قورعانىس ءمينيسترى، گەنەرال-مايور ايدوس مىرزاحمەتوۆ اقمولا گارنيزونىنداعى اسكەري بولىمدەردىڭ بىرىنە توسىن تەكسەرۋ جۇرگىزدى. بۇل تۋرالى 4 قازاندا مينيسترلىكتىڭ ءباسپاسوز قىزمەتى ايتتى، دەپ حابارلايدى «ادىرنا» ءتىلشىسى.
تەكسەرۋ بارىسىندا گەنەرال-مايور ايدوس مىرزاحمەتوۆ اسكەري بولىمدەگى قىزمەتتىڭ ۇيىمداستىرىلۋىمەن تانىسىپ، اسكەري قىزمەتكەرلەردىڭ ورنالاسۋ جانە تۇرمىس جاعدايىن باعالاعان. اسىرەسە كازارمالاردىڭ جاي-كۇيى مەن ءبولىم ينفراقۇرىلىمىنىڭ جاعدايىنا ەرەكشە نازار اۋدارىلعان.
سونداي-اق اسكەري قىزمەتكەرلەردىڭ كۇندەلىكتى قىزمەت وتكەرۋىنە جاسالعان جاعدايلار، تۇرمىستىق قامتاماسىز ەتۋ ماسەلەلەرى جانە اسكەري نىسانداردىڭ تەحنيكالىق جاعدايى زەردەلەنگەن.
تەكسەرۋ قورىتىندىسى بويىنشا اسكەري قىزمەتكەرلەردىڭ الەۋمەتتىك-تۇرمىستىق جاعدايىن جاقسارتۋعا، اسكەري ينفراقۇرىلىمدى ودان ءارى جەتىلدىرۋگە باعىتتالعان ناقتى تاپسىرمالار بەرىلگەن.
ەسكە سالايىق، ايدوس مىرزاحمەتوۆ قورعانىس ءمينيسترى قىزمەتىنە 27 قىركۇيەكتە تاعايىندالعان ەدى.
