Qyrǧyz Respublikasynyŋ Almaty qalasyndaǧy Bas konsuldyǧynyŋ ǧimaratynda Almatyda bılım alyp jatqan qyrǧyzstandyq studenttermen kezdesu öttı, dep habarlaidy "Adyrna" tılşısı.
Kezdesu barysynda Qyrǧyz Respublikasynyŋ Almaty qalasyndaǧy Bas konsuly studentterdıŋ oqu barysy men tūrmys jaǧdaiyn sūrap, bılım alu kezınde tuyndaǧan mäselelerı men ūsynystaryn tyŋdady.
Sonymen qatar studentterge şetelde bolu erejelerın saqtau, äleumettık jelılerdegı türlı qauıp-qaterlerden saqtanu, alaiaqtyq shemalaryn ajyratu jäne olardan qorǧanu joldary turaly aqparat berıldı.
Kezdesu kezınde studentter özderın qyzyqtyrǧan sūraqtaryn qoiyp, tiıstı jauaptar men keŋester aldy. Taraptar Almatydaǧy qyrǧyzstandyq studentter qauymdastyǧynyŋ jūmysyn jandandyru jäne bırlesken ıs-şaralar ötkızu mäselelerın de talqylady.
Kezdesu äleumettık jelıde qazaqtar men qyrǧyzdardyŋ tarihyna qatysty dauly pıkırler aityp, soŋynan keşırım sūraǧan Qazaqstanda bılım alyp jürgen ekı qyrǧyzstandyq studenttıŋ jaǧdaiynan keiın ötkenı nazar audartady.
