اۋىلداعى شاعىن سپورت زالىندا ۇلكەن ارمانعا قانات بىتىرگەن 1700 جاس سپورتشى استانادا باس قوستى. 3–7 قاراشا ارالىعىندا وتكەن AUYL SPORT – 2026 رەسپۋبليكالىق تۋرنيرىندە ەلىمىزدىڭ 17 وڭىرىنەن كەلگەن ورەندەر سەگىز سپورت تۇرىنەن باق سىناپ، 107 مەدال ساراپقا سالىندى. بيىلعى جارىستىڭ ەرەكشەلىگى – جەڭىمپازداردىڭ جەتىستىگى تۋعان اۋىلدارىنا دا جاڭا مۇمكىندىك سىيلاماق.
ءۇشىنشى جىل قاتارىنان ۇيىمداستىرىلعان دودادا بالالار بوكس، ەركىن كۇرەس، كاراتە، باسكەتبول، ۆولەيبول، شاحمات، ۇستەل تەننيسى جانە شاعىن فۋتبولدان سىنعا ءتۇستى. AUYL SPORT – تيمۋر قۇلىباەۆتىڭ Halyk قايىرىمدىلىق قورى قولداپ وتىرعان الەۋمەتتىك جوبالاردىڭ ءبىرى. باستاما اۋىل بالالارىنىڭ سپورتپەن اينالىسۋىنا، قابىلەتىن شىڭداۋىنا جانە رەسپۋبليكالىق، حالىقارالىق جارىستاردا باق سىناۋىنا مۇمكىندىك بەرىپ كەلەدى.
ءتۋرنيردىڭ اشىلۋىندا ءسوز سويلەگەن Halyk Bank باسقارما توراعاسىنىڭ ورىنباسارى ناريمان مۇقىشەۆ اۋىل بالالارىنىڭ سپورتتاعى بولاشاعى تۇرعىلىقتى جەرىنە نەمەسە وتباسىنىڭ جاعدايىنا تاۋەلدى بولماۋى كەرەكتىگىن اتاپ ءوتتى.
«بالانىڭ تالانتى مەن جەڭىسكە دەگەن ۇمتىلىسى ونىڭ قاي جەردە تۋىپ-وسكەنىنە بايلانىستى ەمەس. ءار اۋىلدا، ءار ەلدى مەكەندە ۇلكەن سپورتتى ارماندايتىن بالالار بار. ءبىزدىڭ مىندەتىمىز – ولاردىڭ سول ارمانعا جەتۋىنە مۇمكىندىك جاساۋ»، – دەدى ول.
جارىستىڭ اسەرلى ساتتەرىنىڭ ءبىرى – اتاسى مەن اجەسىنە بەرگەن ۋادەسىن ورىنداعان جاس چەمپيوننىڭ جەڭىسى. بىلتىر اتا-اجەسى تيمۋر قۇلىباەۆتىڭ Halyk قايىرىمدىلىق قورىنىڭ قولداۋىمەن مەككەگە بارعان كەزدە، نەمەرەسى دە ولاردى التىن مەدالمەن قۋانتۋدى ارمانداعان. بيىل جاس سپورتشى ماقساتىنا جەتىپ، جەڭىسىن جاقىندارىنا ارنادى.
مەدالدىق ەسەپتە اتىراۋ مەن الماتى وبلىستارى بەس-بەستەن التىن يەلەنىپ، كوش باستادى. ماڭعىستاۋ وبلىسى ءتورت التىنمەن ۇزدىكتەر قاتارىنان كورىنسە، جالپى جۇلدە سانى بويىنشا تۇركىستان وبلىسى 16 مەدالمەن العا شىقتى.
ءتۋرنيردىڭ ماڭىزدى جاڭالىقتارىنىڭ ءبىرى – تيمۋر قۇلىباەۆتىڭ Halyk قايىرىمدىلىق قورىنىڭ ەلىمىزدىڭ 10 اۋىلىندا كوپفۋنكتسيونالدى سپورت الاڭدارىن سالۋدى جوسپارلاۋى. العاشقى ءۇش نىسان بيىل جەڭىسكە جەتكەن كوماندالاردىڭ اۋىلدارىندا بوي كوتەرمەك. الاڭدار باسكەتبول، ۆولەيبول، شاعىن فۋتبول جانە دەنە شىنىقتىرۋعا ارنالماق. ەڭ باستىسى، ولار سول اۋىلداعى بارلىق بالاعا قولجەتىمدى بولادى.
بيىل جوباعا 17 وڭىردەگى 400-دەن استام اۋىلدان 12 مىڭ بالا قاتىسىپ، ولاردىڭ اراسىنان ىرىكتەلگەن 1700 سپورتشى رەسپۋبليكالىق فينالعا جولداما الدى. قاتىسۋشىلاردىڭ جول ءجۇرۋ، تۇرۋ جانە تاماقتانۋ شىعىندارىن تيمۋر قۇلىباەۆتىڭ Halyk قايىرىمدىلىق قورى تولىق وتەيدى. سونىمەن قاتار اۋىل جاتتىقتىرۋشىلارىنىڭ كاسىبي بىلىكتىلىگىن ارتتىرۋعا دا كوڭىل بولىنگەن.
AUYL SPORT تاربيەلەگەن جاس سپورتشىلار حالىقارالىق جارىستاردا دا تابىسقا جەتىپ ءجۇر. بىلتىر سەربيادا وتكەن ISF U-15 گيمنازياداسىندا ءۇش التىن جانە ءبىر قولا مەدال يەلەنسە، بيىل تۇركياداعى ۆولەيبول تۋرنيرىندە جانسۇگىروۆ اۋىلىنىڭ قىزدارى مەن وتەگەن باتىر اۋىلىنىڭ ۇلدارى چەمپيون اتاندى.
AUYL SPORT – 2026 ءتۋرنيرى مارەسىنە جەتتى. بىراق ونىڭ ناتيجەسى تابىستالعان مەدالدارمەن عانا ولشەنبەيدى. بۇگىن رەسپۋبليكالىق دودادا جەڭىسكە جەتكەن بالا ەرتەڭ تۋعان اۋىلىنداعى تالاي ورەنگە ۇلگى بولۋى مۇمكىن. ال ءبىر جەڭىستىڭ ارقاسىندا تۇتاس اۋىلدا جاڭا سپورت الاڭىنىڭ بوي كوتەرۋى – تيمۋر قۇلىباەۆتىڭ Halyk قايىرىمدىلىق قورى قولداپ وتىرعان باستامانىڭ ماڭىزدى ناتيجەسى.
