الماتى وبلىسىندا شەتەلىك ينۆەستورلاردىڭ قاتىسۋىمەن 1,3 ميلليارد دوللار سوماسىنا 19 جوبا جۇزەگە اسىرىلۋدا. بۇل تۋرالى الماتى وبلىسىنىڭ اكىمى مارات سۇلتانعازيەۆ بەينەكونفەرەنتسيا بايلانىسى رەجيمىندە وتكەن «قر – قحر ىنتىماقتاستىعى بويىنشا دوستىق ديالوگ» تەلەكوپىرى بارىسىندا مالىمدەدى، دەپ حابارلايدى " ادىرنا" پورتالى.
بەلگىلى بولعانداي، الماتى وبلىسى الەم بويىنشا 97 ەلمەن ساۋدا ىنتىماقتاستىعىن جۇرگىزۋدە. 2022 جىلدىڭ 7 ايىندا وبلىستىڭ ەكسپورت اينالىمى — 179,9 ملن اقش دوللارىن قۇرادى.
بۇدان باسقا، 6 500 — گە جۋىق جۇمىس ورنىن قۇرا وتىرىپ، شەتەلدىك ينۆەستورلاردىڭ قاتىسۋىمەن 1,3 ملرد، اقش دوللارى سوماسىنا شامامەن 19 جوبا، ونىڭ ىشىندە ينۆەستيتسيالار سوماسى-94,5 ملرد. تەڭگە بولاتىن 350 جۇمىس ورنىن قۇرۋمەن «جەتىسۋ ۆولفرامى» جشس – «بۇعىتى» ۆولفرام كەن ورنىن ونەركاسىپتىك يگەرۋ سياقتى قىتاي ينۆەستيتسيالارىنىڭ قاتىسۋىمەن جوبالار ىسكە اسىرىلۋ ساتىسىندا، «جەتىوزەننىڭ قۋاتى» جشس — ينۆەستيتسيا سوماسى 37,4 ملرد.تەڭگەنى قۇرايتىن 60 مۆت – تىق «شەلەك» جەل ەلەكتر ستانتسياسى، وندا 30 جۇمىس ورنىن قۇرۋ جوسپارلانۋدا.
«الماتى وبلىسى مەن قىتاي حالىق رەسپۋبليكاسى اراسىنداعى ەكونوميكالىق قاتىناستاردىڭ قازىرگى جاعدايى جاڭا بىرلەسكەن جوبالاردى ىسكە اسىرۋ بويىنشا ۇلكەن مۇمكىندىكتەر اشادى.بۇگىنگى كۇنى لوگيستيكا، تۋريزم، اۋىل شارۋاشىلىعى، جاڭارتىلاتىن ەنەرگيا كوزدەرى، وڭدەۋ ونەركاسىبى، قۇرىلىس ماتەريالدارىن ءوندىرۋ جانە فارماتسەۆتيكا سىندى ەكونوميكانىڭ سالالارى ءوڭىردى دامىتۋدىڭ باسىم باعىتتارى بولىپ تابىلادى. قازاقستان رەسپۋبليكاسىنىڭ وڭتۇستىك-شىعىسىندا ورنالاسقان وبلىستىڭ قحر – مەن جالپى شەكاراسى 300 كم-دەن استام جانە «ۇلى جىبەك جولى» وتەتىن رەسپۋبليكانىڭ ءتورت وبلىسىنىڭ ءبىرى، «باتىس ەۋروپا-باتىس قىتاي» حالىقارالىق ماڭىزى بار اۆتوموبيل ءدالىزى بولىپ تابىلادى. ەلدىڭ ەڭ ءىرى مەگاپوليسى – الماتى قالاسىنىڭ اينالاسىندا اگلومەراتسيا قۇرىلۋدا، وندا نەگىزگى ونەركاسىپ پەن حالىق شوعىرلانعان. وبلىستىڭ ترانسكونتينەنتالدىق ءدالىز جولىندا ءتيىمدى كولىكتىك-لوگيستيكالىق ورنالاسۋى وڭىرگە 183 ملن.ادام الەۋەتى بار ەۋرازيالىق ەكونوميكالىق وداق (ەاەو) نارىقتارىنا قول جەتكىزۋگە مۇمكىندىك بەرەدى جانە كولىكتىك لوگيستيكانى دامىتۋ باسىمدىعىن ايقىندايدى»، — دەپ اتاپ ءوتتى ءوز سوزىندە مارات سۇلتانعازيەۆ.
تەلەكوپىردى قورىتىندىلاي كەلە، الماتى وبلىسىنىڭ اكىمى مارات سۇلتانعازيەۆ پەن شۇاا حالىق ۇكىمەتىنىڭ توراعاسى ەركىن تۋنياز شىڭجاڭ وڭىرىمەن باۋىرلاستىق بايلانىس ورناتۋ نيەتى تۋرالى حاتتاماعا قول قويدى.
ەستەرىڭىزگە سالا كەتەيىك، قحر توراعاسى سي تسزينپين 14 قىركۇيەكتە نۇر-سۇلتانعا مەملەكەتتىك ساپارمەن بارادى. ول رەسپۋبليكا پرەزيدەنتى قاسىم-جومارت توقاەۆتىڭ شاقىرۋىمەن كەلەدى. بۇل قحر باسشىسىنىڭ كوروناۆيرۋستىق پاندەميا باستالعاننان بەرگى العاشقى شەتەلدىك ساپارى.
