاۋىپسىزدىك كوميتەتىنىڭ (مۇقك) توراعاسى قىزمەتىنە تاعايىنداۋعا كەلىسىم بەردى. پارلامەنت دەپۋتاتتارى ءتيىستى شەشىمدى ءبىراۋىزدان ماقۇلدادى، دەپ حابارلايدى “ادىرنا”.
اتالعان ماسەلە الدىمەن جوگوركۋ كەنەشتىڭ بەيىندى كوميتەتىندە قارالعان. كوميتەت اساناليەۆتى قىرعىزستاننىڭ باس پروكۋرورى قىزمەتىنەن بوساتىپ، ونى مۇقك توراعاسى لاۋازىمىنا تاعايىنداۋ تۋرالى ۇسىنىستى قولدادى.
كەيىن كانديداتۋرا پارلامەنتتىڭ جالپى وتىرىسىنا شىعارىلىپ، دەپۋتاتتاردىڭ تولىق قولداۋىنا يە بولدى.
ەندى جوگوركۋ كەنەشتىڭ شەشىمى قىرعىزستان پرەزيدەنتى سادىر جاپاروۆقا جىبەرىلەدى. مەملەكەت باسشىسى اساناليەۆتى مۇقك توراعاسى ەتىپ تاعايىنداۋ تۋرالى ءتيىستى جارلىققا قول قويۋى ءتيىس.
ماقسات اساناليەۆ 2024 جىلدىڭ ماۋسىمىنان بەرى قىرعىزستاننىڭ باس پروكۋرورى قىزمەتىن اتقارعان. بيىل 30 ماۋسىمدا ول بۇل قىزمەتتەن كەتەتىنىن مالىمدەگەن. ارتىنشا سادىر جاپاروۆ ونى مۇقك توراعاسىنىڭ مىندەتىن اتقارۋشى ەتىپ تاعايىندادى.
ايتا كەتەيىك، بۇعان دەيىن قىرعىزستانداعى كۇشتىك قۇرىلىمدار جۇيەسىندە بىرقاتار كادرلىق اۋىس-ءتۇيىس بولعان. كەيىن مۇقك-ءنىڭ بۇرىنعى توراعاسى قامشىبەك تاشيەۆكە قاتىستى سوت ۇكىمى شىقتى.
