ەلىمىزدىڭ وڭىرلەرىندە بالا قۇقىقتارى جونىندەگى ۋاكىل لاۋازىمى ەنگىزىلىپ جاتىر. ەندى ءار ايماقتىڭ ءوز وكىلى بولادى، ولاردان بالالار دا، اتا-انالار دا كومەك سۇراي الادى. بۇل تۋرالى ۆەدومستۆونىڭ ءباسپاسوز قىزمەتى مالىمدەدى، دەپ حابارلايدى “ادىرنا” ۇلتتىق پورتالى.
بالا قۇقىقتارى جونىندەگى ۋاكىلدەر بالانىڭ قۇقىقتارى مەن زاڭدى مۇددەلەرىنىڭ بۇزىلۋى تۋرالى وتىنىشتەردى، جەرگىلىكتى اتقارۋشى ورگانداردىڭ جانە وزگە دە ۇيىمداردىڭ ارەكەتتەرىنە نەمەسە بەيارەكەتىنە قاتىستى شاعىمداردى قارايدى. سونداي-اق ولار بالالاردى قورعاۋ سالاسىنداعى ماسەلەلەردى شەشۋگە ارنالعان زاڭ جوبالارىن دامىتۋعا، ىلگەرىلەتۋگە قاتىسادى.
سونداي-اق بالا قۇقىقتارى جونىندەگى ومبۋدسمەندەردىڭ مەملەكەتتىك ورگاندار مەن ءبىلىم بەرۋ، دەنساۋلىق ساقتاۋ، مادەنيەت، سپورت جانە حالىقتى الەۋمەتتىك قورعاۋ ۇيىمدارىنا كەدەرگىسىز قول جەتكىزۋى قامتاماسىز ەتىلەدى. بالا قۇقىقتارى جونىندەگى ۋاكىلدەر قوعامدىق نەگىزدە جۇمىس ىستەيدى.
«ۇكىمەتتىڭ قاۋلىسىنا سايكەس، قازىر بۇل لاۋازىم بارلىق وبلىس پەن رەسپۋبليكالىق ماڭىزى بار قالادا ەنگىزىلىپ جاتىر. بالالاردىڭ قۇقىقتارىن قورعاۋ جونىندەگى وبلىستىق ۋاكىلدەردى وبلىستاردىڭ جانە رەسپۋبليكالىق ماڭىزى بار قالالاردىڭ اكىمدەرى تاعايىندايدى. بالا قۇقىقتارى جونىندەگى وڭىرلىك ۋاكىلدەردى ىرىكتەۋدىڭ نەگىزگى كريتەريلەرى – ۇمىتكەردىڭ بالالارمەن جۇمىس ىستەۋ تاجىريبەسى، ۇكىمەتتىك ەمەس ۇيىمدارداعى تاجىريبەسى نەمەسە قوعامدىق قىزمەتى، سونداي-اق تاعايىنداۋ كەزىندە بالالاردىڭ قۇقىقتارىن قورعاۋدا ۇمىتكەردىڭ قانداي ۇلەس قوسقانى ەسكەرىلەدى. بۇل بالالاردىڭ قۇقىقتارىن قورعاۋ سالاسىندا تاجىريبەسى جانە ءوز ۇستانىمى بار ەل قۇرمەتتەيتىن ادامدار بولۋى ءتيىس»، – دەدى وقۋ-اعارتۋ مينيسترلىگى بالالاردىڭ قۇقىقتارىن قورعاۋ كوميتەتى توراعاسىنىڭ ورىنباسارى ەلينا پاۋلي.
قازىردىڭ وزىندە جەتى وبلىستا بالا قۇقىقتارى جونىندەگى ۋاكىلدەر تاعايىندالىپ ۇلگەردى. ولاردىڭ اراسىندا ۇكىمەتتىك ەمەس ۇيىمداردىڭ، قوعامدىق بىرلەستىكتەردىڭ جەتەكشىلەرى مەن زاڭگەرلەر بار.
”ادىرنا” ۇلتتىق پورتالى
