وبلىس اكىمدىگىندە وتكەن جەدەل كەڭەستە ءوڭىر باسشىسى عالي ەسقاليەۆ وڭىردە جۇمىسپەن قامتۋ دەڭگەيىنىڭ تومەندىگىن، جاستارمەن جۇمىستىڭ ءوز دەڭگەيىندە جۇرگىزىلمەي جاتقانىن ايتتى، دەپ حابارلايدى “ادىرنا” ۇلتتىق پورتالى.
جيىن بارىسىندا كوممۋنالدىق مۇلىكتى سەنىمگەرلىك باسقارۋعا بەرۋ جانە جول قوزعالىسى قاۋىپسىزدىگىن قامتاماسىز ەتۋ ماسەلەلەرى دە تالقىلاندى.
بقو جاستار ساياساتى باسقارماسىنىڭ باسشىسى دۋلات يماشەۆتىڭ ايتۋىنشا، قازىرگى تاڭدا «بولاشاعىڭ ءوز قولىندا» جوباسى اياسىندا مەملەكەتتىك باعدارلامالاردى ناقتىلاۋ جۇمىستارى جۇرگىزىلگەن. «ديپلوممەن اۋىلعا» باعدارلاماسى بويىنشا 700-گە جۋىق جاس مامانعا كوتەرمە جاردەماقى رەتىندە 213,3 ميلليون تەڭگە، 307 مامانعا جالپى سوماسى 1 386,9 ميلليون تەڭگەگە تۇرعىن ءۇي الۋعا نەسيە بەرىلىپتى. «جاسىل ەل» باعدارلاماسى بويىنشا 1175 ادام جۇمىسقا ورنالاسسا، «ستۋدەنتتىك قۇرىلىس جاساقتارى» جوباسى بويىنشا نەبارى 460 كۆوتا يگەرىلگەن، ءوز كەزەگىندە 8 مىڭعا جۋىق جاس مامان كەڭەس الىپ، جۇمىسپەن قامتۋ ورتالىقتارىنا جىبەرىلگەن. سونداي-اق جوبا اياسىندا بيىلعى جىلدىڭ سوڭىنا دەيىن 500 ادامدى جۇمىسپەن قامتۋ جوسپارلانۋدا. جازدا كاسىپكەرلەر مەن جاس مامانداردىڭ كەزدەسۋلەرى ۇيىمداستىرىلدى. بۇگىنگى تاڭدا «موديسال» جيھاز فابريكاسىمەن كوللەدج ستۋدەنتتەرىن وندىرىستىك تاجىريبەدەن وتكەننەن كەيىن جۇمىسقا ورنالاستىرۋ ءۇشىن كەلىسىمشارت جاسالعان. وقۋىن اياقتاعان اسپازدار مەن داياشىلاردى جۇمىسقا الۋ ءۇشىن مەيرامحانا يەلەرىمەن كەلىسسوزدەر جۇرگىزىلۋدە ەكەن.
ءوز كەزەگىندە وبلىس اكىمى رەسۋرستىق ورتالىقتىڭ جۇمىسىنا قاتىستى بىرقاتار ەسكەرتۋلەر جاساپ، بقو اكىمدىگى اپپاراتىنىڭ باسشىسى ابات شىنىبەكوۆكە باسقارما جۇمىسىن جانداندىرۋدى تاپسىردى.
– بۇگىنگى تاڭدا جاستاردى جۇمىسپەن قامتۋعا ارنالعان «العاشقى جۇمىس»، «جاستار تاجىريبەسى» باعدارلامالارى كوپ. بۇل باعدارلامالار بويىنشا كاسىپكەرلەرگە كەڭىنەن ءتۇسىندىرۋ جۇمىستارىن جۇرگىزۋ قاجەت. سونداي-اق قىسقا مەرزىمدى كۋرستار بار، تالاپ ەتىلمەگەن ماماندىقتار بويىنشا مامانداردى وقىتۋدىڭ قاجەتى جوق، ەڭبەك نارىعىنا نازار اۋدارۋ قاجەت، – دەدى عالي ەسقاليەۆ.
وبلىستىق مەملەكەتتىك ساتىپ الۋ باسقارماسى باسشىسىنىڭ ورىنباسارى فاريدا رادجاپوۆا وبلىستاعى 1204 نىساننىڭ 334-ءىن كاسىپكەرلىك سۋبەكتىلەرىنە سەنىمگەرلىك باسقارۋعا بەرۋگە بولاتىنىن اتاپ ءوتتى. سوڭعى ءتورت جىلدا نىسانداردى جالعا بەرۋدەن تۇسكەن كىرىس شامامەن 500 ميلليون تەڭگەنى قۇرادى. ال قالا اكىمى ميرجان ساتقانوۆ سوڭعى ەكى جىلدا ساتىپ الۋ قۇقىعى جوق 10 نىساننىڭ قالا اكىمشىلىگىنە بەرىلگەنىن ايتتى. وسى ۋاقىت ىشىندە بيۋدجەتكە 12 ملن. ءتۇسىم تۇسكەن.
– بيىل 32 نىسان جالعا بەرىلدى.وتكەن سەگىز ايدا بيۋدجەتكە 18 ملن. تەڭگەگە جۋىق قارجى ءتۇستى. جىل سوڭىنا دەيىن تاعى ءۇش نىساندى سەنىمگەرلىك باسقارۋعا بەرۋدى جوسپارلاپ وتىرمىز، – دەدى م.ساتقانوۆ.
اعىمداعى جىلدىڭ سەگىز ايىنىڭ قورىتىندىسى بويىنشا وبلىس جولدارىندا 205 جول-كولىك وقيعاسى تىركەلىپ، سونىڭ سالدارىنان 67 ادام قازا تاۋىپ، 251-ءى جاراقات العان. بۇل تۋرالى جيىندا بقو دپ باسشىسىنىڭ ءبىرىنشى ورىنباسارى جانبولات جانشين باياندادى.
– جول-كولىك وقيعالارىنىڭ نەگىزگى سەبەبى – جىلدامدىقتى ارتتىرۋ، كولىك جۇرگىزۋ مادەنيەتىنىڭ تومەندىگى جانە كولىك جۇرگىزۋ كەزىندە الكوگولدى ىشىمدىك ءىشۋ. وسىلايشا، اعىمداعى جىلدىڭ باسىنان بەرى مانەۆر جاساۋ ەرەجەسىن بۇزعان 4144 جۇرگىزۋشى اكىمشىلىك جاۋاپكەرشىلىككە تارتىلعان. جىلدامدىقتى ارتتىرۋ سالدارىنان 31 ادام قازا تاۋىپ، 166 جۇرگىزۋشىگە قارسى جولاققا شىعىپ كەتكەنى ءۇشىن ايىپپۇل سالىندى كوبىنەسە ءۇي جانۋارلارى دا جول-كولىك وقيعاسىنا كىنالى بولادى. ويتكەنى، تۇندە جولدا جانۋارلاردى بايقاۋ وتە قيىن. اعىمداعى جىلدىڭ باسىنان بەرى 1899 مال يەسى اكىمشىلىك جاۋاپكەرشىلىككە تارتىلىپ، 265-ىنە ەسكەرتۋ جاسالىپ، جالپى ايىپپۇل سوماسى 8 ملن. 151 مىڭ 183 تەڭگەنى قۇراپ وتىر.بۇل فاكتىلەر مال باعۋدىڭ باقىلاۋسىز بولۋىنا بايلانىستى، – دەدى ج.جانشين.
وبلىس اكىمى اۋدان اكىمدەرى مەن ۆەتەريناريا ورگاندارىنا بارلىق اۋىل شارۋاشىلىعى جانۋارلارىن ەسەپكە الۋ بويىنشا قاجەتتى شارالاردى قابىلداۋدى تاپسىردى. سونىمەن قاتار، وبلىستىق جولاۋشىلار كولىگى جانە اۆتوموبيل جولدارى باسقارماسىنا اۆتوجولدارداعى بيلبوردتاردى جاڭارتۋ بويىنشا ۇسىنىستار بەرىلدى.
”ادىرنا” ۇلتتىق پورتالى
