يران پرەزيدەنتى ماسۋد پەزەشكيان بۇۇ باس اسسامبلەياسىنىڭ 81-سەسسياسىنا قاتىسۋ ءۇشىن نيۋ-يورككە اتتانار الدىندا اقش پەن باتىس ەلدەرىنىڭ يرانعا قاتىستى ساياساتىن سىنعا الدى, دەپ حابارلايدى "ادىرنا".
يران پرەزيدەنتى اكىمشىلىگىنىڭ مالىمەتىنشە، پەزەشكيان اۋەجايدا سويلەگەن سوزىندە بۇۇ-نىڭ بيىلعى «سەنىمدى قالپىنا كەلتىرۋ» ۇرانىنا توقتالدى. ونىڭ پىكىرىنشە، حالىقارالىق دەڭگەيدە سەنىم ماسەلەسى كۇردەلى كۇيىندە قالىپ وتىر.
«سەنىم – جوق نارسە. ولار ايتىپ جۇرگەن ادام قۇقىقتارى دا، كوپتەگەن حالىقارالىق نورمالار دا ەسكەرىلمەي وتىر»، – دەدى يران پرەزيدەنتى.
پەزەشكيان بۇۇ مىنبەرىندە يرانعا جاسالعان شابۋىلدار تۋرالى ءسوز قوزعاپ، تەگەراننىڭ ۇستانىمىن حالىقارالىق قاۋىمداستىققا جەتكىزەتىنىن ايتتى. ونىڭ سوزىنشە، يران حالقى ءوز ارەكەتتەرىنىڭ دۇرىستىعىن حالىقارالىق دەڭگەيدە تۇسىندىرۋگە نيەتتى.
يران پرەزيدەنتى سونداي-اق ايماقتاعى جاعدايعا توقتالىپ، «جاۋدىڭ» پالەستينا مەن سيرياعا قارسى شابۋىلدارىن جالعاستىرىپ وتىرعانىن مالىمدەدى.
پەزەشكيان اقش بيلىگىنىڭ يراندىق جۋرناليستەر توبىنا ۆيزا بەرمەگەنىن دە سىنعا الدى. ونىڭ ايتۋىنشا، ۆاشينگتون مۇنداي شەشىم ارقىلى يران دەلەگاتسياسىنىڭ ۇستانىمىن تولىق جەتكىزۋىنە كەدەرگى كەلتىرىپ وتىر.
پرەزيدەنتتىڭ مالىمدەۋىنشە، يران ءوز كوزقاراسىن نيۋ-يوركتە جۇمىس ىستەيتىن حالىقارالىق بۇقارالىق اقپارات قۇرالدارى ارقىلى جەتكىزبەك.
پەزەشكيان اقش پەن ءيزرايلدىڭ يرانعا قاتىستى اسكەري ساياساتىنا دا باعا بەردى. ونىڭ ايتۋىنشا، ەكى ەل سوعىس ارقىلى يراندى كاپيتۋلياتسياعا ماجبۇرلەي العان جوق.
يران پرەزيدەنتى ەندى قىسىمنىڭ باسقا قۇرالدارى قولدانىلىپ جاتقانىن ايتتى. ونىڭ پىكىرىنشە، اقش پەن يزرايل قۇرلىق جانە تەڭىز بلوكاداسى، اقپاراتتىق قۇرالدار جانە يراننىڭ ىشكى ءالسىز تۇستارىن پايدالانۋ ارقىلى تەگەرانعا ىقپال ەتۋگە تىرىسىپ وتىر.
پەزەشكياننىڭ نيۋ-يورك ساپارى بۇۇ باس اسسامبلەياسىنىڭ كەزەكتى سەسسياسى اياسىندا وتەدى. يران تاراپى بۇل الاڭدى ەلدىڭ ۇستانىمىن حالىقارالىق قاۋىمداستىققا جەتكىزۋ ءۇشىن پايدالانۋدى كوزدەپ وتىر.
