قىرعىز رەسپۋبليكاسىنىڭ الماتى قالاسىنداعى باس كونسۋلدىعىنىڭ عيماراتىندا الماتىدا ءبىلىم الىپ جاتقان قىرعىزستاندىق ستۋدەنتتەرمەن كەزدەسۋ ءوتتى، دەپ حابارلايدى "ادىرنا" ءتىلشىسى.
كەزدەسۋ بارىسىندا قىرعىز رەسپۋبليكاسىنىڭ الماتى قالاسىنداعى باس كونسۋلى ستۋدەنتتەردىڭ وقۋ بارىسى مەن تۇرمىس جاعدايىن سۇراپ، ءبىلىم الۋ كەزىندە تۋىنداعان ماسەلەلەرى مەن ۇسىنىستارىن تىڭدادى.
سونىمەن قاتار ستۋدەنتتەرگە شەتەلدە بولۋ ەرەجەلەرىن ساقتاۋ، الەۋمەتتىك جەلىلەردەگى ءتۇرلى قاۋىپ-قاتەرلەردەن ساقتانۋ، الاياقتىق سحەمالارىن اجىراتۋ جانە ولاردان قورعانۋ جولدارى تۋرالى اقپارات بەرىلدى.
كەزدەسۋ كەزىندە ستۋدەنتتەر وزدەرىن قىزىقتىرعان سۇراقتارىن قويىپ، ءتيىستى جاۋاپتار مەن كەڭەستەر الدى. تاراپتار الماتىداعى قىرعىزستاندىق ستۋدەنتتەر قاۋىمداستىعىنىڭ جۇمىسىن جانداندىرۋ جانە بىرلەسكەن ءىس-شارالار وتكىزۋ ماسەلەلەرىن دە تالقىلادى.
كەزدەسۋ الەۋمەتتىك جەلىدە قازاقتار مەن قىرعىزداردىڭ تاريحىنا قاتىستى داۋلى پىكىرلەر ايتىپ، سوڭىنان كەشىرىم سۇراعان قازاقستاندا ءبىلىم الىپ جۇرگەن ەكى قىرعىزستاندىق ستۋدەنتتىڭ جاعدايىنان كەيىن وتكەنى نازار اۋدارتادى.
