باتىس قازاقستان وبلىسى بويىنشا مەملەكەتتىك كىرىستەر دەپارتامەنتى باسقارماسىنىڭ بۇرىنعى مىندەتىن اتقارۋشى پارا العانى ءۇشىن 10 جىلعا باس بوستاندىعىنان ايىرىلدى. بۇل تۋرالى استانانىڭ قىلمىستىق ىستەر جونىندەگى مامانداندىرىلعان اۋدانارالىق سوتى حابارلادى، دەپ جازادى “ادىرنا”.
سوت ۇكىمىنە سايكەس، سوتتالۋشى رەسەيدەن قازاقستانعا جۇك كولىكتەرىنىڭ شەكارادان كەدەرگىسىز ءوتۋىن قامتاماسىز ەتۋ ءۇشىن 100 ملن تەڭگە (221 مىڭ اقش دوللارى) كولەمىندە پارا العان.
سوت انىقتاعانداي، 2025 جىلدىڭ قىركۇيەك–قازان ايلارىندا شەنەۋنىك رەسەي ازاماتىنىڭ جۇك تاسىمالىنا باتىس قازاقستان وبلىسىنداعى وتكىزۋ بەكەتتەرى ارقىلى كەدەرگىسىز وتۋىنە جاعداي جاساۋ جونىندە كەلىسىمگە كەلگەن.
ول پارا ءۇشىن رەسەيدەن قازاقستانعا 1003 جۇك كولىگىنىڭ ەش كەدەرگىسىز ءوتۋىن قامتاماسىز ەتۋگە ۋادە بەرگەن.
سونىمەن قاتار، شەنەۋنىك تاسىمالداۋشى كومپانيالار مەن جەكە كاسىپكەرلەردىڭ تاۋەكەلدەردى باسقارۋ جۇيەسىنە ەنگىزىلگەنى تۋرالى اقپارات بەرىپ، وسىعان بايلانىستى قويىلعان شەكتەۋلەردى اينالىپ ءوتۋ جولدارىن كورسەتىپ وتىرعان.
اقشا وعان دەلدال ارقىلى بەرىلگەن. دەلدال بۇل قىزمەتى ءۇشىن 24,8 ملن تەڭگە (55 مىڭ اقش دوللارى) العان.
مەملەكەتتىك ايىپتاۋشى بۇرىنعى مەملەكەتتىك قىزمەتكەردى 12 جىلعا، ال دەلدالدى 1 جىل 6 ايعا باس بوستاندىعىنان ايىرۋدى سۇراعان.
سوت ەكى سوتتالۋشىنىڭ دا كامەلەتكە تولماعان بالالارى بار ەكەنىن جەڭىلدەتەتىن ءمان-جاي رەتىندە ەسكەردى. ال بۇرىنعى شەنەۋنىككە قاتىستى اۋىرلاتاتىن ءمان-جاي رەتىندە ونىڭ انتىن بۇزا وتىرىپ قىلمىس جاساعانى تانىلدى.
ناتيجەسىندە، دەپارتامەنتتىڭ بۇرىنعى قىزمەتكەرى 10 جىلعا، ال دەلدال 1 جىل 6 ايعا باس بوستاندىعىنان ايىرىلدى. ەكەۋىنىڭ دە مۇلكى تاركىلەنىپ، بەلگىلى ءبىر لاۋازىمداردى اتقارۋعا ءومىر بويىنا تىيىم سالىندى.
سونداي-اق سوت قىلمىستىق جولمەن الىنعان دەپ تانىلعان اقشانى مەملەكەت كىرىسىنە تاركىلەۋ جانە سوتتالعانداردان زاڭسىز الىنعان قاراجاتتى ءوندىرىپ الۋ تۋرالى شەشىم شىعاردى.
ازىرگە سوت ۇكىمى زاڭدى كۇشىنە ەنگەن جوق.
قازاقستان مەن رەسەي شەكاراسىندا جۇك كولىكتەرىنىڭ ۇزىن-سونار كەزەگى ءجيى پايدا بولادى. ادەتتە بۇل جاعداي ەكى ەلدىڭ كەدەن قىزمەتتەرىنىڭ جۇمىسىنا بايلانىستىرىلادى. الايدا ءتيىستى ۆەدومستۆولار مۇنى جوققا شىعارىپ، كولىك اعىنىنىڭ ارتۋىمەن تۇسىندىرەدى.
اسىرەسە، 2025 جىلدىڭ كۇزىندە جاعداي كۇردەلەنە ءتۇستى. سول كەزدە رەسەي مەن قازاقستان شەكاراسىندا مىڭداعان جۇك كولىگى كەپتەلىپ قالعان بولاتىن.
سول كەزدە ساراپشىلار بۇل جاعدايعا قازاقستان مەن رەسەي تاراپتارىنىڭ «كولەڭكەلى» يمپورتپەن كۇرەستى ءبىر مەزگىلدە كۇشەيتۋگە دەگەن ۇمتىلىسى سەبەپ بولۋى مۇمكىن ەكەنىن ايتقان ەدى.
