داۋلەت بەكمانوۆ قورعانىس ءمينيسترىنىڭ ورىنباسارى قىزمەتىنە تاعايىندالدى. بۇل تۋرالى 24 قىركۇيەكتە اقوردانىڭ ءباسپاسوز قىزمەتى جازدى، دەپ حابارلايدى «ادىرنا» ءتىلشىسى.
«مەملەكەت باسشىسىنىڭ وكىمىمەن داۋلەت نىسانقۇلۇلى بەكمانوۆ قازاقستان رەسپۋبليكاسى قورعانىس ءمينيسترىنىڭ ورىنباسارى لاۋازىمىنا تاعايىندالدى»،– دەلىنگەن حابارلامادا.
داۋلەت بەكمانوۆ 1983 جىلى وزبەكستان رەسپۋبليكاسىنىڭ دوستىق قالاسىندا دۇنيەگە كەلگەن. 2004 جىلى «ميراس» ۋنيۆەرسيتەتىن، 2010 جىلى م.اۋەزوۆ اتىنداعى وڭتۇستىك قازاقستان مەملەكەتتىك ۋنيۆەرسيتەتىن تامامداعان.
ەڭبەك جولىن 2005 جىلى جەكە كومپانيادا ينجەنەر-جۇيە تەحنيگى بولىپ باستاعان. 2006–2011 جىلدارى مەملەكەتتىك جانە كوممەرتسيالىق ۇيىمداردا ءتۇرلى قىزمەت اتقاردى. 2011 جىلدان مەملەكەتتىك قىزمەتكە كەلىپ، بايلانىس جانە اقپارات مينيسترلىگىندە، كولىك جانە كوممۋنيكاتسيا مينيسترلىگىندە، بايلانىس جانە اقپارات اگەنتتىگىندە، ينۆەستيتسيالار جانە دامۋ مينيسترلىگىندە مەملەكەتتىك قىزمەتتەردى اۆتوماتتاندىرۋ مەن اقپاراتتاندىرۋ باعىتىنداعى باسشىلىق قىزمەتتەردە ەڭبەك ەتكەن.
2016–2018 جىلدارى اقپارات جانە كوممۋنيكاتسيالار مينيسترلىگىندە مەملەكەتتىك قىزمەتتەردى دامىتۋ دەپارتامەنتى ديرەكتورىنىڭ ورىنباسارى، كەيىن اقپاراتتاندىرۋ دەپارتامەنتىنىڭ ديرەكتورى بولعان. 2018 جىلى «ۇلتتىق اقپاراتتىق تەحنولوگيالار» اق باسقارما توراعاسىنىڭ ورىنباسارى بولىپ تاعايىندالعان.
2020 جىلعى اقپاندا تسيفرلىق دامۋ، يننوۆاتسيالار جانە اەروعارىش ونەركاسىبى مينيسترلىگىنىڭ مەملەكەتتىك كورسەتىلەتىن قىزمەتتەر كوميتەتىن باسقارعان. بۇل قىزمەتتە 2023 جىلعى مامىرعا دەيىن وتىرعان.
كەيىن ول قايتادان «ۇلتتىق اقپاراتتىق تەحنولوگيالار» اق-عا كەلىپ، باسقارما توراعاسى قىزمەتىن اتقارعان. 2025 جىلى كومپانيا ديرەكتورلار كەڭەسىنىڭ مۇشەسى بولعانى دا رەسمي قۇجاتتاردا كورسەتىلگەن.
