رەسەي مەن ۋكراينا اراسىنداعى قاقتىعىس ۋكرايناعا كۇنىنە شامامەن 450 ميلليون دوللار شىعىن اكەلەدى، دەپ حابارلايدى "ادىرنا".
بۇل تۋرالى ۋكراينا ءسىم اندرەي سيبيگا ايتتى.
ءمينيستردىڭ سوزىنشە، قازىر كيەۆ پەن ماسكەۋ اراسىنداعى بەيبىت كەلىسسوزدەر ۇدەرىسىندە ايتارلىقتاي ىلگەرىلەۋ جوق.
مينيستر ۋكراينا سوعىستى توقتاتۋعا دايىن ەكەنىن جانە شارتسىز بىتىمگە كەلۋدى قولدايتىنىن ايتتى. كيەۆ قازىرگى مايدان شەبىندە اتىستى توقتاتۋدى ۇسىنعان.
سونداي-اق ۋكراينا پرەزيدەنتتەر دەڭگەيىندە كەزدەسۋ وتكىزۋگە دايىن ەكەنىن مالىمدەدى. ءمينيستردىڭ سوزىنشە، سوعىستى توقتاتۋدا ديپلوماتيالىق كۇش-جىگەردى ارتتىرۋ قاجەت.
سونىمەن بىرگە كيەۆ ۋكراينا اۋماقتىق تۇتاستىعىنا نۇقسان كەلتىرەتىن كەز كەلگەن ۇسىنىستى قابىلدامايتىنىن اتاپ ءوتتى.
مينيستر سيبيگا جاقىن ۋاقىتتا اقش پرەزيدەنتىنىڭ ارنايى وكىلدەرى ۋكرايناعا كەلەتىنىن حابارلادى. ونىڭ ايتۋىنشا، امەريكالىق تاراپ ۋكرايناعا جاڭا ۇسىنىستار پاكەتىن ۇسىنعان. قازىر كيەۆ بۇل باستامالاردى اقش وكىلدەرىمەن بىرگە تالقىلاپ جاتىر.
«ۋكراينا بەيبىتشىلىككە قول جەتكىزۋ ءۇشىن بارلىق مۇمكىندىكتى پايدالانۋدا»، – دەدى اندرەي سيبيگا.
