جالپى شىعىنى 10 ميلليون دوللار كولەمىندە بولعان، رەجيسسەر اقان ساتاەۆتىڭ «توميريس» ءفيلمى قىركۇيەكتىڭ 2-ءسى مەن 13-ءى ارالىعىندا پاريجدە وتكەن فرانتسيالىق L'Étrange Festival كينوفەستيۆالىنىڭ گران-ءپريىن جەڭىپ الدى.
«قازاقفيلمنىڭ» ءباسپاسوز قىزمەتى ارنايى «جاڭا جانر» جۇلدەسىن فرانتسياداعى ەڭ ءىرى اقىلى تەلەارنالاردىڭ ءبىرى Canal+ تابىستاپ، ءفيلمدى كورسەتۋ قۇقىعىن ساتىپ الىپ، پرايم-تايم ۋاقىتىندا كورسەتۋدى جوسپارلاپ وتىرعانىن دا ايتتى.
اتالعان كينوتۋىندى بىزدىڭ زامانىمىزعا دەيىنگى VI عاسىردا بولعان وقيعالار تىزبەگىن بايان ەتەدى. ۇلى دالادا عۇمىر كەشىپ، الەمدىك اڭىزعا اينالعان باتىر قىز جايلى فيلم 93 كۇندە ءتۇسىرىلىپ بىتكەن. جالپى جوبانى ەكرانعا تولىق شىعارۋ ءۇشىن ەكى جارىم جىل ۋاقىت جۇمسالدى. ءتۇسىرىلىم الاڭىندا ءبىر ۋاقىتتا 800 ادامعا جۋىق كىسى جۇمىس ىستەگەن كۇندەر دە بولعان. شىعارماشىلىق توپتىڭ قۇرامىنا ەڭ كوپ دەگەندە 400 ادام قاتىسقان. ءتورت ۇلكەن لوكاتسيا – شونجى، قاپشاعاي جانە الماتى، كوكشەتاۋ وڭىرلەرىندە جاسالعان بولاتىن.
ء"بىز ەڭ باسىندا مۇمكىن ۆاۆيلون، كير پاتشاسى بار كينو بولىكتەرىن ماروككودا تۇسىرەمىز دەپ ويلاعانبىز. بىراق، ءبىزدىڭ سۋرەتشىلەرىمىز بارىپ، ول جاقتىڭ دەكوراتسيالارىن كورىپ كەلگەننەن كەيىن كىشكەنە قاراجات جاعىن ۇنەمدەۋ تۋرالى شەشىم قابىلداندى", – دەگەن ەدى فيلم رەجيسسەرى اقان ساتاەۆ.
فيلم قر مادەنيەت جانە سپورت مينيسترلىگىنىڭ تاپسىرىسىمەن «قازاقفيلم» كينوستۋدياسىندا Sataifilm كومپانياسىنىڭ قاتىسۋىمەن تۇسىرىلگەن.
ۇلاربەك دالەيۇلى
"ادىرنا" ۇلتتىق پورتالى
سۋرەت فيلمنەن الىندى
