فوتو: Gov.kz
ماڭعىستاۋ وبلىسىندا كاسپي تەڭىزىندەگى اسكەري وقۋ-جاتتىعۋ كەزىندە اسكەري قىزمەتشىلەردىڭ قازا بولۋىنا بايلانىستى تەرگەۋ جۇرگىزىلىپ جاتىر. تەرگەۋ بارىسىندا وقيعاعا قاتىسى بار دەگەن كۇدىككە ىلىنگەن لاۋازىمدى تۇلعالاردىڭ شەڭبەرى انىقتالدى. بۇل تۋرالى قازاقستان باس پروكۋراتۋراسىنىڭ ءباسپاسوز قىزمەتى مالىمدەدى، دەپ حابارلايدى "ادىرنا".
«قىزمەتىنە سالعىرت قارادى دەگەن كۇدىككە ىلىنگەن، سونداي-اق اۋا رايى جاعدايىن ەسكەرە وتىرىپ، جەكە قۇرامنىڭ قاۋىپسىزدىگىن قامتاماسىز ەتۋ ءۇشىن قاجەتتى باقىلاۋ مەن شارالاردى قابىلداماعان، قۇتقارۋ جۇمىستارىن ءتيىستى دەڭگەيدە ۇيىمداستىرماعان لاۋازىمدى تۇلعالار انىقتالدى. سونىڭ سالدارىنان ادام ولىمىنە جول بەرىلدى»، – دەلىنگەن باس پروكۋراتۋرا حابارلاماسىندا.
سونىمەن قاتار تەرگەۋ بارىسىندا قۇتقارۋ جۇمىستارىنىڭ ءتيىستى دەڭگەيدە ۇيىمداستىرىلماعانى دا قارالىپ جاتىر.
قازىرگى ۋاقىتتا وقيعا ورنى تەكسەرىلىپ، 30-دان استام اسكەري قىزمەتشى جاۋاپ الىنعان. بۇدان بولەك، قاجەتتى قۇجاتتار مەن بەينەماتەريالدار تاركىلەنىپ، 12 ساراپتاما تاعايىندالدى.
باس پروكۋراتۋرا تەرگەۋ ناتيجەسىندە بارلىق كۇدىكتىگە تولىق قۇقىقتىق باعا بەرىلىپ، ولارعا قاتىستى ءتيىستى پروتسەستىك شارالار قابىلداناتىنىن حابارلادى.
ەسكە سالايىق، ماڭعىستاۋ وبلىسىندا اسكەري وقۋ-جاتتىعۋ كەزىندە اۋا رايىنىڭ كۇرت ناشارلاۋىنا بايلانىستى اسكەري قىزمەتشىلەردى تەڭىز اعىزىپ اكەتكەن بولاتىن. ناقتىلانعان مالىمەت بويىنشا، وقۋ-جاۋىنگەرلىك تاپسىرمانى ورىنداۋ كەزىندە تەڭىزگە 17 اسكەري قىزمەتشى كەتكەن.
ولاردىڭ ۇشەۋى قۇتقارىلدى. 14 اسكەري قىزمەتشى قازا تاپتى.
وقيعانىڭ سەبەپتەرىن انىقتاۋ ماقساتىندا پرەمەر-ءمينيستردىڭ ورىنباسارى قانات بوزىمباەۆتىڭ توراعالىعىمەن ۇكىمەتتىك كوميسسيا قۇرىلدى. كوميسسياعا اسكەري قىزمەتشىلەردىڭ قازا بولۋ سەبەپتەرىن جان-جاقتى زەرتتەۋ جانە مارقۇمداردىڭ وتباسىلارىنا قاجەتتى كومەك كورسەتۋ تاپسىرىلدى.
