فوتو: Chris Unger/Zuffa LLC via Getty Images
اقش پرەزيدەنتى دونالد ترامپ UFC ۇيىمىنىڭ پرەزيدەنتى دانا ۋايتقا اق ءۇيدىڭ ءباسپاسوز حاتشىسى قىزمەتىن ۇسىندى. بۇل تۋرالى ول سەنبى كۇنى Truth Social الەۋمەتتىك جەلىسىندەگى پاراقشاسىندا جازدى، دەپ حابارلايدى "ادىرنا".
ترامپ ءوز جازباسىندا دانا ۋايتتى «ۇلى جاۋىنگەر ءارى قايسار كۇرەسكەر» دەپ اتاپ، ونىڭ اق ءۇيدىڭ ءباسپاسوز حاتشىسى بولعانىن قالايتىنىن جەتكىزگەن. سونداي-اق UFC-ءدىڭ بىرنەشە تانىمال سپورتشىسىن وعان كومەكشى رەتىندە ۇسىنعان.
اتاپ ايتقاندا، ترامپ يسلام ماحاچەۆ، حابيب نۋرماگومەدوۆ، دجاستين گەتجي، دانيەل كورمە، اماندا نۋنەس جانە كايلا ءحارريستىڭ ەسىمدەرىن اتاعان.
«دانا بۇرىن-سوڭدى بولماعان ءباسپاسوز حاتشىسى بولادى. دانا، وتىنەمىن، بۇل قىزمەتكە كەلىس!» – دەپ جازدى اقش پرەزيدەنتى.
الايدا CNN تەلەارناسى دەرەككوزدەرىنە سىلتەمە جاساپ، دانا ۋايتتىڭ بۇل ۇسىنىستان باس تارتقانىن حابارلادى. تەلەارنا سۇحباتتاستارىنىڭ ءبىرى ترامپتىڭ مۇنداي ۇسىنىستى ءازىل رەتىندە جاساعان بولۋى مۇمكىن ەكەنىن دە ايتقان.
سوعان قاراماستان، ۋايت ترامپپەن كەزدەسەتىنىن راستادى. ول لوندوندا جۋرناليستەرگە دۇيسەنبى كۇنى اقش استاناسى ۆاشينگتونعا بارىپ، پرەزيدەنتپەن جۇزدەسەتىنىن مالىمدەدى.
«دۇيسەنبى كۇنى ترامپپەن كەزدەسۋىم بار. ودان نە شىعاتىنىن كورە جاتارمىز»، – دەدى UFC باسشىسى.
سونىمەن قاتار دانا ۋايت قازىرگى ۋاقىتتا جۇمىسىنىڭ ونسىز دا كوپ ەكەنىن اتاپ ءوتتى.
«قازىردىڭ وزىندە اتقاراتىن جۇمىسىم جەتكىلىكتى»، – دەدى ول.
بۇعان دەيىن ۋايت ترامپتىڭ الەۋمەتتىك جەلىدەگى جازباسىن ءوز پاراقشاسىندا ءبولىسىپ، اق ءۇيدىڭ ءباسپاسوز بريفينگتەرى وتەتىن زالداعى مىنبەردىڭ ارتىندا تۇرعان سۋرەتىن جاريالاعان. فوتوسۋرەتكە «كەلەسى تاراۋعا قادام باسامىز» دەگەن جازبا قالدىرعانىمەن، ونىڭ ناقتى نەنى مەڭزەگەنىن تۇسىندىرمەدى.
ايتا كەتەيىك، دانا ۋايت رەسپۋبليكالىق پارتيانى اشىق قولدايدى. ول پارتيانىڭ 2016, 2020 جانە 2024 جىلدارداعى سەزدەرىندە ءسوز سويلەگەن.
ال اق ءۇيدىڭ ءباسپاسوز حاتشىسى قىزمەتى بىرنەشە ايدان بەرى بوس تۇر. تامىز ايىندا كەرولاين لەۆيتت وتباسىمەن كوبىرەك ۋاقىت وتكىزۋ ماقساتىندا قىزمەتىنەن كەتكەن بولاتىن. كەيىن ونىڭ ورنىنا كەتي زاحاريا تاعايىندالعانىمەن، ول بۇل قىزمەتتە نەبارى بەس كۇن جۇمىس ىستەگەن.
ترامپتىڭ دانا ۋايتقا قاتىستى ۇسىنىسى اقش اكىمشىلىگىندەگى كادرلىق وزگەرىستەر كەزەڭىندە جاريالاندى. جۇما كۇنى پرەزيدەنت اق ءۇي اپپاراتى باسشىسىنىڭ ورىنباسارى ستيۆەن ميللەردىڭ وسى قۇرىلىمنىڭ باسشىسى قىزمەتىنە تاعايىندالاتىنىن، ونىڭ سيۋزي ۋايلستىڭ ورنىنا كەلەتىنىن مالىمدەگەن.
