رەسەي حاباروۆسكىدەگى كسرو-نىڭ جاپونيانى جەڭگەنىنە وراي ورناتىلعان مەموريالدى بۇزۋى ءتيىس. بۇل تۋرالى جاپونيا پرەمەر-ءمينيسترى ساناە تاكايتي مالىمدەدى، دەپ حابارلايدى «ادىرنا» ءتىلشىسى.
«جاپونيا ۇكىمەتى رەسەي تاراپىنان ەسكەرتكىش ورناتۋدى توقتاتۋدى جانە ونى بۇزۋدى قاتاڭ تالاپ ەتەدى»، — دەپ جازدى تاكايتي X الەۋمەتتىك جەلىسىندە.
جاپونيا حريزانتەما بەينەلەنگەن شەكارا باعاناسىن قيراتىپ تۇرعان مەموريالدىڭ اشىلۋىنا جول بەرىلمەيتىنىن جەتكىزدى.
ء«بىز رەسەي تاراپىن شەكارالىق بەلگىنى الىپ تاستاۋعا شاقىرۋدى جالعاستىرامىز»، — دەپ اتاپ ءوتتى ەل ۇكىمەتىنىڭ باسشىسى.
1945 جىلدىڭ تامىزىندا كسرو وداقتاستىق مىندەتتەمەلەرىن ورىنداۋ ماقساتىندا جاپونياعا قارسى سوعىس قيمىلدارىنا كىرىسكەن ەدى. 9 تامىزدا كەڭەس اسكەرلەرى مانچجۋريادا شابۋىل باستاعان. مانچجۋر وپەراتسياسى بارىسىندا كۆانتۋن ارمياسى تالقاندالىپ، كەڭەس اسكەرى وڭتۇستىك ساحالين مەن كۋريل ارالدارىن دا باسىپ الدەعان.
كۆانتۋن ارمياسىنىڭ تالقاندالۋى جاپونيانى ازيا قۇرلىعىنداعى ەڭ ءىرى قۇرلىق اسكەرلەرىنىڭ توبىنان ايىرىپ، ونىڭ كاپيتۋلياتسياسىن جەدەلدەتكەن ەدى. 1945 جىلعى 2 قىركۇيەكتە جاپونيا ءسوزسىز تىزە بۇگۋ تۋرالى اكتىگە قول قويىپ، ەكىنشى دۇنيەجۇزىلىك سوعىستىڭ اياقتالعانىن جاريالاعان.
حريزانتەما جاپونيانىڭ رەسمي رامىزدەرىنىڭ ءبىرى سانالادى جانە ول يمپەراتور اۋلەتىمەن بايلانىستى. 16 جاپىراقتى التىن حريزانتەمانىڭ ستيلدەندىرىلگەن بەينەسى – ەلدىڭ يمپەراتورلىق ەمبلەماسى. ونىڭ بەينەسى مەملەكەتتىك رامىزدەردە، قۇجاتتاردا جانە يمپەراتور اۋلەتىنە قاتىستى زاتتاردا قولدانىلادى. ال گۇلدىڭ ءوزى جاپونيادا ءداستۇرلى تۇردە ۇزاق ءومىر مەن ءال-اۋقاتتىڭ سيمۆولى سانالادى.
4 قىركۇيەك، جۇما كۇنى حاباروۆسك قالاسىنىڭ ەڭ بيىك نۇكتەسىندە كسرو-نىڭ جاپونيانى جەڭگەنىنە جانە ەكىنشى دۇنيەجۇزىلىك سوعىستىڭ اياقتالۋىنا ارنالعان رەسەيدەگى ەڭ ءىرى مەموريال اشىلعان بولپتىن. بيىكتىگى 15 مەتر بولاتىن ساربازدىڭ ءمۇسىنى قولادان قۇيىلعان.
«بۇل ءبىزدىڭ كورشىلەرىمىز ايتىپ وتىرعانداي، يمپەراتور اۋلەتىنىڭ عانا سيمۆولى ەمەس. بۇل — ەكىنشى دۇنيەجۇزىلىك سوعىس كەزىندە ادام ايتقىسىز قىلمىستار جاساعان ميليتاريستىك جاپونيانىڭ دا سيمۆولى. <…> بۇل — رەسەي-جاپون سوعىسىنان كەيىن جاپونيا رەسەيدەن ءساحاليننىڭ جارتىسىن تارتىپ العان كەزدە ورناتقان شەكارالىق تاستىڭ ءدال كوشىرمەسى»، — دەدى پرەزيدەنت اكىمشىلىگىنىڭ گۋمانيتارلىق سالاداعى مەملەكەتتىك ساياسات باسقارماسى باسشىسىنىڭ ورىنباسارى نيكولاي وۆسيەنكو.
