جاڭا ورتالىقتىڭ اشىلۋى ءۇرجار اۋدانى تۇرعىندارىنىڭ مەديتسينالىق كومەك الۋ ءۇشىن اۋرۋحاناعا جەتۋ ۋاقىتىن ايتارلىقتاي قىسقارتۋعا مۇمكىندىك بەرەدى. جۇزدەگەن شاقىرىمعا سوزىلاتىن اۋماقتا، اسىرەسە جاز مەزگىلىندە حالىق سانى بىرنەشە ەسە ارتاتىن ءوڭىر ءۇشىن بۇل جەدەل مەديتسينالىق كومەكتىڭ قولجەتىمدىلىگىنە تىكەلەي اسەر ەتەتىن ماڭىزدى ماسەلە.
قۇرىلىس اۋىلدىق دەنساۋلىق ساقتاۋدى جاڭعىرتۋعا باعىتتالعان ۇلتتىق جوبا اياسىندا جۇرگىزىلۋدە.
تەرى ارقىلى كورونارلىق ارالاسۋ ورتالىعىنىڭ جوباسى زاماناۋي مەديتسينالىق قۇرال-جابدىقتار ورنالاساتىن جەكە قوسىمشا عيماراتتا 12 توسەك ورنىن قاراستىرادى. جوبانىڭ مەردىگەرى – «AKM Invest Group» جشس. جوبانىڭ جالپى قۇنى 3,1 ملرد تەڭگەنى قۇرايدى.
قۇرىلىس-مونتاج جۇمىستارى بارىسىندا ساپانى باقىلاۋ، بەلگىلەنگەن مەرزىمدەردى ساقتاۋ جانە قاۋىپسىزدىك تالاپتارىن ورىنداۋ قامتاماسىز ەتىلگەن. قازىرگى ۋاقىتتا نىسان قۇرىلىسى اياقتالۋعا جاقىن.
جاڭا ورتالىقتاعى ەڭ ماڭىزدى جابدىقتاردىڭ ءبىرى قان تامىرلارىن جوعارى دالدىكپەن زەرتتەۋگە مۇمكىندىك بەرەتىن انگيوگراف اپپاراتى. سونىمەن قاتار بارلىق پالاتالار جاساندى تىنىس الۋ اپپاراتتارىمەن جانە ءار پاتسيەنتتىڭ جاعدايىن باقىلاۋعا ارنالعان جەكە مونيتورلارمەن جابدىقتالادى.
ءۇرجار اۋدانى ونداعان ەلدى مەكەندى قامتيدى. تۋريستىك ماۋسىم كەزىندە مۇندا كەلەتىن ادامدار سانى كۇرت ارتادى. مۇنداي جاعدايدا جەدەل مەديتسينالىق كومەكتىڭ قولجەتىمدىلىگى تەك دارىگەرلەر مەن مەديتسينالىق قۇرال-جابدىقتاردىڭ بولۋىنا عانا ەمەس، ناۋقاستىڭ مەديتسينالىق مەكەمەگە قانشا ۋاقىتتا جەتكىزىلەتىنىنە دە بايلانىستى.
قازىرگى تاڭدا شۇعىل جۇرەك وپەراتسيالارىن جاسايتىن ەڭ جاقىن ورتالىق اياگوز قالاسىندا ورنالاسقان. ءۇرجار اۋدانىنان وعان دەيىنگى قاشىقتىق – 175 شاقىرىم.
بۇگىندە ءۇرجار جانە ماقانشى اۋداندارىنداعى مەديتسينالىق قىزمەت 57 519 ادام تۇراتىن اۋقىمدى اۋماقتى قامتيدى. قىزمەت كورسەتۋ راديۋسى 410 شاقىرىمنان اسادى.
ءۇرجار اۋدانىندا مەديتسينالىق جەلى 15 دارىگەرلىك امبۋلاتوريادان، التى فەلدشەرلىك-اكۋشەرلىك جانە 13 مەديتسينالىق پۋنكتتەن تۇرادى. ماقانشى اۋدانىندا توعىز دارىگەرلىك امبۋلاتوريا، ەكى فەلدشەرلىك-اكۋشەرلىك جانە التى مەديتسينالىق پۋنكت جۇمىس ىستەيدى.
بۇل اۋماقتاعى دەنساۋلىق ساقتاۋ جۇيەسىنە تۇسەتىن جۇكتەمە جەرگىلىكتى تۇرعىنداردىڭ سانىمەن عانا شەكتەلمەيدى. مەديتسينا قىزمەتكەرلەرى 16 شەكارا بەكەتىنە، ءۇش كومەنداتۋراعا، شەكارا اسكەري جاساعىنىڭ جەكە قۇرامىنا جانە ولاردىڭ وتباسى مۇشەلەرىنە، سونداي-اق جالاڭاشكول كومىر رازرەزىنىڭ جۇمىسشىلارىنا قىزمەت كورسەتەدى.
تاعى ءبىر ماڭىزدى فاكتور – تۋريستىك ماۋسىم. ءۇرجار اۋدانى الاكول كولىنە جاقىن ورنالاسقان. جاز مەزگىلىندە كولگە ميلليوننان استام دەمالۋشى كەلەدى. وسى كەزەڭدە مەديتسينالىق قىزمەتكە تۇسەتىن جۇكتەمە دە ارتادى. اسىرەسە شۇعىل كومەك بىرنەشە مينۋت ىشىندە قاجەت بولاتىن جاعدايلاردىڭ تاۋەكەلى جوعارىلايدى.
ءۇرجار اۋدانىنىڭ كوپسالالى ورتالىق اۋداندىق اۋرۋحاناسىنىڭ باس دارىگەرىنىڭ مىندەتىن اتقارۋشى امانجول يسكاكوۆتىڭ ايتۋىنشا، ينفاركت كەزىندە العاشقى «التىن ساعاتتىڭ» ماڭىزى زور.
ءۇرجار اۋدانى مەن اياگوز قالاسىنىڭ اراسى – 175 شاقىرىم. امانجول يسكاكوۆتىڭ سوزىنشە، ءىرى قالا ءۇشىن بۇل قاشىقتىق اسا ۇلكەن بولىپ كورىنبەۋى مۇمكىن. الايدا شۇعىل مەديتسينالىق جاعدايدا ول ناۋقاس ءۇشىن ەلەۋلى قاۋىپ فاكتورىنا اينالادى.
مۇندا اۋدان اۋماعىنىڭ ۇزاقتىعىن، جولداردىڭ جاعدايىن، اۋا رايىن، سونداي-اق ناۋقاستى الدىمەن شالعاي ەلدى مەكەننەن الىپ شىعىپ، كەيىن اياگوزگە جەتكىزۋگە كەتەتىن ۋاقىتتى ەسكەرۋ قاجەت.
ال سەمەي قالاسىنان ءۇرجار اۋدانى شامامەن 560 شاقىرىم قاشىقتىقتا ورنالاسقان. سوندىقتان اۋىر جاعدايداعى ناۋقاستاردى وبلىس ورتالىعىنا جەدەل جەتكىزۋ دە مۇمكىن ەمەس.
ءۇرجار اۋدانى ءۇشىن بۇل ماسەلە ونىڭ گەوگرافيالىق ورنالاسۋىنا بايلانىستى ەرەكشە ماڭىزدى. اۋقىمدى اۋماق جاعدايىندا كورشىلەس قالاعا دەيىنگى سالىستىرمالى تۇردە قىسقا قاشىقتىقتىڭ ءوزى شۇعىل جاعدايداعى ناۋقاس ءۇشىن ءومىر مەن ءولىم اراسىنداعى كۇرەسكە اينالۋى مۇمكىن. ال جاز مەزگىلىندە اۋدانعا كەلەتىن ادامدار سانىنىڭ كۇرت ارتۋى جاعدايدى ودان ءارى قيىنداتادى.
امانجول يسكاكوۆ ميوكارد ينفاركتىسى كەزىندە تەرى ارقىلى كورونارلىق ارالاسۋ ءادىسىنىڭ ماڭىزى زور ەكەنىن اتاپ ءوتتى. مۇندا دا ۋاقىتتىڭ ءار مينۋتى ماڭىزدى. جۇرەك بۇلشىقەتى قالىپتى قان اينالىمىنسىز نەعۇرلىم ۇزاق قالسا، زاقىمدانۋ كولەمى سوعۇرلىم ۇلعايادى.
قازىرگى ۋاقىتتا جوبا بەكىتىلگەن جوبالىق قۇجاتتاماعا جانە قۇرىلىس سالاسىنداعى تالاپتارعا سايكەس جۇزەگە اسىرىلۋدا.
ورتالىقتىڭ ىسكە قوسىلۋى مامانداندىرىلعان مەديتسينالىق كومەكتى حالىققا جاقىنداتىپ، دەر كەزىندە كورسەتىلەتىن كومەك ارقىلى تالاي ناۋقاستىڭ ءومىرىن ساقتاپ قالۋعا مۇمكىندىك بەرەدى.
