قۇرىلتاي عيماراتتارىندا بۇقارالىق اقپارات قۇرالدارى وكىلدەرىنىڭ جۇمىس ىستەۋ ءتارتىبى بەلگىلەندى، دەپ حابارلايدى "ادىرنا" ءتىلشىسى.
جۋرناليستەرگە قۇرىلتاي ءىس-شارالارىن اقپاراتتىق سۇيەمەلدەۋگە جانە دەپۋتاتتارمەن كەزدەسۋگە قانداي قۇقىق بەرىلگەنى تۋرالى اقپارات تارادى.
بەلگىلەنگەن تارتىپكە سايكەس، جۋرناليستەر قۇرىلتايدىڭ ءباسپاسوز قىزمەتىنىڭ شاقىرۋىمەن ءىس-شارالار كەزىندە ارنايى بەلگىلەنگەن ورىنداردا جۇمىس ىستەي الادى. سونداي-اق ءىس-شارالار وتەتىن جانە ءباسپاسوز قىزمەتى ايقىنداعان وزگە دە ورىندارعا كىرۋگە مۇمكىندىك بەرىلەدى.
باق وكىلدەرىنە رەداكتسيامەن بايلانىسۋ جانە جەدەل اقپارات جىبەرۋ ءۇشىن ۇيالى بايلانىس قۇرالدارىن، اقپاراتتىق-تەلەكوممۋنيكاتسيالىق تەحنولوگيالاردى، ديكتوفون، فوتو جانە بەينەاپپاراتۋرانى، سونداي-اق دەربەس ءپورتاتيۆتى كومپيۋتەرلەردى بەلگىلەنگەن تارتىپپەن پايدالانۋعا رۇقسات ەتىلەدى.
جۋرناليستەر قۇرىلتايدىڭ ءباسپاسوز قىزمەتىمەن كەلىسۋ ارقىلى تۇراقتى كوميتەتتەردىڭ، ساياسي پارتيالار فراكتسيالارىنىڭ جانە دەپۋتاتتىق توپتاردىڭ شاقىرۋىمەن وتەتىن ءىس-شارالارعا قاتىسا الادى. سونىمەن قاتار قۇرىلتاي عيماراتتارىندا دەپۋتاتتارمەن، مەملەكەتتىك ورگاندار، قوعامدىق بىرلەستىكتەر جانە ۇكىمەتتىك ەمەس ۇيىمدار وكىلدەرىمەن كەزدەسۋگە قۇقىلى.
بۇدان بولەك، جۋرناليستەر قۇرىلتايدىڭ جەكەلەگەن ءىس-شارالارى تۋرالى اقپارات الۋ ءۇشىن ءباسپاسوز قىزمەتى ۇيىمداستىراتىن سۇحباتتارعا، بريفينگتەرگە، ءباسپاسوز كونفەرەنتسيالارىنا جانە كەزدەسۋلەرگە قاتىسا الادى.
باق وكىلدەرىنە ءباسپاسوز قىزمەتىنىڭ كومەگىمەن رەداكتسيا باسشىسىنىڭ جازباشا، ال شۇعىل جاعدايدا اۋىزشا ءوتىنىشى بويىنشا فوتو جانە بەينەماتەريالداردى پايدالانۋعا مۇمكىندىك بەرىلەدى.
قۇرىلتاي عيماراتتارىنا بارعان كەزدە جۋرناليستەر ىسكەرلىك ستيلدەگى كيىم ۇلگىسىن ساقتاۋى ءتيىس.
سونداي-اق بريفينگتەر بارىسىندا بارلىق جۋرناليستەرگە سۇراق قويۋعا تەڭ مۇمكىندىك بەرۋ ماقساتىندا مودەراتور ءبىر باق وكىلى قوياتىن سۇراقتاردىڭ سانىن شەكتەي الادى. بۇل رەتتە قاتىساتىن بۇقارالىق اقپارات قۇرالدارىنىڭ سانى دا ەسكەرىلەدى.
ايتا كەتەيىك، بۇعان دەيىن جۋرناليستەر دەپۋتاتتارعا عيمارات دالىزىندە سۇراق قويىپ، جاۋاپ الۋعا مۇمكىندىگى بولعان.
