فوتو: media.az
ازەربايجاندا وسى ەلگە قوسا وزبەكستان جانە تۇركيا اسكەري قوسىندارىنىڭ قاتىسۋىمەن ءوتىپ جاتقان «بىرلىك كۇشى – 2026» بىرلەسكەن اسكەري وقۋ-جاتتىعۋى بارىسىندا تەڭىزدەگى قاۋىپسىزدىكتى قامتاماسىز ەتۋ بويىنشا شارتتى تاپسىرمالار ورىندالدى. بۇل تۋرالى Report جازدى، دەپ حابارلايدى "ادىرنا".
ازەربايجان قورعانىس مينيسترلىگىنىڭ مالىمەتىنشە، كاسپي تەڭىزىنىڭ ازەربايجانعا تيەسىلى اكۆاتورياسىنداعى «بيويۋك زيريا» پوليگونىندا وتكەن جاتتىعۋعا اسكەري-تەڭىز كۇشتەرىنىڭ كۇزەت جانە دەسانتتىق كەمەلەرى قاتىستى.
جاتتىعۋعا دايىندىق جۇمىستارىنا ءۇش ەلدىڭ اسكەري قىزمەتشىلەرى بەلسەندى تۇردە اتسالىستى.
وقۋ-جاتتىعۋ بارىسىندا تەڭىز جانە جاعالاۋ ينفراقۇرىلىمىن قورعاۋ، لاڭكەستەر باسىپ العان كەمە مەن كەپىلدەگىلەردى بوساتۋ، اۋماقتى مينادان تازارتۋ، ارالعا تەڭىز دەسانتىن ءتۇسىرۋ، لاڭكەستەردىڭ بازاسىن جويۋ، سونداي-اق جارالانعاندارعا العاشقى مەديتسينالىق كومەك كورسەتۋ جانە ولاردى ەۆاكۋاتسيالاۋ بويىنشا تاپسىرمالار ورىندالدى.
ايتا كەتەيىك، وقۋ-جاتتىعۋدىڭ نەگىزگى ماقساتى – دوستاس ءارى وداقتاس مەملەكەتتەردىڭ ارميالارى اراسىندا ارنايى وپەراتسيالار جۇرگىزۋ تاجىريبەسىمەن الماسۋ، سونداي-اق بىرلەسكەن ءىس-قيمىلدى ۇيىمداستىرۋ داعدىلارىن جەتىلدىرۋ.
ءۇش ەلدىڭ اسكەري قىزمەتكەرلەرى بىرلەسكەن وپەراتسيالار جۇرگىزۋ مەن بولىمشەلەر اراسىنداعى ءوزارا ءىس-قيمىلدى پىسىقتايدى. سونىمەن قاتار وقۋ-جاتتىعۋدىڭ ماقساتتارى قاتارىندا دايارلىق راسىمدەرىن ستاندارتتاۋ، تاجىريبە الماسۋ جانە جاۋىنگەرلىك مىندەتتەردى ورىنداۋدىڭ جاڭا تاسىلدەرىن مەڭگەرۋ بار. جاتتىعۋدىڭ قاشان اياقتالاتىنى ازىرگە جاريالانعان جوق.
ايتا كەتەيىك، وزبەكستاننىڭ ۇشجاقتى اسكەري جاتتىعۋعا قاتىسۋى انكارامەن قورعانىس سالاسىنداعى ىنتىماقتاستىقتىڭ كەڭەيۋى اياسىندا ءوتىپ جاتىر. ءساۋىر ايىندا وزبەكستان پرەزيدەنتى شاۆكات ميرزيوەۆكە تۇركيامەن اسكەري مامانداردى بىرلەسىپ دايارلاۋ، ۆەدومستۆوارالىق بايلانىستار جانە اسكەري-تەحنيكالىق ارىپتەستىك تۋرالى باياندالعان بولاتىن.
كەيىنىرەك تۇرىك تاراپى وزبەكستانعا اسكەري كەڭەسشىلەر توبىن جىبەرگەنىن مالىمدەدى. تۇركيالىق باق-تىڭ مالىمەتىنشە، كەڭەسشى توپتى گەنەرال-مايور باسقارادى. ونىڭ قىزمەتى تۇركيانىڭ ازەربايجان ارمياسىن جاڭعىرتۋ بارىسىندا جيناعان تاجىريبەسىن بولىسۋگە باعىتتالعان.
سونداي-اق تاشكەنت ناتو-عا مۇشە تۇركيادان اسكەري تەحنيكا ساتىپ الىپ جاتىر. بۇعان دەيىن Bayraktar TB2 ۇشقىشسىز ۇشۋ اپپاراتتارى، Ejder Yalçın بروندى كولىكتەرى جەتكىزىلگەنى، سونداي-اق ANKA دروندارىن ساتۋ ماسەلەسى قاراستىرىلىپ جاتقانى حابارلانعان. الايدا تەحنيكانىڭ ناقتى سانى مەن كەلىسىمشارتتاردىڭ قۇنى جاريا ەتىلمەدى.
