فوتو: Lara.kz
ماڭعىستاۋ وبلىستىق بالالار اۋرۋحاناسىنىڭ قابىلداۋ بولىمىندە بالانىڭ اكەسى بالالار حيرۋرگىنە شابۋىل جاساپ، ونىڭ تاماعىنان ۇستاعان. وقيعاعا بايلانىستى پوليتسيا قىلمىستىق ءىس قوزعادى، دەپ حابارلايدى "ادىرنا" پورتالى Lada.kz-كە سىلتەمە جاساپ.
اۋرۋحانا قىزمەتكەرلەرىنىڭ مالىمەتىنشە، جانجال كەشە بولعان. دارىگەر كىشكەنتاي پاتسيەنتتى تەكسەرىپ، ونىڭ اكەسىنە مەديتسينالىق قورىتىندىنى تۇسىندىرگەن. بالانى اۋرۋحاناعا جاتقىزۋعا قاجەتتىلىك بولماعان.
الايدا دارىگەردىڭ شەشىمىنە كەلىسپەگەن اكەسى اشۋعا بەرىلىپ، ۇستەلدى تەۋىپ، حيرۋرگكە تاپ بەرگەن. وقيعا كۋاگەرلەرى ەر ادامدى توقتاتىپ، دارىگەردى اراشالاپ قالعان. مەديتسينالىق مەكەمە قىزمەتكەرلەرى بىردەن پوليتسيا شاقىرعان.
بۇگىن بالالار حيرۋرگى جۇمىسقا قايتا شىعىپ، كەزەكشىلىگىنە كىرىسكەن.
الەۋمەتتىك جەلى قولدانۋشىلارى دارىگەرگە جاسالعان شابۋىلدى ايىپتاپ، كىنالى ازاماتتى زاڭ اياسىندا جاۋاپقا تارتۋدى تالاپ ەتتى. سونداي-اق اۋرۋحانالارداعى قاۋىپسىزدىك شارالارىن كۇشەيتۋ قاجەتتىگىن اتاپ ءوتتى.
ماڭعىستاۋ وبلىستىق پوليتسيا دەپارتامەنتىنىڭ حابارلاۋىنشا، اتالعان دەرەك بويىنشا قىلمىستىق ءىس قوزعالعان. قازىر سوتقا دەيىنگى تەرگەپ-تەكسەرۋ جۇرگىزىلىپ، وقيعانىڭ ءمان-جايى مەن جانجالعا قاتىسۋشىلاردىڭ ارەكەتتەرى انىقتالىپ جاتىر.
