اقمولا وبلىسىنىڭ جارقايىڭ اۋدانىندا اۋىلدىق ەلدى مەكەندەرگە بىلىكتى ماماندار تارتۋ جانە ولاردى تۇراقتاندىرۋ باعىتىندا «ديپلوممەن اۋىلعا!» مەملەكەتتىك باعدارلاماسى جۇزەگە اسىرىلۋدا، دەپ حابارلايدى Adyrna.kz ءتىلشىسى.
جارقايىڭ اۋدانى اكىمدىگىنىڭ مالىمەتىنشە، باعدارلاما 2009 جىلدان بەرى ىسكە اسىرىلىپ كەلەدى. ونىڭ نەگىزگى ماقساتى - اۋىلدىق جەرلەرگە قاجەتتى مامانداردى تارتۋ، ولاردىڭ ەڭبەك ەتۋىنە جانە تۇرۋىنا جاعداي جاساۋ، سونداي-اق كادرلاردىڭ اۋىلدا تۇراقتاپ قالۋىنا قولداۋ كورسەتۋ. باعدارلاما اياسىندا ءبىلىم بەرۋ، دەنساۋلىق ساقتاۋ، مادەنيەت، ۆەتەريناريا جانە باسقا دا سالالاردىڭ ماماندارىنا الەۋمەتتىك قولداۋ كورسەتىلىپ كەلەدى.
«اۋىلدىڭ تۇراقتى دامۋى ەڭ الدىمەن بىلىكتى كادرلارعا بايلانىستى. سوندىقتان مامانداردى اۋىلعا تارتۋمەن قاتار، ولاردىڭ الەۋمەتتىك جاعدايىن جاقسارتۋعا، تۇرعىن ءۇي ماسەلەسىن شەشۋگە جانە تۇراقتى ەڭبەك ەتۋىنە مۇمكىندىك جاساۋ ماڭىزدى. «ديپلوممەن اۋىلعا!» باعدارلاماسى وسى مىندەتتەردى جۇزەگە اسىرۋعا باعىتتالعان ءتيىمدى تەتىكتەردىڭ ءبىرى»، - دەپ ءتۇسىندىردى اۋدان اكىمدىگىنەن.
2009-2025 جىلدارى اۋدان بويىنشا 28 مامان تۇرعىن ءۇي ساتىپ الۋعا نەمەسە سالۋعا بيۋدجەتتىك كرەديت العان. ولاردىڭ 24-ءى ءبىلىم بەرۋ، ەكەۋى دەنساۋلىق ساقتاۋ، بىرەۋى مادەنيەت جانە بىرەۋى ۆەتەريناريا سالاسىنىڭ مامانى.
وسى كەزەڭدە 287 مامان كوتەرمە جاردەماقىمەن قامتىلدى. ونىڭ ىشىندە 239-ى ءبىلىم بەرۋ، 26-سى دەنساۋلىق ساقتاۋ، 8-ءى مادەنيەت، 7-ەۋى ۆەتەريناريا سالاسىنىڭ قىزمەتكەرلەرى جانە 7 مەملەكەتتىك قىزمەتشى بار.
باعدارلاما اياسىندا ماماندارعا ەكى نەگىزگى قولداۋ شاراسى قاراستىرىلعان. ءبىرىنشىسى - 100 ايلىق ەسەپتىك كورسەتكىش كولەمىندەگى كوتەرمە جاردەماقى. 2026 جىلى ونىڭ مولشەرى 432 500 تەڭگەنى قۇرايدى.
ەكىنشى قولداۋ شاراسى - تۇرعىن ءۇي ساتىپ الۋعا نەمەسە سالۋعا ارنالعان بيۋدجەتتىك كرەديت. كرەديتتىڭ ەڭ جوعارى مولشەرى 2 000 ايلىق ەسەپتىك كورسەتكىشكە دەيىن نەمەسە 2026 جىلى 8 ميلليون 650 مىڭ تەڭگەنى قۇرايدى. قارىز 15 جىلعا دەيىنگى مەرزىمگە جىلدىق 1 پايىزدىق مولشەرلەمەمەن بەرىلەدى.
تۇرعىن ءۇي بويىنشا مەملەكەتتىك قىزمەت «وتباسى بانك» اق-نىڭ «باسپانا ماركەت» جىلجىمايتىن مۇلىك پورتالى ارقىلى كورسەتىلەدى.
ماماندار الەۋمەتتىك قولداۋ شارالارىن اۋىلدىق ەلدى مەكەنگە كەلگەن جانە تىركەلگەن كۇننەن باستاپ ءۇش جىل ىشىندە الۋعا ءوتىنىش بەرۋى قاجەت.
2026 جىلى جارقايىڭ اۋدانىندا باعدارلامانى ىسكە اسىرۋعا جەرگىلىكتى بيۋدجەتتەن قاجەتتى قاراجات قاراستىرىلعان. تۇرعىن ءۇي ساتىپ الۋعا نەمەسە سالۋعا ءبىر مامانعا بيۋدجەتتىك كرەديت بەرۋ ءۇشىن 8,65 ميلليون تەڭگە ءبولىندى. سونىمەن قاتار 10 مامانعا كوتەرمە جاردەماقى تولەۋگە 4,325 ميلليون تەڭگە قاراستىرىلعان.
بيىل كوتەرمە جاردەماقىنى 10 مامان الدى. ولاردىڭ بەسەۋى - ءبىلىم بەرۋ، ەكەۋى - دەنساۋلىق ساقتاۋ سالاسىنىڭ قىزمەتكەرلەرى. سونداي-اق ءبىر مەملەكەتتىك قىزمەتشى جانە اگروونەركاسىپ كەشەنىنىڭ ەكى مامانى قولداۋعا يە بولدى.
قازان ايىندا كوستىچەۆو اۋىلىندا ەڭبەك ەتەتىن ماتەماتيكا ءپانىنىڭ مۇعالىمىنە تۇرعىن ءۇي ساتىپ الۋعا بيۋدجەتتىك كرەديت بەرۋ جوسپارلانىپ وتىر.
اۋدان اكىمدىگىنەن اتاپ وتكەندەي، مەملەكەتتىك قولداۋ شارالارى تۋرالى اقپاراتتاندىرۋ جانە ءتۇسىندىرۋ جۇمىستارى دا تۇراقتى جۇرگىزىلەدى. بۇل رەتتە حالىقتى جۇمىسپەن قامتۋ، ەڭبەك قاۋىپسىزدىگىن ساقتاۋ، ەڭبەك ادامىنىڭ مارتەبەسىن ارتتىرۋ، كاسىبي باعدار بەرۋ جانە سۇرانىسقا يە ماماندىقتار بويىنشا كادر دايارلاۋ ماسەلەلەرىنە باسىمدىق بەرىلەدى.
سونىمەن قاتار حالىقتىڭ تابىسىن ارتتىرۋعا باعىتتالعان 2029 جىلعا دەيىنگى باعدارلاما، «كەلەشەك» بىرىڭعاي ەرىكتى جيناقتاۋ جۇيەسى جانە ەڭبەك نارىعىنا قاجەتتى جاڭا ماماندىقتار بويىنشا كادر دايارلاۋدىڭ جاڭا تاسىلدەرى جونىندە ءتۇسىندىرۋ جۇمىستارى جۇرگىزىلەدى.
اۋدان اكىمدىگى بۇل باعىتتاعى جۇمىستىڭ نەگىزگى ماقساتى اۋىل تۇرعىندارىنىڭ جۇمىسپەن قامتىلۋىن ارتتىرۋمەن قاتار، ەلدى مەكەندەردەگى كادر الەۋەتىن نىعايتىپ، مامانداردىڭ اۋىلدا تۇراقتاپ قالۋىنا جاعداي جاساۋ ەكەنىن اتاپ ءوتتى.
فوتو: جارقايىڭ اۋدانى اكىمدىگىنەن.
