قازاقستاننىڭ ءبىر وبلىسىن شەت مەملەكەتتىڭ پايداسىنا بەرەدى دەگەن جالعان ماتەريال الەۋمەتتىك جەلىدە جەلدەي ەسكەن بولاتىن. اتالعان جايتقا قاتىستى ەلىمىزدىڭ باس پروكۋراتۋراسى رەسمي تۇسىنىك بەردى، دەپ حابارلايدى “ادىرنا” ۇلتتىق پورتالى.
«ءانونيمدى تەلەگرام ارنالاردىڭ بىرىندە قازاقستاننىڭ ءبىر وبلىسىن باسقا ەلدىڭ پايداسىنا يەلىكتەن شىعارۋ تۋرالى ۇندەۋ قامتىلعان ارانداتۋشىلىق ماتەريال جاريالاندى. ماتەريالدىڭ اۆتورى انىقتالدى. ول قازاقستانعا كەلگەن شەتەلدىكتەردىڭ قاتارىنا جاتپايدى. قازىرگى ۋاقىتتا الىس شەتەلدىڭ بىرىندە تۇرادى. بۇل سىرتتان باعىتتالعان جوسپارلى جانە ماقساتتى اكتسيا. ونىڭ نىسانى - قازاقستانداعى جاعدايدى تۇراقسىزداندىرۋ»، - دەدى قر پروكۋراتۋراسىنىڭ وكىلى سەرىك ادىلكەنۇلى.
سونداي-اق، ول جەلىدە جاريالانعان ماتەريالدىڭ مازمۇنى جالعان اقپارات تاراتىپ، ۇلتتىق ارازدىقتى قوزدىرۋ ماقساتىن كوزدەيتىنىن ايتتى
«ماتەريالدا كورسەتىلگەن ارەكەتتەر قر قىلمىستىق كودەكسىنىڭ 174-ءى، 180-ءى جانە 274-ءى بابى بويىنشا قىلمىستىق جاۋاپكەرشىلىك پەن جازاعا اكەلىپ سوعادى. اتالعان سەپاراتيستىك شاقىرۋلار فاكتىسى بويىنشا 5 جىلدان 10 جىلعا دەيىن باس بوستاندىعىنان ايىرۋدى كوزدەيتىن قر قىلمىستىق كودەكسىنىڭ 180-ءى بابىنىڭ 2-بولىگى بويىنشا قىلمىستىق ءىس قوزعالدى. وسىعان بايلانىستى ازاماتتاردى ارانداتۋشىلىققا بەرىلمەۋگە شاقىرامىز. وسى سەكىلدى ماتەريالدار مەن ۇندەۋلەردى جاريالاپ، تاراتۋشىلار قاتاڭ قىلمىستىق جاۋاپكەرشىلىككە تارتىلاتىنىن نازارعا سالامىز»، - دەيدى ول.
