ۋكراينا پرەزيدەنتى ۆلاديمير زەلەنسكيگە گەسسەن جەرىنىڭ ەڭ جوعارى ناگراداسى — ۆيلگەلم لويشنەر مەدالى تابىستالدى. بۇل تۋرالى DW باسىلىمى جازدى، دەپ حابارلايدى «ادىرنا» ءتىلشىسى.
مالىمەتكە سايكەس، بيلىك بۇل ناگرادا ارقىلى ونىڭ «ۋكراينانىڭ اۋماقتىق تۇتاستىعى، بوستاندىعى مەن دەموكراتياسى جولىنداعى تىنىمسىز كۇرەسىن» اتاپ ءوتۋدى ۇيعارعان.
مەدال جىل سايىن 1 جەلتوقساندا اتاپ وتىلەتىن گەسسەن كونستيتۋتسياسى كۇنىنە وراي بەرىلەدى. بيىل بۇل ناگرادا ۆلاديمير زەلەنسكيگە تابىستاۋ تۋرالى شەشىم قابىلدانعان. بۇل تۋرالى گەسسەن پرەمەر-ءمينيسترى بوريس راين مالىمدەدى. ونىڭ ايتۋىنشا، ماراپات بۇكىل ۋكراين حالقىنا ارنالادى.
ايتا كەتەيىك، ۆيلگەلم لويشنەر مەدالى — ۋكراينا پرەزيدەنتىنىڭ گەرمانيادا العان العاشقى ناگراداسى ەمەس. 2023 جىلعى مامىردا احەن قالاسىندا زەلەنسكيگە جانە ۋكراين حالقىنا كارلدىڭ حالىقارالىق سىيلىعى تابىستالعان.
ال بيىلعى اقپاندا زەلەنسكي ميۋنحەندەگى 62-ءشى حالىقارالىق قاۋىپسىزدىك كونفەرەنتسياسىندا (MSC) ەۆالد فون كلەيست اتىنداعى سىيلىقتى يەلەنگەن.
باسىلىمنىڭ جازۋىنشا، ۆيلگەلم لويشنەر — گەرمانياداعى قارسىلاسۋ قوزعالىسىنىڭ مۇشەسى. ول 1944 جىلعى 20 شىلدەدە ادولف گيتلەرگە جاسالعان قاستاندىق ارەكەتى ءساتسىز اياقتالعاننان كەيىن ءولىم جازاسىنا كەسىلگەن.
