فوتو: اگيباي اياپبەرگەنوۆ / Kazinform
استانادا AI كومەگىمەن جاسالعان فيلمدەردىڭ حالىقارالىق فەستيۆالى باستالدى. 1 قازاندا Astana AI Film Festival-ءدىڭ العاشقى كۇنى ءوتىپ، فينالعا جولداما العان جۇمىستاردىڭ جابىق كورسەتىلىمى ۇيىمداستىرىلدى.
زالعا جينالعان كورەرمەندەر ەكراننان اقش، كانادا، يتاليا، وڭتۇستىك كورەيا، قىتاي جانە قازاقستان اۆتورلارىنىڭ جۇمىستارىن تاماشالادى. بىرنەشە فيلم كورەرمەننىڭ ەرەكشە قىزىعۋشىلىعىن تۋدىرسا، كەيبىر تۋىندىلار كورسەتىلىمنەن كەيىن قىزۋ تالقىلاندى. ويتكەنى بۇل جولى ەكرانداعى كادرلاردىڭ ارتىندا جاساندى ينتەللەكت تۇر.
فەستيۆالگە الەمنىڭ 125 ەلىنەن 8 مىڭنان استام ءوتىنىم تۇسكەن. سونىڭ ىشىنەن 25 جۇمىس فينالعا ءوتتى. ولاردىڭ اراسىندا ەكى قازاقستاندىق اۆتوردىڭ تۋىندىسى بار.
فەستيۆالدىڭ تەڭ قۇرىلتايشىسى ءارى كەڭەس توراعاسى الماس جالي قازاقستاندىق اۆتورلاردىڭ جۇمىستارى شەتەلدىك فيناليستەردەن كەم تۇسپەيتىنىن ايتتى.
«125 ەلدەن قاتىسۋشىلار قاتىستى. سولاردىڭ اراسىنان 25 جۇمىستى ىرىكتەپ الدىق. سول 25 جۇمىستىڭ ىشىندە ەكى قازاقستاندىق جىگىتتىڭ جۇمىسى بار. ەكەۋى دە وتە جاقسى جۇمىس جاسادى. ولار بىزگە كەلگەن قوناقتارمەن باسەكەگە ابدەن تۇسە الادى»، – دەدى الماس جالي.
ونىڭ ايتۋىنشا، فينالعا وتكەن جۇمىستاردىڭ باسىم بولىگىندە ءارتۇرلى AI-مودەلدەر قولدانىلعان. سونىڭ ىشىندە Seedance 2.5 مودەلى دە ءجيى پايدالانىلعان.
«نەگىزىنەن AI مودەلدەر وتە كوپ. ءبىزدىڭ جۇمىستارىمىزدىڭ شامامەن 80 پايىزى Seedance 2.5-كە جاسالعان. ول – قىتايلىق ByteDance كومپانياسىنىڭ مودەلى. وتە جاقسى جۇمىستار جاسالعان»، – دەدى ول.
كورسەتىلىم اياقتالعاننان كەيىن زالداعى كورەرمەندەردىڭ اسەرى دە بىردەن بايقالدى. ءبىرى كورگەن تۋىندىسىن تالقىلاپ جاتسا، ەندى ءبىرى جاساندى ينتەللەكت ارقىلى مۇنداي فيلمدەردى جاساۋعا بولاتىنىنا تاڭدانىسىن ءبىلدىردى. اسىرەسە قازاقستاندىق اۆتورلاردىڭ جۇمىستارى كورەرمەن نازارىنان تىس قالمادى.
ال فەستيۆالدىڭ ءوزى مۇنىمەن اياقتالعان جوق. 2 جانە 3 قازان كۇندەرى فينالدىق باعدارلاما جالعاسىپ، كورەرمەندەر فيناليستەردىڭ جۇمىستارىن MEGA Silk Way-دەگى Chaplin كينوتەاترىنان تاماشالاي الادى. 3 قازاندا فەستيۆالدىڭ جەڭىمپازدارى جاريالانادى.
