Elimizdiń óńirlerinde Bala quqyqtary jónindegi ýákil laýazymy engizilip jatyr. Endi ár aımaqtyń óz ókili bolady, olardan balalar da, ata-analar da kómek suraı alady. Bul týraly vedomstvonyń baspasóz qyzmeti málimdedi, dep habarlaıdy “Adyrna” ulttyq portaly.
Bala quqyqtary jónindegi ýákilder balanyń quqyqtary men zańdy múddeleriniń buzylýy týraly ótinishterdi, jergilikti atqarýshy organdardyń jáne ózge de uıymdardyń áreketterine nemese beıáreketine qatysty shaǵymdardy qaraıdy. Sondaı-aq olar balalardy qorǵaý salasyndaǵy máselelerdi sheshýge arnalǵan zań jobalaryn damytýǵa, ilgeriletýge qatysady.
Sondaı-aq bala quqyqtary jónindegi ombýdsmenderdiń memlekettik organdar men bilim berý, densaýlyq saqtaý, mádenıet, sport jáne halyqty áleýmettik qorǵaý uıymdaryna kedergisiz qol jetkizýi qamtamasyz etiledi. Bala quqyqtary jónindegi ýákilder qoǵamdyq negizde jumys isteıdi.
«Úkimettiń qaýlysyna sáıkes, qazir bul laýazym barlyq oblys pen respýblıkalyq mańyzy bar qalada engizilip jatyr. Balalardyń quqyqtaryn qorǵaý jónindegi oblystyq ýákilderdi oblystardyń jáne respýblıkalyq mańyzy bar qalalardyń ákimderi taǵaıyndaıdy. Bala quqyqtary jónindegi óńirlik ýákilderdi irikteýdiń negizgi krıterııleri – úmitkerdiń balalarmen jumys isteý tájirıbesi, úkimettik emes uıymdardaǵy tájirıbesi nemese qoǵamdyq qyzmeti, sondaı-aq taǵaıyndaý kezinde balalardyń quqyqtaryn qorǵaýda úmitkerdiń qandaı úles qosqany eskeriledi. Bul balalardyń quqyqtaryn qorǵaý salasynda tájirıbesi jáne óz ustanymy bar el qurmetteıtin adamdar bolýy tıis», – dedi Oqý-aǵartý mınıstrligi Balalardyń quqyqtaryn qorǵaý komıteti tóraǵasynyń orynbasary Elına Paýlı.
Qazirdiń ózinde jeti oblysta bala quqyqtary jónindegi ýákilder taǵaıyndalyp úlgerdi. Olardyń arasynda úkimettik emes uıymdardyń, qoǵamdyq birlestikterdiń jetekshileri men zańgerler bar.
”Adyrna” ulttyq portaly
