قازان ايى. سارسەنبى. جاي سارسەنبى ەمەس، كوپتەن كۇتكەن سارسەنبى. بۇگىن دالا ءدىلمارلارىنىڭ ءىزىن جالعاعان، جانارلارى جالىن اتقان جالىندى ستۋدەنتتەردىڭ اراسىنداعى شەشەندىك بايقاۋى وتكەلى تۇر. شەشەندىك دوداسىندا ونەر كورسەتىپ جۇرگەن ورەندەردىڭ ءبىرى بولعان سوڭ، مەن ءۇشىن مۇنداي بايقاۋدى باقىلاپ، رۋحاني بايلىق الۋدان اسقان باقىت جوق.
تاڭنىڭ جايما شۋاعىنا جىلىنىپ، اباي اتىنداعى مەكتەپتەن اباي اتىنداعى ۋنيۆەرسيتەتكە اسىعىس كەلدىك. اۋديتورياعا اياق باسسام، جيىلعان جۇرت اڭگىمەلەسىپ، كوڭىلدى كۇيمەن وتىر. مەندە ورىندىققا وتىرىپ، سايىستا باعىن سىنايتىن رامازان دوسىمدى كۇتتىم. ءسۇت ءپىسىرىم ۋاقىت وتكەننەن كەيىن رامازان مەن شىڭعىس دوسىم ارقالارىنا سومكەلەرىن ارتىپ كەلىپتى. قال-جاي سۇراسىپ بولعاننان سوڭ:
—"مىناداي تاقىرىپقا مىناداي پىكىر ايتامىن" - دەپ جارىسقا جارتى ساعات قالسا دا رامازان دايىندىعىن پىسىقتاپ جاتتى...
بۇل الاماننىڭ الدىندا اپتا بويى رامازانمەن تىنىم تاپپاي شەشەندىك تاقىرىپتار بويىنشا ىزدەنە باستادىق.
ايتپاقشى، ءبىزدىڭ كەز كەلگەن شەشەندىكتىڭ بايگەسىندە باق سىناردان بۇرىن ات ءمىنىپ ايباتتانتىن ادەتىمىز بار. ادەت ەمەس، داستۇرگە اينالدى. قانىمىز قازاق بولعاننان سوڭ ءار الاش ۇلىنىڭ بويىندا اتقا دەگەن قۇمارلىق بولادى ەمەس پە؟! وسى ءداستۇردى تاعى جالعاستىرىپ، ستۋدەنتتەر اراسىنداعى سايىس الدىندا رامازاننىڭ اۋىلىنا بارىپ، جانىمىزدى راحاتتاندىرىپ تۇلپاردى تاقىمدادىق. سودان بولار دوسىمنىڭ ويى سەرگەك، رۋحى اسقاق ەكەنى قاراشىعىنان كورىنىپ تۇر. ۇستىندە ورنەكتى، جاراسىمدى قازاقى قارا شاپانى، باسىندا ويۋلى كوركەم تاقياسى بار. قۇددى ءبىر كەشەگى وتكەن قازىبەكتەردەي قاسقايا الشاڭ باسىپ ءجۇر...
ءبىرىنشى كەزەڭ باستالدى. جارقىن ۇستاز: ء"بىز قازىلار القاسىن تانىستىرمايمىز، ستۋدەنتتەردىڭ دە قاي وڭىردەن كەلگەنى تۋرالى ءتىس جارمايمىز. بارلىعى ءادىل بولۋى ءتيىس. ەشكىمگە بۇرا تارتپاي تەڭ قارايمىز"-دەگەنىنەن-اق بايقاۋدا شاڭنىڭ توزاڭىنداي شيكىلىك جوقتىعىنا سەندىق، كۋا بولدىق.
ءبىرىنشى جانە ەكىنشى جۇپ ونەر كورسەتتى. ال ۇشىنشىسىندە رامازان دوسىممەن تالشىن اتتى قاراتورى قىز جۇپتاستى. ەكەۋىنە "الەۋمەتتىك جەلىنىڭ الەۋەتى كۇشتى مە؟" دەگەن اۋقىمدى تاقىرىپ بۇيىرىپتى. بىراق، بۇل تاقىرىپقا رامازان اسا جاقسى دايىندالماعان ەدى. ياعني، وڭ جامباسىنا تۇسپەدى. دوسىم تانىستىرۋدا كىدىرىپ قالدى.
مەن ىشىمنەن: "مۇمكىن ەمەس! جوق. رامازان سويلەمەي قالۋى ءۇش ۇيىقتاسام تۇسىمە كىرەتىن نارسە ەمەس"-دەپ تۇرعانىمدا دوسىم سويلەي كەتتى. قازاقتىڭ كونەرگەن ءارى كوركەم سوزدەرىن قيىننان قيىستىرىپ سايراعاندا جانىم جاي تاپتى. حالىقتىڭ دا كوڭىلى كوتەرىلە لەپىرىپ:
— كەرەمەت!
— اي ازامات!
— جارايسىڭ!
دەگەن داۋىستار قۇلاققا جاعىمدى، جانعا جايلى ەستىلدى. دوسىم ەش كەزەڭنەن سۇرىنبەي ءوتتى، كەرىسىنشە جاڭىلعان ستۋدەنتتەردىڭ قاتەسىن تۇزەپ، كورەرمەننىڭ كوزايىمىنا بىردەن اينالدى.
ءبىر ۋاقىتتا ىشىمىزگە ەل قوندىرايىق دەپ، "قاعانات" اسحاناسىنا تارتتىق. رامازان شاپانىن شەشپەي، ساياباق پەن اسحانادا ۇلتتىق كيىممەن سەرىلەرشە ءجۇردى. ەلدىڭ نە ويلاعانى قاپەرىمىزگە كىرىپ تە شىقپادى. ايتەۋىر قۇر قيال، بوس ساندىراعىم با الدە ورىندالاتىن ارمانىم با بىلمەيمىن، تىلدەرى شىعىپ ءۇن قاتقانداي: "قازاقتىڭ ۇلتتىق كيىمى برەند بولسا عوي شىركىن! ءبىزدى ۇلتىن قۇرمەت تۇتاتىن مەملەكەت دەپ شارتاراپ تانيتىن ەدى"-دەگەن ويلار كەلە بەردى. ويتكەنى، رامازاننىڭ ۇستىندەگى شاپانى ەلدەن ەرەكشەلەندىرىپ تۇردى...
جارىس تامام بولىپ، قازىلار القاسى قورىتىندى شىعارۋ ءۇشىن باسقا دارىسحاناعا كەتتى. ال اۋديتوريادا اباي اتىنداعى ۋنيۆەرستيتەتىنىڭ ستۋدەنتتەرى ونەرلەرىن كورسەتتى. دومبىرا، گيتارا تارتىپ، ءان ايتىپ دۋمانداتقانى كوڭىلدى ودان ءارى كوتەردى. ءبىزدىڭ مەكتەپتىڭ تۇلەگى دۋمان باۋىرىم دا قوڭىر دومبىراسىن كۇمبىرلەتىپ، دومبىرا تارتۋدان اۋديتوريادا وتىرعان بارلىق بالادان باسىم ەكەنىن دالەلدەگەندە، توبەم كوككە ەكى ەلى جەتپەي قالعانى وتىرىك ەمەس. ءان ايتىپ وتىرعاندا قازىلار قولدارىنا ماراپاتتارىن كوتەرىپ، كىرىپ كەلدى. كىم قانشاسىنشى ورىن الادى ەكەن، قىزىق.. اۋەلى ۇستازداردى ماراپاتتادى. سودان كەيىن بەلسەندى ستۋدەنتتەردى، ارنايى جۇلدە يەلەرىن، ءۇشىنشى، ەكىنشى ورىنداردى اتادى. ءبىرىنشى ورىن مەن باس جۇلدە ءالى ايتىلمادى. رامازان مەن دۋمان قالدى... جۇرەگىمنىڭ قاعىسى جيىلەي ءتۇستى، الدە ءبىر ۇرەي بويىمدى بيلەدى. ارينە بۇل رامازان ەكەۋمىزدىڭ ارامىزداعى جاقىن دوستىقتىڭ بىردەن ءبىر بەلگىسى ەمەس پە؟!
ء—"بىرىنشى ورىن - دۋمان! "- دەدى قازىلار.
—ۋححح... "رامازان باس جۇلدە الدى" دەپ قۇتتىقتاۋعا جۇگىرىپ بارا جاتقانىمدا ءادىل قازىلار:
—"باس جۇلدە - قوجمۇقان رامازان نۇرلانۇلى"- دەپ دوسىمدى ورتاعا شاقىردى. باۋىرىمنىڭ ءجۇزى جادىراپ، كۇلىمدەپ قويا بەردى... راكەڭنىڭ باس جۇلدەنى قانجىعاسىنا بايلاۋى زور تاجەربيە، ۇلكەن ەڭبەكپەن كەلدى. دوسىم بۇل ماراپاتقا ابدەن لايىق!!
وسىلايشا كوپتەن كۇتكەن ۇيىرمەمىز ۇيىتقى، اباي ۋنيۆەرسيتەتى قولداۋشى، "اتامۇرا" كورپوراتسياسى دەمەۋشى بولعان ستۋدەنتتەر اراسىندا ءى رەسپۋبليكالىق ء"دىلمار" شەشەندىك ونەر بايقاۋى ءستتى اياقتالدى. ال ءبىز كوتەرىڭكى كوڭىلمەن ءبىلىم وردامىزعا بەتتەدىك...
ءتۇيىن ءسوز: شەشەندىك ۇلى اسقار. ال ءبىز بۇل شىڭنىڭ ەتەگىنە دە تابان تىرەمەدىك. بابالار نەگىزىن قالاعان شەشەندىك ونەردىڭ نۇرلى شىراعىن وشىرمەۋ ءبىزدىڭ قولىمىزدا! ارقامىزعا ارتىلعان اماناتتى اقتاماۋ - ارىمىزعا ارىلماس داق بولىپ قالا بەرمەك!!!
ءشامىل تيمۋرلانۇلى، ء"دىلمار" شەشەندىك ونەر ۇيىرمەسىنىڭ مۇشەسى.
