شىمكەنتتە قالا تۇرعىندارى مەن قوناقتارىنا ەرەكشە كوڭىل-كۇي سىيلاعان اۋقىمدى گاسترونوميالىق فەستيۆال ءوتتى.
«Visit Shymkent» تۋريستىك اقپاراتتىق ورتالىعى ۇيىمداستىرعان «Street Food Fest» شاراسى ەتنو-اۋىل كەشەنىنىڭ اۋماعىندا ءوتىپ، قالاداعى تاعام يندۋسترياسىنىڭ ۇزدىك وكىلدەرىن ءبىر الاڭعا جينادى.
فەستيۆالدىڭ ماقساتى – زاماناۋي كوشە تاعامدارى مادەنيەتىن دامىتۋ، جەرگىلىكتى كاسىپكەرلەردىڭ ونىمدەرىن كەڭىنەن تانىستىرۋ جانە شىمكەنتتىڭ گاسترونوميالىق ءارى تۋريستىك الەۋەتىن كورسەتۋ. سونىمەن بىرگە، شارا قالا تۇرعىندارىنا وتباسىمەن، دوستارىمەن بىرگە ۋاقىت وتكىزىپ، ءتۇرلى تاعامداردان ءدام تاتىپ، مۋزىكا تىڭداپ، كوڭىل كوتەرۋگە مۇمكىندىك بەردى.
فەستيۆال اياسىندا ارنايى گاسترونوميالىق الاڭ ۇيىمداستىرىلىپ، وعان شىمكەنتتەگى 40 ۇزدىك فۋد-لوكاتسيا قاتىستى. كەلۋشىلەر ءتۇرلى تاعامداردان ءدام تاتىپ، وزدەرىنە ۇناعان ورىندارمەن تانىستى. ءبىر جەردە ىستىق تاعامدار ازىرلەنسە، ەندى ءبىر جەردە تاتتىلەر مەن سۋسىنداردىڭ ءتۇر-ءتۇرى ۇسىنىلدى. سوندىقتان فەستيۆال اۋماعىندا ادام قاراسى دا ازايماي، شارا باستالعاننان سوڭ-اق قىزۋ اتموسفەرا قالىپتاستى.
قالا تۇرعىندارىنىڭ ءبىرى گۇلناز مۋسليموۆا فەستيۆالدەن العان اسەرىمەن ءبولىستى.
– بۇگىن قالامىزدا وسىنداي كەرەمەت فەستيۆال ءوتىپ جاتقانىنا قۋانىشتىمىز. كەلىپ، جاقسى اسەر الىپ جاتىرمىز. كوشە تاعامدارىنىڭ بىرنەشە تۇرىنەن ءدام تاتىپ كوردىك. بارلىعى قىزىقتى ۇيىمداستىرىلعان. مۇندا تەك تاماقتانىپ قانا قويماي، ءتۇرلى ويىندارعا قاتىسىپ، اۋەن تىڭداپ، كوڭىل كوتەرۋگە بولادى. دوستارىمىزبەن بىرگە جاقسى ۋاقىت وتكىزىپ جاتىرمىز. وسىنداي شارالار ءجيى ۇيىمداستىرىلسا، قالا تۇرعىندارى ءۇشىن دە، قوناقتار ءۇشىن دە جاقسى بولار ەدى، – دەدى قالا تۇرعىنى.
شارانىڭ ەڭ ەرەكشە ءارى كوپشىلىكتىڭ قىزىعۋشىلىعىن تۋدىرعان ساتتەرىنىڭ ءبىرى – كولەمى مەن سالماعى جاعىنان اۋقىمدى حوت-دوگ دايىنداۋ بولدى. بۇل باستاما قازاقستاننىڭ رەكوردتار كىتابىنا ەنۋ ماقساتىندا ۇيىمداستىرىلدى.
«Visit Shymkent» تۋريستىك اقپاراتتىق ورتالىعىنىڭ ديرەكتورى زامانبەك ورىنبەكوۆ فەستيۆالدىڭ باستى ەرەكشەلىكتەرىنىڭ ءبىرى وسى رەكوردتىق حوت-دوگ دايىنداۋ ەكەنىن اتاپ ءوتتى.
– بيىلعى فەستيۆالدى ەرەكشە فورماتتا وتكىزۋدى ماقسات ەتتىك. ونىڭ ءبىر ەرەكشەلىگى – قازاقستاننىڭ رەكوردتار كىتابىنا ەنۋگە تالپىنىس جاساپ، ەڭ ۇلكەن حوت-دوگ دايىنداۋ. بۇل جاي عانا كولەمدى تاعام ازىرلەۋ ەمەس، فەستيۆالدىڭ ەستە قالارلىق ساتتەرىنىڭ بىرىنە اينالاتىن ەرەكشە جوبا. ونى جۇزەگە اسىرۋعا سەرىكتەستەرىمىز دە ۇلكەن قولداۋ كورسەتتى. اتاپ ايتقاندا، Zigi Zagi سۋسىنى مەن «نارلەن» كومپانياسى ءبىزدىڭ باستى سەرىكتەستەرىمىزدىڭ قاتارىندا. وسىنداي قولداۋدىڭ ارقاسىندا فەستيۆالدى مازمۇندى ءارى قىزىقتى وتكىزۋگە مۇمكىندىك بولدى، – دەدى ورتالىق ديرەكتورى.
رەكوردتىق حوت-دوگتى دايىنداۋ بارىسىن فەستيۆال قوناقتارى قىزىعۋشىلىقپەن تاماشالادى. ەرەكشە تاعامنىڭ ازىرلەنۋى كوپشىلىك ءۇشىن كۇتپەگەن ءارى ەستە قالارلىق كورىنىسكە اينالدى.
فەستيۆالدە گاسترونوميالىق باعدارلامامەن قاتار مادەني-مۋزىكالىق شارالارعا دا كەڭ ورىن بەرىلدى. كەش بويى ساحنادا ءتۇرلى مۋزىكالىق كومپوزيتسيالار ورىندالىپ، كورەرمەندەرگە مەرەكەلىك كوڭىل-كۇي سىيلاندى. ال، كەشتىڭ باستى مۋزىكالىق قوناقتارىنىڭ ءبىرى – تانىمال قازاقستاندىق ورىنداۋشى Ziruza بولدى.
ءانشىنىڭ ونەرىن تاماشالاۋعا جينالعان كورەرمەندەر انگە قوسىلىپ، فەستيۆالدىڭ جالپى اتموسفەراسىن ودان ءارى جانداندىرا ءتۇستى. وسىلايشا، تاعام مەن مۋزىكا ۇيلەسىپ، شارا كادىمگى گاسترونوميالىق جارمەڭكەدەن كوڭىلدى قالالىق مەرەكەگە ۇلاستى.
«Street Food Fest» ارقىلى شىمكەنتتىڭ گاسترونوميالىق مادەنيەتى عانا ەمەس، قالانىڭ تۋريستىك الەۋەتى دە كەڭىنەن تانىستىرىلدى. كوشە تاعامدارى بۇگىندە كوپتەگەن قالالارداعى تۋريستىك مادەنيەتتىڭ ءبىر بولىگىنە اينالىپ كەلەدى. شىمكەنت ءۇشىن دە مۇنداي شارالار جەرگىلىكتى تاعام ورىندارىن تانىتىپ، شاھاردىڭ وزىندىك ءدامىن قالا تۇرعىندارى مەن قوناقتارىنا كورسەتۋگە مۇمكىندىك بەرەدى.
ەتنو-اۋىلدىڭ ۇلتتىق ناقىشتاعى ورتاسى مەن زاماناۋي street food فورماتىنىڭ قاتار ۇيلەسۋى دە فەستيۆالدىڭ وزىندىك ەرەكشەلىگىن ايقىندادى. قوناقتار ءبىر جاعىنان ۇلتتىق اتموسفەرانى سەزىنسە، ەكىنشى جاعىنان زاماناۋي تاعام مادەنيەتىنىڭ ءتۇرلى ۇلگىلەرىمەن تانىستى.
«Street Food Fest» وسىلايشا شىمكەنتتىڭ گاسترونوميالىق مادەنيەتىن تانىتقان، جەرگىلىكتى كاسىپكەرلەردىڭ باسىن قوسقان جانە قالا تۇرعىندارىنا كوتەرىڭكى كوڭىل-كۇي سىيلاعان مازمۇندى شارالاردىڭ بىرىنە اينالدى.
