«كىتاپ وقيتىن ۇلت» رەسپۋبليكالىق وقۋ مارافونىنا قاتىسۋشىلار سانى 1 ميلليون ادامعا جەتتى. مارافوننىڭ رەسمي سايتىندا ميلليونىنشى قاتىسۋشى تىركەلدى.
جوباعا قازاقستاننىڭ بارلىق وڭىرىنەن مەكتەپ وقۋشىلارى مەن ستۋدەنتتەر، مۇعالىمدەر مەن اتا-انالار، كىتاپحاناشىلار، مەملەكەتتىك قىزمەتشىلەر، ءتۇرلى سالا ماماندارى جانە تۇتاس وتباسىلار قاتىسىپ وتىر.
ۇيىمداستىرۋشىلاردىڭ مالىمەتىنشە، 1 ميلليوندىق كورسەتكىش – جاي عانا تىركەلگەندەر سانى ەمەس، كىتاپ وقۋعا قىزىعۋشىلىق تانىتىپ، مارافون ارقىلى وقۋ مادەنيەتىنە قوسىلعان قازاقستاندىقتاردىڭ اۋقىمىن كورسەتەتىن ماڭىزدى بەلەس.
مارافوننىڭ نەگىزگى ماقساتى – كىتاپ وقۋدى كەڭىنەن ناسيحاتتاپ، وقۋ مادەنيەتىن قالىپتاستىرۋ جانە قوعام مۇشەلەرىن ورتاق وقىرمان قاۋىمداستىعىنا بىرىكتىرۋ. جوبا اياسىندا قاتىسۋشىلار وقىعان كىتاپتارىن تالقىلاپ، ءوز اسەرلەرىمەن جانە پىكىرلەرىمەن بولىسۋگە مۇمكىندىك الادى.
مارافونعا مەكتەپتەر، ەڭبەك ۇجىمدارى، كىتاپحانالار، ءتۇرلى قاۋىمداستىقتار مەن وتباسىلاردىڭ بەلسەندى قاتىسۋى جوبانىڭ اۋقىمىن كەڭەيتە تۇسكەن. ۇيىمداستىرۋشىلاردىڭ ايتۋىنشا، كىتاپ وقۋ ادامدار اراسىندا پىكىر الماسۋعا، جاڭا يدەيالارمەن تانىسۋعا جانە ءارتۇرلى بۋىن وكىلدەرىنىڭ ءوزارا تۇسىنىستىگىن ارتتىرۋعا مۇمكىندىك بەرەدى.
«كىتاپ وقيتىن ۇلت» مارافونىنا قاتىسۋشىلار سانىنىڭ 1 ميلليونعا جەتۋى قازاقستاندا كىتاپ وقۋ مادەنيەتىن دامىتۋعا باعىتتالعان باستامالارعا قوعام تاراپىنان قىزىعۋشىلىق بار ەكەنىن كورسەتەدى.
ۇيىمداستىرۋشىلار جوباعا قاتىسىپ جاتقان وقىرماندارعا العىس ءبىلدىرىپ، مارافوننىڭ الداعى ۋاقىتتا دا جالعاساتىنىن اتاپ ءوتتى.
