فوتو: اقوردا
مەملەكەت باسشىسى قاسىم-جومارت توقاەۆ جوعارى اۋديتورلىق پالاتانىڭ توراعاسى ءاليحان سمايىلوۆتى قابىلدادى. بۇل تۋرالوى اقوردا جازدى، دەپ حابارلايدى “ادىرنا”.
قاسىم-جومارت توقاەۆقا قورعانىس مينيسترلىگىندە بيۋدجەت قاراجاتىنىڭ جۇمسالۋ تيىمدىلىگىنە قاتىستى جوسپاردان تىس جۇرگىزىلىپ جاتقان اۋديت تۋرالى ەسەپ بەرىلدى.
“اۋقىمدى تەكسەرىس 50 نىساندى، سونىڭ ىشىندە 48 اسكەري ءبولىمدى قامتيدى. وسى ماقساتتا مەملەكەتتىك اۋديت جۇيەسىنىڭ جەتەكشى ماماندارىنان، سونداي-اق IT جانە بايلانىس سالاسى ساراپشىلارىنان ارنايى توپ جاساقتالدى. اۋديت اياسىندا قارۋلى كۇشتەر قىزمەتىنىڭ بارلىق نەگىزگى باعىتىنداعى احۋالعا باعا بەرىلەدى", — دەلىنگەن حابارلامادا.
اتاپ ايتقاندا، اسكەري بولىمشەلەردىڭ ماتەريالدىق-تەحنيكالىق قامتاماسىز ەتىلۋى، جەكە قۇرامنىڭ دايارلىعى، اسكەري وقۋ-جاتتىعۋ جيىندارىنىڭ وتكىزىلۋى، اسكەري ينفراقۇرىلىمنىڭ دامۋى، قارۋ-جاراق پەن تەحنيكانىڭ جاڭعىرۋى، تسيفرلىق جۇيەلەردىڭ اقاۋسىز جۇمىس ىستەۋى تۇگەل تەكسەرىلمەك.
پرەزيدەنتكە مەملەكەتتىڭ قورعانىس سالاسىنداعى تاپسىرىسىنا جۇرگىزىلگەن ءاۋديتتىڭ ناتيجەلەرى تانىستىرىلدى.
"جوعارى اۋديتورلىق پالاتا تەكسەرىس قورىتىندىسى بويىنشا انىقتالعان زاڭ بۇزۋشىلىقتاردى جويۋ ءۇشىن ۇكىمەتكە جانە سالالىق مەملەكەتتىك ورگاندارعا 57 ناقتى ۇسىنىم مەن تاپسىرما جولدادى. سونىمەن قاتار مەملەكەت باسشىسىنا ەكونوميكالىق دامۋ مەن الەۋمەتتىك سالانىڭ باسىم باعىتتارىن قامتيتىن جوسپارلى اۋديتورلىق تەكسەرىستىڭ بارىسى باياندالدى”، – دەپ حابارلادى اقوردادان.
بۇدان بولەك، ءاليحان سمايىلوۆ استانادا وتكەن ازيا جوعارى اۋديت ورگاندارى ۇيىمى باسقارما كەڭەسىنىڭ 63-وتىرىسىنىڭ قورىتىندىسى تۋرالى ايتتى. جيىنعا 19 ەلدىڭ وكىلى قاتىسقان. مۇنداي فورماتتاعى ءىس-شارا قازاقستاندا العاش رەت وتكىزىلىپ وتىر.
كەزدەسۋ سوڭىندا پرەزيدەنت قورعانىس مينيسترلىگىندە اۋديت جۇرگىزۋگە جانە تۇتاس مەملەكەتتىك اۋديت جۇيەسىن ودان ءارى جەتىلدىرۋگە قاتىستى بىرقاتار ناقتى تاپسىرما بەردى.
ەسكە سالساق، جوعارى اۋديتورلىق پالاتا قورعانىس مينيسترلىگىنىڭ بيۋدجەتى مەن اسكەري بولىمدەردىڭ ماتەريالدىق-تەحنيكالىق قامتاماسىز ەتىلۋىنە اۋديت جۇرگىزۋدى باستاعان بولاتىن.
قورعانىس سالاسىنا تەكسەرىس جۇرگىزۋگە 24 قىركۇيەك كۇنى كاسپيدە بولعان قايعىلى وقيعا سەبەپ بولدى. اسكەري وقۋ-جاتتىعۋ كەزىندە 17 اسكەري قىزمەتشىنى اشىق تەڭىزگە الىپ كەتكەنى بولاتىن. ولاردىڭ ۇشەۋى قۇتقارىلىپ، 14 اسكەري قىزمەتشى قازا تاپقان ەدى.
