Auyldaǧy şaǧyn sport zalynda ülken armanǧa qanat bıtırgen 1700 jas sportşy Astanada bas qosty. 3–7 qaraşa aralyǧynda ötken AUYL SPORT – 2026 respublikalyq turnirınde elımızdıŋ 17 öŋırınen kelgen örender segız sport türınen baq synap, 107 medal sarapqa salyndy. Biylǧy jarystyŋ erekşelıgı – jeŋımpazdardyŋ jetıstıgı tuǧan auyldaryna da jaŋa mümkındık syilamaq.
Üşınşı jyl qatarynan ūiymdastyrylǧan dodada balalar boks, erkın küres, karate, basketbol, voleibol, şahmat, üstel tennisı jäne şaǧyn futboldan synǧa tüstı. AUYL SPORT – Timur Qūlybaevtyŋ Halyk qaiyrymdylyq qory qoldap otyrǧan äleumettık jobalardyŋ bırı. Bastama auyl balalarynyŋ sportpen ainalysuyna, qabıletın şyŋdauyna jäne respublikalyq, halyqaralyq jarystarda baq synauyna mümkındık berıp keledı.
Turnirdıŋ aşyluynda söz söilegen Halyk Bank Basqarma töraǧasynyŋ orynbasary Nariman Mūqyşev auyl balalarynyŋ sporttaǧy bolaşaǧy tūrǧylyqty jerıne nemese otbasynyŋ jaǧdaiyna täueldı bolmauy kerektıgın atap öttı.
«Balanyŋ talanty men jeŋıske degen ūmtylysy onyŋ qai jerde tuyp-öskenıne bailanysty emes. Är auylda, är eldı mekende ülken sportty armandaityn balalar bar. Bızdıŋ mındetımız – olardyŋ sol armanǧa jetuıne mümkındık jasau», – dedı ol.
Jarystyŋ äserlı sätterınıŋ bırı – atasy men äjesıne bergen uädesın oryndaǧan jas chempionnyŋ jeŋısı. Byltyr ata-äjesı Timur Qūlybaevtyŋ Halyk qaiyrymdylyq qorynyŋ qoldauymen Mekkege barǧan kezde, nemeresı de olardy altyn medalmen quantudy armandaǧan. Biyl jas sportşy maqsatyna jetıp, jeŋısın jaqyndaryna arnady.
Medaldyq esepte Atyrau men Almaty oblystary bes-besten altyn ielenıp, köş bastady. Maŋǧystau oblysy tört altynmen üzdıkter qatarynan körınse, jalpy jülde sany boiynşa Türkıstan oblysy 16 medalmen alǧa şyqty.
Turnirdıŋ maŋyzdy jaŋalyqtarynyŋ bırı – Timur Qūlybaevtyŋ Halyk qaiyrymdylyq qorynyŋ elımızdıŋ 10 auylynda köpfunksionaldy sport alaŋdaryn saludy josparlauy. Alǧaşqy üş nysan biyl jeŋıske jetken komandalardyŋ auyldarynda boi kötermek. Alaŋdar basketbol, voleibol, şaǧyn futbol jäne dene şynyqtyruǧa arnalmaq. Eŋ bastysy, olar sol auyldaǧy barlyq balaǧa qoljetımdı bolady.
Biyl jobaǧa 17 öŋırdegı 400-den astam auyldan 12 myŋ bala qatysyp, olardyŋ arasynan ırıktelgen 1700 sportşy respublikalyq finalǧa joldama aldy. Qatysuşylardyŋ jol jüru, tūru jäne tamaqtanu şyǧyndaryn Timur Qūlybaevtyŋ Halyk qaiyrymdylyq qory tolyq öteidı. Sonymen qatar auyl jattyqtyruşylarynyŋ käsıbi bılıktılıgın arttyruǧa da köŋıl bölıngen.
AUYL SPORT tärbielegen jas sportşylar halyqaralyq jarystarda da tabysqa jetıp jür. Byltyr Serbiiada ötken ISF U-15 Gimnaziadasynda üş altyn jäne bır qola medal ielense, biyl Türkiiadaǧy voleibol turnirınde Jansügırov auylynyŋ qyzdary men Ötegen batyr auylynyŋ ūldary chempion atandy.
AUYL SPORT – 2026 turnirı märesıne jettı. Bıraq onyŋ nätijesı tabystalǧan medaldarmen ǧana ölşenbeidı. Bügın respublikalyq dodada jeŋıske jetken bala erteŋ tuǧan auylyndaǧy talai örenge ülgı boluy mümkın. Al bır jeŋıstıŋ arqasynda tūtas auylda jaŋa sport alaŋynyŋ boi köteruı – Timur Qūlybaevtyŋ Halyk qaiyrymdylyq qory qoldap otyrǧan bastamanyŋ maŋyzdy nätijesı.
