داۋرەن بولاتۇلى مۇراتبەكوۆ قازاقستان رەسپۋبليكاسى جوعارى سوت كەڭەسىنىڭ حاتشىسى – اپپارات باسشىسى لاۋازىمىنان بوساتىلدى، دەپ حابارلايدى "ادىرنا" ۇلتتىق پورتالى.
«مەملەكەت باسشىسىنىڭ وكىمىمەن داۋرەن بولاتۇلى مۇراتبەكوۆ قازاقستان رەسپۋبليكاسى جوعارى سوت كەڭەسىنىڭ حاتشىسى – اپپارات باسشىسى لاۋازىمىنان بوساتىلدى»، – دەلىنگەن اقوردا حابارلاماسىندا.
ايتا كەتەيىك، داۋرەن مۇراتبەكوۆ 1984 جىلعى 13 ماۋسىمدا دۇنيەگە كەلگەن. 2006 جىلى ل.ن. گۋميلەۆ اتىنداعى ەۋرازيا ۇلتتىق ۋنيۆەرسيتەتىن «حالىقارالىق قۇقىق» ماماندىعى بويىنشا، 2008 جىلى ا. مىرزاحمەتوۆ اتىنداعى كوكشەتاۋ ۋنيۆەرسيتەتىن «قارجى» ماماندىعى بويىنشا تامامداعان.
ەڭبەك جولىن 2006 جىلى قازاقستان رەسپۋبليكاسى ەكونوميكا جانە بيۋدجەتتىك جوسپارلاۋ مينيسترلىگىندە باستاعان. ءار جىلدارى مەملەكەتتىك ورگانداردا جانە ۇلتتىق كومپانيالاردا ءتۇرلى لاۋازىمدار اتقارعان.
2014 جىلدىڭ قازان ايىنان باستاپ ۇلتتىق ەكونوميكا مينيسترلىگىنىڭ زاڭ دەپارتامەنتىن باسقاردى. 2018 جىلدىڭ قازان ايىندا پرەزيدەنت اكىمشىلىگىنىڭ مەملەكەتتىك-قۇقىقتىق ءبولىمىنىڭ سەكتور مەڭگەرۋشىسى بولىپ تاعايىندالدى.
2023 جىلدىڭ قاراشاسىنان باستاپ پرەزيدەنت اكىمشىلىگىنىڭ مەملەكەتتىك ينسپەكتورى قىزمەتىن اتقاردى.
ال 2024 جىلعى 9 اقپاندا مەملەكەت باسشىسىنىڭ وكىمىمەن قازاقستان رەسپۋبليكاسى جوعارى سوت كەڭەسىنىڭ حاتشىسى – اپپارات باسشىسى لاۋازىمىنا تاعايىندالعان ەدى.
