الماتى اكىمى دارحان ساتىبالدى الماتىلىقتاردى قالا كۇنىمەن قۇتتىقتاپ، ايتۋلى مەرەكەگە وراي ۇيىمداستىرىلعان Alma Qala Fest فەستيۆالىن اشتى.
قالا تۇرعىندارى مەن قوناقتارى LED-ەكراننان جاڭارىپ، كوركەيىپ كەلە جاتقان اسەم الماتىنىڭ جەتىستىكتەرىن تاماشالادى.
«الماتى قالاسىنىڭ تاريحي ورنى ايرىقشا مانگە يە. بارشاڭىزدى قالا كۇنىمەن شىن جۇرەكتەن قۇتتىقتايمىن! سوڭعى ۋاقىتتا الماتىلىقتار قازاقستاندا وتكەن حالىقتىق كونستيتۋتسيانى قابىلداۋ، ۇلتتىق قۇرىلتاي سايلاۋى سەكىلدى ءىرى ساياسي رەفورمالاردى بەلسەندى قولدادى.
XXI عاسىر – مەگاپوليستەر ءداۋىرى. التىن قالا ءومىر سۇرۋگە قولايلى ورتا، بيزنەسكە قولايلى احۋال، تۋريستەر ءۇشىن جاسالعان جاعداي جانە زياتكەرلىك ستارتاپتارعا بەرىلەتىن مۇمكىندىكتەر ارقىلى باسەكەگە تۇسەدى. باسقاشا ايتقاندا، الەمدىك باسەكە قالالار دەڭگەيىنە اۋىستى»، – دەدى الماتى اكىمى.
ول ۋاقىت وتە تالاپتىڭ كۇشەيە تۇسەتىنىن اتاپ ءوتىپ، قالا تۇرعىندارىن الماتىنى بىرگە دامىتۋعا جانە كوركەيتۋگە شاقىردى.
سالتاناتتى ءىس-شارادا الماتى اكىمى دارحان امانگەلدىۇلى قالانىڭ دامۋىنا ەرەكشە ءىز قالدىرعان كورنەكتى ازاماتتاردى ماراپاتتاپ، ولاردىڭ الماتىنىڭ قالىپتاسۋى مەن وركەندەۋىنە قوسقان ۇلەسىن اتاپ ءوتىپ، قالا تۇرعىندارىنىڭ اتىنان العىس ءبىلدىردى.
«قۇرمەتتى الماتىلىقتار، وزدەرىڭىز بىلەتىندەي، قالامىزدىڭ دامۋىنا ۇلەس قوسقان ازاماتتارعا بەرىلەتىن «قۇرمەتتى ازامات» اتاعى بار. الماتىدا ءبىراز ۋاقىت بويى بۇل قۇرمەتتى اتاقتى بەرۋ توقتاتىلعان ەدى. بيىلدان باستاپ «قالانىڭ قۇرمەتتى ازاماتى» اتاعىن تابىستاۋدى قايتا جاڭعىرتتىق. وسىعان بايلانىستى بۇگىن قالامىزدىڭ دامۋىنا ەلەۋلى ۇلەس قوسقان بىرقاتار تۇرعىندى ماراپاتتاپ وتىرمىن»، – دەدى قالا اكىمى.
«الماتى قالاسىنىڭ قۇرمەتتى ازاماتى» اتاعىنا ەڭبەك ارداگەرى گاينيكەن بيباتىروۆا، كورنەكتى قۇرىلىسشى-ينجەنەر كلارا لەتنيكوۆا، كەسكىندەمەشى-سۋرەتشى اماندوس اقاناەۆ، ساۋلەتشى ورىسباي بايمىرزاەۆ، تاجىريبەلى دارىگەر ورىنباي دايىربەكوۆ، عالىم-حيرۋرگ بولاتبەك بايماحانوۆ، «الماتىليفت» جشس ديرەكتورى قالدىباي قازانباەۆ، «الماتى تازالىق» مكك باس ينجەنەرى الەكساندر كين، قازاقستان رەسپۋبليكاسىنىڭ ەڭبەك سىڭىرگەن جاتتىقتىرۋشىسى ءامين تۇياقوۆ، كورنەكتى سكريپكاشى، ديريجەر ءارى كومپوزيتور مۇرات سەركىباەۆ يە بولدى.
قۇرمەتتى اتاققا يە بولعان «الماتىليفت» جشس ديرەكتورى قالدىباي قازانباەۆ الماتىنىڭ ەرەكشە رۋحىن اتاپ ءوتىپ، قالا تۇرعىندارىنا العىسىن ءبىلدىردى:
«پرەزيدەنتتىڭ الماتىدا تۋعانىنا عانا بايلانىستى ەمەس شىعار، اكىم ايتقانداي، بىزدە الماتىلىق رۋح بار. ول ءاردايىم قالامىزدى كوركەيتۋگە كومەكتەسىپ كەلەدى. بارلىق الماتىلىققا اماندىق پەن باقىت تىلەيمىن».
«بۇگىن، وسىناۋ مەرەكەلى كۇنى، قۇرمەتتى الماتىلىقتار، سىزدەرگە زور العىسىمدى بىلدىرەمىن. قالامىزدى تارتىمدى ورتالىققا اينالدىرعان – وزدەرىڭىز. مەن 23 جىل بويى وسى قالانى دامىتۋ جانە كوركەيتۋ جۇمىستارىنا تىكەلەي اتسالىستىم. بىراق ءبىر كۇنى وسى ساحنادا تۇرىپ، «الماتى قالاسىنىڭ قۇرمەتتى ازاماتى» دەگەن جوعارى اتاققا يە بولامىن دەپ ەشقاشان ويلاعان ەمەسپىن. مەنىڭشە، بۇل جاي عانا ماراپات ەمەس، سونىمەن بىرگە كوپجىلدىق تاجىريبەمدى جاستارعا جەتكىزۋگە، بولىسۋگە ۇلكەن سەرپىن بەرەدى. قالامىزدى الداعى ۋاقىتتا دا بىرگە دامىتىپ، كوركەيتە بەرەيىك»، – دەدى ەڭبەك قىزىل تۋ جانە «قۇرمەت» وردەندەرىنىڭ يەگەرى كلارا لەتنيكوۆا.
الماتىنىڭ تاريحى – ونىڭ كورىكتى كوشەلەرى مەن ءزاۋلىم عيماراتتارىنىڭ تاريحى عانا ەمەس. بۇل وسى قالاعا بار جۇرەگىمەن قىزمەت ەتكەن ادامداردىڭ تاريحى. ال «قۇرمەتتى ازامات» اتاعى – سول ەڭبەكتىڭ قوعام الدىنداعى جارقىن مويىندالۋى.
سالتاناتتى كەشتىڭ ءسانىن التىنبەك قورازباەۆ، جۇبانىش جەكسەنۇلى، جەڭىس سەيدوللاۇلى جانە ءمادينا سادۋاقاسوۆا سەكىلدى وتاندىق ەسترادا جۇلدىزدارىنىڭ كونتسەرتى تولىقتىردى.
ايتا كەتەيىك، Alma Qala Fest فەستيۆالى ەكى كۇنگە جالعاسادى. قازىرگى ۋاقىتتا اباي الاڭىندا «الما ايماعى»، «شەبەرلەر قالاشىعى»، بالالار جانە كرافت ويىندار ايماعى، AI & ROBOT ZONE جانە فۋد-كورت جۇمىس ىستەپ تۇر.
